Сүхбаатар аймгийн Эрдэнэцагаан сумаас гарсан түймэр Дорнод аймгийн хэд хэдэн сумаар дамжиж, зүүн аймгууд их хэмжээний хохирол амсаад байна. Урьдчилсан байдлаар Халхгол сумын 10 гаруй айлын гэр, хашаа шатжээ.

Бид Халхгол сумын гуравдугаар багийн малчин Б.Батбаяртай холбогдож, нөхцөл байдлын талаар тодрууллаа.

Тэрбээр “Яах ийхийн зуургүй л түймэр ороод ирсэн. Түймэртэй уралдаад л том гэрээ ачааллаад хөдөлж амжлаа. Бусад машин тэрэг, хоттой төл мал, жижиг гэр гээд бүгдийг нь түймэрт өргөчихлөө. Манайх 300 гаруй үхэр, 400 гаруй хонь, ямаатай. Гэрийн гадаа нэг ч мал алга. Түймэрт шатаж, үрэгдсэн малын сэг зэм, үнс л үлдсэн. Мал маань түймрээс дайжиж алга болсон. Одоо малаа хайгаад “Түймэрт өртчихөөгүй байгаасай” гээд л залбираад эрэлд явж байна. Манай ойролцоо гурван айл байдаг. Нэг айл нь манайхтай адилхан галд хамаг эд хөрөнгөө түймэрт өргөсөн. Хоёр айл нь харьцангуй гайгүй тарсан. Шөнө цас орж, олон хүний хүчээр түймэр унтарлаа. Одоо манай нутагт шороон шуурга дэгдэж байна. Харлаж шатсан, үнс нурам болсон тал болчихлоо” гэв.