БНСУ-ын JTBS телевиз, НУНМИН сонины хоёр сэтгүүлч, хоёр зураглаач манай улсад ирж Монгол орны уур амьсгалын өөрчлөлт, хариу арга хэмжээний талаар сурвалжилга бэлтгэжээ. Тодруулбал, БНСУ-ын Сэтгүүлчдийн холбооны JTBS-ийн сэтгүүлч Пак Мингү, Чун Кунгү,  Байгаль орчин, хөдөө аж ахуйн Нумнин сонины Со Жимин, Ким Дажун нар Монгол Улсад ажиллаж, зургаан өдрийн өмнө буцсан байна. Монголд ажиллах үеэрээ Байгаль орчин, аялал жуулчлалын сайд Б.Бат-Эрдэнээс “Тэрбум мод” Үндэсний хөдөлгөөний үйл явц, Монгол орны цөлжилтийн өнөөгийн байдлын талаар яриа авсан байна.  

          Харамсалтай нь, тэднийг эх орондоо очсон даруй “БНСУ-ын сэтгүүлчид Монголд очоод нэг нэгийгээ хүчирхийлжээ” гэсэн мэдээлэл тус улсын хэвлэлээр цацагджээ. Тодруулбал, томилолтоор ирсэн БНСУ-ын хоёр эрэгтэй сэтгүүлч, зураглаач эмэгтэй сэтгүүлчдээ хүчирхийлсэн байж болзошгүй байгаа гэнэ.

Бид энэ талаар МСНЭ-ийн дарга Ө.Отгонбаатараас тодрууллаа. Тэрбээр “БНСУ-ын сэтгүүлчид манай улсад ажиллаад явсан нь үнэн. Энэ асуудал тус улсын сэтгүүлчдийн хоорондын асуудал юм шиг байна лээ. Өөрөөр хэлбэл, БНСУ-ын сэтгүүлчид хоорондоо асуудал үүсгэсэн байж болзошгүй. Монголоос буцахын өмнөх өдөр энэ асуудал үүссэн байж болзошгүй байна. Бидэнд яг одоогоор тодорхой мэдээлэл алга. БНСУ-ын Сэтгүүлчдийн холбоотой холбогдож байна. Энэ хэрэгт Монгол Улсын сэтгүүлчидп огт хамааралгүй” гэлээ.