ХЯНАЛТЫН МЭРГЭЖИЛТЭН Б.ШИРЭНДЭВ: НЭГДҮГЭЭР ЭГНЭЭГ ЧӨЛӨӨЛӨХ 11 МЯНГАН МЕТР УРТ ХААЛТ ХИЙЖ БАЙГАА 

     Улаанбаатар хотын автозамын түгжрэлийг бууруулах Үндэсний хорооны дарга Ж.Сүхбаатар нухацтай судалсны эцэст төв зам дагуух нэгдүгээр эгнээг чөлөөлөх хаалт барих даалгавар өгсөн. Тэд хэсэг судалсны эцэст хотын дөрвөн гол өргөн чөлөөний нэгдүгээр эгнээг чөлөөлж, нийтийн тээвэр явуулах, мөн дотор тойргийг бий болгох, гэр хорооллын автозамыг сайжруулах зэрэг арга хэмжээ авснаар түгжрэл 18 хувиар буурч, дундаж хурд 13 км цаг болно хэмээх тооцоо гаргажээ. Ингэснээр Улаанбаатар хотын төв зам дагуу нэгдүгээр эгнээг чөлөөлөх ажилдаа ханцуй шамлан орсон. Нэгдүгээр эгнээг чөлөөлөх ажлын гүйцэтгэл хэрхэн үргэлжилж байгаа талаар Нийслэлийн автозамын хөгжлийн газрын хяналтын мэргэжилтэн Б.Ширэндэвээс тодрууллаа. Тэрбээр “Таван шараас Офицеруудын ордон хүртэлх төв зам дагуу нэгдүгээр эгнээг чөлөөлөх хаалт хийж байгаа. Баруунаас зүүн, зүүнээс баруун чиглэлийн нэгдүгээр эгнээг түгжрэлээс чөлөөлнө гэсэн үг. Өнөөдрийн байдлаар Төмөрзамын соёлын ордноос “Гранд плаза” дэлгүүр хүртэл автозамын хаалт хийсэн. Ажлын явц 30 хувьтай үргэлжилж байна. Тус хаалтыг улсын төсвийн хөрөнгөөр буюу 906 сая төгрөгөөр барьж байгаа. Нэгдүгээр эгнээг чөлөөлөх хаалтыг зам засварын ачилтын газар буюу ОНӨААТҮГ хариуцаж хийж байгаа учир тендер зарлаагүй гэсэн үг. Зөвхөн Нийслэлийн бөгөөд Улаанбаатар хотын захирагч Д.Сумъяабазарын ззахирамжаар барьж байгаа юм. Нэгдүгээр эгнээг тусгаарлах хаалтыг тавдугаар сараас өмнө гүйцэтгэж дуусна. Нийт 11 мянган метр урттай хаалт хийж байгаа” гэсэн юм. 

     Үүнчлэн түгжрэлийг бууруулахын тулд  дугуйн замыг зөв төлөвлөн сайжруулах, нийтийн тээврийн хүртээмжийг нэмэгдүүлж, гүүр барих шаардлагатай хэмээн үзэж буй. Өнгөрсөн мягмар гарагт Улаанбаатар хотын авто замын түгжрэлийг бууруулах Үндэсний хорооны III хуралдаан  болж, Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатар удирдан явуулсан. Хурлын үеэр Нийслэлийн Бодлогын судалгаа, шинжилгээний төвийн дарга Р.Дагва авто замын түгжрэлийг бууруулах богино болон дунд хугацааны бодлогын судалгааг танилцуулсан юм. Тэрбээр “Улаанбаатар хотын түгжрэлийн асуудлыг шийдэхдээ үр дагавраар баримжаалсан бодлогыг хэрэгжүүлсэн. Энэ бол хэсэг зуур гал намжаах арга хэмжээ биш. Тэгэхээр шалтгаан руу чиглэсэн буюу урт хугацаандаа эерэг үр дүн өгөх бодлогыг баримтлах хэрэгтэй. Бид түгжрэлийг бууруулахын тулд богино болон дунд хугацаанд ямар арга хэмжээ авч болох вэ, энэ нь ямар эерэг үр дүнд хүрэх вэ гэдэг талаар судалгаа хийсэн. Ингэхдээ "Алсын хараа-2050", Улаанбаатар хотыг 2040 он хүртэл хөгжүүлэх ерөнхий төлөвлөгөө зэрэг баримт бичгүүдтэй уялдууллаа.

Дунд хугацаандаа төрийн мэдлийн их сургуулиудыг хотын дэд төвүүдэд түшиглэн шилжүүлснээр хөдөлгөөний нягтаршлыг багасгах боломжтой. Мөн боловсролын салбарт шинэчлэл хийж, харьяаллын сургуулийн тоог нэмэгдүүлэх зэрэг арга хэмжээ авч байж түгжрэл буурна” хэмээн онцолж байлаа.

     Үүний хүрээнд нийтийн тээврийн хүртээмжийг нэмэгдүүлэхээр Чингэлтэйн өргөн чөлөө, Шархадны зам, “Энхтайван”-ы гүүрний буцах эргэлт, “АПУ” ХХК-ийн уулзвар орчим, Мишээл экспогийн хойд тал, Улиастайн зам, Нарны замын нэгдүгээр эгнээг өргөтгөн шинэчилж, нийтийн тээврийн автобуснууд зорчдог байхаар зохион байгуулах үүрэг өгсөн. Мөн авто замын ачааллыг бууруулах зорилгоор гэр хорооллын нийтийн тээвэр хүртээмжгүй хэсэгт 27.3 км авто зам тавих, дамжин суух терминалыг нэмэгдүүлэх талаар санал боловсруулан ажиллахыг холбогдох албан тушаалтанд даалгалаа. Түүнчлэн Улаанбаатарын төвийн болон баруун, зүүн бүсийн дугуйн зам, гүүрний ажлын санхүүжилтийг шийдэхийг давхар үүрэг болгосныг дурдъя. 

ИРГЭД: НЭГДҮГЭЭР ЭГНЭЭГ ЧӨЛӨӨЛӨХ ХАШАА БАРЬЖ ӨГСНӨӨР АВТОБУСНЫ ХУРД НЭМЭГДЭЖ, ЗОРЧИГЧИД ТҮГЖРЭХГҮЙ 

     Өнгөрсөн жилүүдэд түгжрэл бууруулахын тулд авч хэрэгжүүлж болох олон санал солилцож байсан ч өнөөдрийг хүртэл  нэг нь ч бодит ажил хэрэг болоогүй. Иргэд хотын түгжрэлд хамаг ажил, амьдрал, залуу нас өнгөрлөө хэмээн бухимдахаас гавьдаггүй байлаа. Зарим шаардлагатай үед иргэд үзэл бодлоо илэрхийлдэг байсан ч тэдний санал, санаачилгыг ажил хэрэг болгодоггүй байсан. Харин энэ удаад нийтийн тээврийн хүрээмж, автозам, гүүр нэмж барих болон нэгдүгээр урсгалыг түгжрэлээс чөлөөлж хаалт хийж байгаад иргэд баярлаж байна. Тэд “Нэгдүгээр урсгалаар зөвхөн нийтийн тээвэр явуулах зохицуулалт хийсэн ч үр дүнд хүрээгүй. Цагдаа зогсоогоод ч нэмэргүй байдаг байсан. Харин хашлага, хаалт хийснээр нийтийн тээврийн зорчигчид түгжрэлгүй зорчиж, автобусны хурд нэмэгдэнэ” хэмээж байв. Харин Нийслэлийн бөгөөд Улаанбаатар хотын захирагч Д.Сумъяабазар өөрийн захим хуудастаа “Энхтайваны өргөн чөлөөний нэгдүгээр эгнээг бүрэн чөлөөлж, хаалт хийлээ. Автобус чөлөөтэй явна. Өмнө нь цагдаагийн хүчээр хяналтыг сайжруулахад автобусны дундаж хурд 12-13 км/цаг байсан. Гэтэл хаалт хийснээр 18 км/цаг орчим болж нэмэгдэж байгаа нь иргэдийн автобус хүлээх цаг багасна гэсэн үг” хэмээсэн байлаа.

Сэлбэ сэргэлтийн хүрээнд 44 километр зам, 13 том гүүр барьж, 2024 онд дуусгана

Мөн түгжрэлийг бууруулах зорилгоор өнгөрсөн долоо хонгийн Засгийн газрын хуралдаанаар Барилга хот, байгуулалтын сайд Ц.Даваасүрэн мэдээлэл өгсөн.  Тэрбээр “Засгийн газрын гишүүд түгжрэлтэй тэмцэж, үр дүнг гаргана. Сэлбэ сэргэлтийн бүтээн байгуулалтын хүрээнд Улаанбаатарын төв замуудын хөдөлгөөнийг сайжруулах юм. Манай хот хөндлөн зам ихтэй. Харин Сэлбэ сэргэлтийн хүрээнд Дамбадаржаагаас “ТЭЦ-3” хүрэх зам барина. Сэлбэ сэргэлтийн хүрээнд нийт 44 километр зам барьж, 13 том гүүр, 25 холбоос гүүр барина. Тус ажлын зураг төслийг зургадугаар сард гаргаж, долдугаар сараас барилгын ажлыг хийж, 2024 онд багтааж  дуусгана” гэж байсан юм. Тиймээс Түгжрэлийг бууруулах Үндэсний  хорооны даргатай болсны хүчинд түгжрэл буурах эхний ажлуудыг эхлүүлээд байна.