Баян-Өлгий аймгийн харьяат, Улсын заан Б.Серик бусдад хутгалуулж, гэмтсэн. Тодруулбал, гуравдугаар сарын 13-ны өдөр Баянхонгор аймагт улсын заан Б.Серикийг тус аймгийн харьяат Б гэгч нь хутгалсан талаар мэдээлсэн билээ.

       Энэ талаар ЦЕГ-ын Хэвлэл мэдээллийн төвийн мэргэжилтнээс тодруулахад “Ийм хэрэг гарсан нь үнэн. Баянхонгор аймгийн цагдаагийн газарт эл хэргийг шалгаж байгаа. Бусдын эрүүл мэндэд хохирол учруулсан Б-г Эрүүгийн хэргийн 11.1-д зааснаар хэрэг бүртгэл нээж, шалгаж байна” гэсэн байдаг.

Харин улсын заан Б.Серикийн аав н.Бередмуратаас энэ талаар тодрууахад “Миний хүү Серикийг хутгалсан тухай мэдээ уншлаа. Би энэ талаар сонсоогүй, мэдээгүй учраас гайхаж байна. Энэ худлаа мэдээлэл гэж бодож байна. Б.Серик гадаад улс руу тэмцээнд явчихсан байгаа. Биеийн байдал нь зүгээр байгаа” гэж хэлсэн юм.

Тэгвэл улсын заан Б.Серик эх орондоо иржээ. Түүнээс хэргийн талаар тодрууллаа. Тэрбээр “Намайг хутгалсан гэх мэдээлэл яваад байна лээ. Миний гар хүнд гэмтээгүй, эмчилгээ хийлгээгүй. Найзуудтайгаа байж байгаад л гэнэтийн ийм зүйл болчихлоо. Баянхонгорт хамт байсан хүмүүс цагдаад дуудлага өгчихсөн байсан. Цагдаад дуудлага өгсөн гэж мэдээгүй байсан. Тухайн үед согтууруулах ундааны зүйл хэрэглэсэн байсан. Намайг гэмтээсэн найздаа гомдолгүй. Найзууд юм чинь юуг нь гомдох билээ дээ. Хэргийн талаар цагдаагийн байгууллагаас асуучих” гэлээ.