АН-ын дарга Лу.Гантөмөрөөс дараах тодруулгыг авлаа.

            -С.Баярцогт, Х.Тэмүүжин нарт яагаад нэг квот өгсөн юм бэ?

-Яс хаясан зүйл огт болоогүй. Сонгон шалгаруулах хорооноос С.Баярцогтын нэрийг дэвшүүлсэн. Үндэсний бодлогын хороо буюу гишүүд Х.Тэмүүжинг дэвшүүлэхээр шийдсэн. Энэ шийдвэрийн дагуу СЕХ-д бид материалаа хүргүүлсэн.

-Та бүхэн нэр дэвшүүлэхдээ ямар зарчим барьж ажилласан юм бэ?

-Хамгийн гол зарчим ялах. Ялахын тулд юу хийх ёстой вэ гэдгээ л бодох хэрэгтэй. Үнэндээ, залуучуудыг оруулахгүй бол АН хөгшин харагдаад байна. Дээр нь, үзэл санааны хувьд ирлэгдэж, өөрийгөө боловруулсан хүмүүсийг дэвшүүлсэн.

-СЕХ-оос АН-аас хоёр зөрүүтэй тогтоол ирсэн гэдгийг хэлсэн. Үүний дагуу таниас тайлбар авсан уу?

-Хуульч Д.Оросоо гэдэг нь миний бүрэн эрхэт төлөөлөгч. Тэгэхээр миний бүрэн эрхэт төлөөлөгч АН-ын даргын гарын үсэгтэй бичгийг СЕХ-д хүргэж өгсөн. С.Баярцогтын хүргэж өгсөн тогтоол нь хувь хүний гаргаж байгаа хүсэлт гэж ойлгох хэрэгтэй. 32 дугаар тогтоол нь миний гарын үсэгтэй жинхэнэ тогтоол мөн.

-АН-ын хэд хэдэн гишүүн намаасаа татгалзаж, нэр дэвшилтээс нэрээ татаж байгаагаа илэрхийлсэн. Албан ёсоор хэчнээн хүн намаас гараад байна вэ?

-Албан ёсоор намаас гарах хүсэлт гаргасан хүн байхгүй. Харин албан ёсоор нэр дэвшихээс татгалзсан ганц, хоёр өргөдөл бий. Хэн хэн гэдгийг цээжээр хэлэх боломжгүй байна. Сошиалд цацагдаад байсан З.Нарантуяа, Ц.Жадамбаа нар тойрогтоо нэр дэвших нь хэвээрээ. Материалыг нь бүрдүүлээд СЕХ-д хүргүүлчихсэн байгаа. АН мөнгөний эсрэг сонгуульд орж байна, МАН ямар их мөнгөтэй, чадалтай байна гэж санана вэ. Энэ их мөнгө, хүч, дарга нарын өөдөөс өрсөлдөх чадвартай хүмүүсээ л дэвшүүлж байгаа. АН-аас 240 хүн нэр дэвших хүсэлтээ гаргасан. Үлдсэн, дэвшиж чадаагүй 120 хүн өөрийгөө хазаарлаж, хойш татсан. Сэтгэл хөдлөлөөр шийдвэр гаргасан, мэдээлэл хийсэн хүмүүс бий. Гэхдээ тэр хүмүүсийг буруутгаагүй, үзэл бодлоо илэрхийлэх эрх чөлөө нь бий шүү дээ.

-Хэвлэлийн хурлаар Х.Баттулга гоё, С.Баярцогт муухай гэсэн агуулгатай зүйл ярилаа. Тэгэхээр Х.Баттулга гэдэг хүний нөлөө их байгаа юм биш үү?

-Тойрогт гарах чадалтай хүмүүсээ л дэвшүүлсэн. Намын гишүүд дэвшүүлэх хүмүүсээ өөрсдөө мэдсэн. Түүнээс биш, бид намын гишүүдээ ялгаварлаагүй. Нийгэмд Х.Баттулга дарга нэр хүндтэй байгаа. Сонгуулиар энэ хүний сайн, мууг дэнсэлнэ. АН энэ удаагийн сонгуульд дандаа шинэ, шударга, залуу улстөрчдийгөө дэвшүүлсэн.

-С.Баярцогтыг АН-ын Тэргүүн дэд даргаас чөлөөлөх үү?

-С.Баярцогт дарга тойрогт очвол ялна. Гэтэл өөрөө тойрогт нэр дэвшихгүй гэсэн. Түүнээс биш, С.Баярцогтыг хасаад байгаа юм байхгүй. Хувь хүн нь өөрөө л ийм шийдвэр гаргасан. Штабын ажлаа хийнэ байх.

-Нэр цэвэр гишүүдийг сонгуульд дэвшүүлнэ гэсэн шүү дээ. Гэтэл “Нүүрсний хулгай”-н хэрэгт холбогдсон А.Адъяасүрэн гишүүнээс эхлээд хүмүүс дэвшиж байна. Үүн дээр тайлбар өгнө үү?

-АТГ-аас хэн, хэн хэрэгт холбогдсон бэ гэдэг тодорхойлтыг гаргаж өгсөн. Манай нам сүүлийн найман жил төрийн хэрэгт холбогдоогүй. А.Адъяасүрэн гишүүн ямар ч авлига авах боломжгүй. Тийм албан тушаал дээр томилогдож ажиллаагүй.