БНСУ-ын Засгийн Газрын тусламжаар 2019 оноос эхлэн зургаан сая ам.долларын өртөгтэй мэдээлэл, холбооны технологийн сургуулийн чадавхыг бэхжүүлэх төслийг  хэрэгжүүлж эхэлсэн. Тэгвэл өнөөдөр төслийг хэрэгжүүлэгч КОЙКА олон улсын байгууллагаас албан ёсны нээлт хийлээ.

Уг төслийн хүрээнд ахисан түвшний сургалт, судалгааны хамгийн орчин үеийн 10 лаборатори байгуулагдаж, сургалтын 20 хөтөлбөр шинэчлэгдэн, эрдэм шинжилгээний 22 төсөл хэрэгжинэ.

                                Төслийн үр дүнд бий болж байгаа материаллаг бааз, хүний нөөц, барилга байгууламж, орчны шинэчлэл нь томоохон их сургуулиудыг судалгаанд суурилсан их сургууль болгон хөгжүүлэх засгийн газрын бодлогыг хэрэгжүүлэхэд бодитой хувь нэмэр болох юм.

Монгол улсын нийгэм, эдийн засгийн хөгжлийн тэргүүлэх чиглэл болох мэдээлэл холбооны технологийн чиглэлээр мэргэжилтэн бэлтгэдэг хамгийн том төрөлжсөн сургуулийн чадавх бэхэжсэнээр энэ салбарын өрсөлдөх чадвар дээшилж, бусад салбарын хөгжлийг хурдасгах учиртай. Улс орны тогтвортой хөгжлийн үндсийг хангахад ч чухал ач холбогдолтой юм.