Сүхбаатар аймгийн Эрдэнэцагаан сумаас гарсан түймэр Дорнод аймгийн хэд хэдэн сумаар дамжиж, зүүн аймгууд их хэмжээний хохирол амсаад байна. Одоогийн байдлаар хэчнээн га талбай шатаж, амссан хохирлын хэмжээ тодорхойгүй байна. Өнөө өглөөний байдлаар Халхгол суманд цас орж, түймэр бүрэн унтарсан гэх мэдээллийг албаныхан өглөө.

         Халхгол сумын Засаг дарга Х.Хүрэл-Эрдэнэ “Манай суманд гарсан түймэр бүрэн унтарсан. Гурван бүлэг гарч ажилласнаас нэг бүлгээс мэдээлэл ирээгүй байна. Түймрийн улмаас 10 айлын гэр, байшин, хашаа шатсан. Хэчнээн толгой мал, хэдэн га газар шатсаныг тогтоогоогүй байгаа. Мөн түймрийн улмаас хүний амь эрсдээгүй. Өчигдөр Онцгой байдлын ерөнхий газраас онгоцоор хүмүүс ирж түймрийг унтраалцсан” гэлээ.

Түймэрт олон тооны цагаан зээр өртөж, шатаж байгаа бичлэг цахим сүлжээнд цацагдсан билээ. Мөн үүнээс гадна түймрийн бүсэд байгаа, аюулд орсон ан амьтдыг хилийн хашааг эвдэлж, хил давуулж байгаа бичлэг цацагдсан.

       Бид энэ талаар ХХЕГ-ын Олон нийттэй харилцах, хэлтсийн дарга, хурандаа Б.Энхтайвантай холбогдож, тодрууллаа. Тэрбээр “Торны хаалга гэж байдаг. Нэгдүгээрт, хилийн багана, тэмдэг шалгах зорилготой. Хоёрдугаарт, тоорны хаалгаар ан амьтдын нүүдлийг чөлөөтэй нэвтрүүлэх үүрэгтэй. Зэрлэг ан амьтад хоёр улсын нутаг дэвсгэр дээр чөлөөтэй явж байх ёстой. Ийм учраас торны хаалгыг нээж түймрийн аюулд орсон ан амьтдыг хаалгаар гаргасан. Хээрийн түймэрт Дорнод аймгийн Хилийн цэргийн бүх ангийн албан хаагч, хилчид дайчлагдаж, ажилласан” гэлээ.