Дархан-Уул аймгийн үндэсний их баяр наадамд Увс аймгийн Тэс сумын харьяат, “Увс нуур” дэвжээний бөх Г.Цэрэнтогтох долоо даван түрүүллээ. Харин “Цагаанбаатар академи”-ийн жүдо бөхийн тамирчин Р.Омар16 нас найман сартайдаа үзүүрлэн, аймгийн заан цол хүртэж Монгол бөхийн түүхэнд нэгэн том түүхийг бичив.

    Тэрбээр улсын наадмын хүүхдийн барилдаанд түрүүлж улсын шонхор, өсвөрийн улсын аварга шалгаруулах барилдаанд түрүүлж, жүдо, чөлөөт бөхийн өсвөрийн улсын аварга болж, чөлөөтийн өсвөр үеийн Азийн аваргаас хүрэл медаль хүртэж байлаа.  Р.Омарын жүдо бөхийн багш нь олимпын хүрэл медальт, дэлхийн аварга Хөдөлмөрийн баатар, МУГТ Х.Цагаанбаатар билээ. Харин үндэсний бөхийн багш нь улсын заан Б.Серик юм.