Казахстан Улсын Астана хотод насанд хүрэгчдийн чөлөөт бөхийн “Астана-2026” дэлхийн аварга шалгаруулах тэмцээн  үргэлжилж байна. Эрэгтэйчүүдийн 57 дахь, эмэгтэйчүүдийн 38 дахь удаагийн  ДАШТ аравдугаар сарын 27-ноос арваннэгдүгээр сарын 1-ний өдрүүдэд зохион байгуулагдаж өндөрлөх билээ.  Өчигдөр ДАШТ-ий хоёр өдөр эмэгтэйчүүдийн 53, 62, 68, 72 кг-ын жингийн хэсгийн болон хагас шигшээгийн барилдаан, 50, 57, 65, 76 кг-ын жингийн медалийн төлөөх шигшээ байрилдаан боллоо.   ОУХМ Батхуягийн Хулан 57 кг-д,  ОУХМ Түвшинжаргалын Энхжин 65 кг-д,  , ОУХМ Энх-Амарын Даваанасан 76 кг-ын жинд тус тус хүрэл медалийн төлөө барилдлаа. Харин ОУХМ Энхсайханы Дэлгэрмаа 68 кг-ын жингийн хагас шигшээ барилдаанд хожигдол хүлээж өнөөдөр хүрэл медалийн төлөө барилдахаар болов

Э.ДАВААНАСАН ДЭЛХИЙН ХОШОЙ МЕДАЛЬТАН БОЛЛОО

“Астана-2026” чөлөөт бөхийн ДАШТ-ий эмэгтэйчүүдийн 76 кг-ын жинд өрсөлдсөн “Алдар” спорт хороо, Үндэсний шигшээ багийн тамирчин, ОУХМ Э.Даваанасан финалын барилдаанд Киргизстаны Айпери Медет Кизиг 4:1-ээр ялж, дэлхийн аваргын хүрэл медаль хүртлээ. Э.Даваанасан ийнхүү ДАШТ-ий мөнгө, хүрэл медалийн эзэн болж байна.  Тэрбээр “Белград-2023” ДАШТ-ий 72 кг-ын жинд мөнгөн медаль хүртэж байсан юм. Ийнхүү Э.Даваанасан ДАШТ-ээс хоёр өөр жинд медаль хүртлээ.

Э.ДЭЛГЭРМАА ДЭЛХИЙН АВАРГЫН  ХҮРЭЛ МЕДАЛИЙН ТӨЛӨӨ ӨРСӨЛДӨНӨ

"Астана-2026” чөлөөт бөхийн ДАШТ-ий эмэгтэйчүүдийн 68 кг-ын хагас шигшээд ОУХМ Э.Дэлгэрмаа, Киргизстаны Меерим Жуманазарова нар хүч сорив.  Тус  барилдаанд  дэлхийн аварга, олимпын наадмын хошой медальт Меерим Жуманазарова 5:1-ээр ялж, ДАШТ-ий шигшээ барилдаанд өрсөлдөхөөр боллоо. Харин Э.Дэлгэрмаагийн хувьд хүрэл медалийн төлөө  өнөөдөр үдшийн 21:00 цагаас дэвжээнд гарна. Тэрбээр  дэлхийн хошой медальтан  болохын төлөө өрсөлдөнө.

Т.ЭНХЖИН ДЭЛХИЙН АВАРГЫН V БАЙРТ ШАЛГАРЛАА

   "Астана-2026” чөлөөт бөхийн ДАШТ-ий эмэгтэйчүүдийн 65 кг-ын жинд Т.Энхжин, Японы Нана Икехата нар хүрэл медалийн төлөө хүч сорив. Тус  барилдаанд Нана Икэхата манай тамирчинг  9:0-ээр буулган авч, дэлхийн медальтан боллоо. Харин Т.Энхжингийн хувьд, ДАШТ-ийг тавдугаар байраар өндөрлүүлж байна.

Б.ХУЛАН ЭЦСИЙН МӨЧИД ЯЛАГДАЖ,  ДАШТ-ИЙН V БАЙРААР ӨНДӨРЛҮҮЛЛЭЭ

    "Астана-2026” чөлөөт бөхийн ДАШТ-ий эмэгтэйчүүдийн 57 кг-ын хүрэл медалийн төлөө ОУХМ Б.Хулан, Беларусийн Ирина Курачкина нар өрсөлдөв. Үзэгчдийг өндөлзүүлсэн, эцсийн мөчид 12:11-ээр шийдэгдсэн тус барилдааны ялагчаар Ирина Курачкина тодорсон юм. Энэ нь Беларусийн тамирчны дэлхийн аваргаас гардаж буй дөрөв дэх медаль боллоо.

,