Өргөө амаржих газрын захирал Ж.Энхцэцэгийг ажлаас нь чөлөөлсөн асуудлаар тус газрын Үйлдвэрчний хорооны газраас мэдээлэл өглөө. Энэ үеэр Өргөө амаржих газрын үйлдвэрчний хорооны газрын дарга Д.Өнөржаргал “ Ж.Энхцэцэг дарга халагдсантай холбоотой мэдээлэл өгөхдөө хамт олны нэр хүндэд халдаж, Үйлдвэрчний хорооны дарга намайг олон сая төгрөг идсэн мэтээр буруу ташаа мэдээлэл олон нийтийн сүлжээгээр цацаж, хамт олныхоо нэр хүндэд халдаж байна. Энэ дагуу бид хариу тайлбар мэдээлэл өгье. Бид 2018 онд Үйлдвэрчний эвлэлийн ажлыг авсан. Үүнээс хойш жил бүр ажилчдадаа тайлангаа тавьж байсан. Харин цар тахалтай холбоотойгоор ажилчдадаа хурлаа нээлттэй хийж чадахгүй байсан болохоор А зааланд зурган байдлаар самбар гаргаад гомдол саналыг нь сонсож, мөн нээлттэйгээр тайлангаа танилцуулж байсан. Үйлдвэрчний эвлэлийн цалин нийт ажилчдын цалин, түүний орлогоос нэг хувийг авдаг. Нийт цугласан цалингийн 70 хувийг нь манай үйлдвэрчний хороо өөртөө зарцуулж, 30 хувийг нь Монголын Эрүүл мэндийн ажилчдын Үйлдвэрчний холбоонд татвараа төлдөг. Энэхүү татварын мөнгөө  ажилчдынхаа ахуй орчин, амжиргааг сайжруулахад зарцуулдаг. Ямар нэгэн мөнгө зарцуулахдаа хамт олонтойгоо ярилцаж, тэргүүлэх хүмүүстэйгээ зөвлөлдөн, зөвшөөрч зарцуулдаг. Түүнээс ганцаараа шийддэг зүйл биш. Мөн Эрүүл мэндийн ажилчдын үйлдвэрчний хорооноос жил бүр шалгалт ирдэг. Манайх шалгалтад үргэлж 90-ээс дээш үнэлгээ авахаас гадна ямар нэгэн зөрчил гомдол гаргаагүй. Түүнээс гадна улирал бүхэн санхүүгийн шалгалтын тайлангаа өгдөг. Манайх 2021 онд 483 ажилтантай байсан. Одоогоор 162 ажилтан ажлаас гарсан” гэв.