Монголын залуучуудын холбооны Ерөнхийлөгч О.Гэрэлт-Од, “Монголын төмөр зам” ТӨХК-ийн төслийн хэлтсийн дарга Т.Сайнжаргал нар өнгөрсөн аравдугаар сарын 1-12-ны хооронд сэлэнгэчүүдтэй уулзаж, санал солилцжээ. Уулзалтын үеэр тэд МУГЖ М.Баярмагнай, МУГЖ Л.Баттулга нартай хамтран ажиллаж, тоглолт зохион байгуулсан аж. Гэвч тэдний хооронд үл цалин, хөлсний үл ойлголцол үүсчээ. Тодруулбал, МЗХ-ны Ерөнхийлөгч О.Гэрэлт-Од өөрийн цахим хуудастаа “Бид М.Баярмагнай гавьяатад 37 сая төгрөг, Л.Баттулга гавьяатад 28 сая төгрөг шилжүүлсэн. Гэвч М.Баярмагнай жүжигчин өөрийн цахим хуудастаа биднийг “худалч, хулгайч” хэмээн доромжилж, нэр хүндэд халдсан” гэх утагатай сэтгэгдэл оруулсан байв.

    Тэдний хооронд чухам юу болсон талаар МУГЖ М.Баярмагнайгаас тодрууллаа. Тэрбээр “Аглуу бид хоёр О.Гэрэлт-Од, Т.Сайнжаргал нарын хүсэлтээр Сэлэнгийн 17 сум, зургаан тосгонд нийт 21 тоглолт хийсэн. Тэр хугацаанд би дангаараа 400-500 дуу дуулсан. Гэвч тэд уулзалтын дараа төлбөрийнхөө 50 хувийг шилжүүлнэ гэсэн боловч шилжүүлээгүй, залилсан. Одоог хүртэл тэд гар утсаа авахгүй байгаа. Мөн надаас таван сая төгрөгийн эмнэлгийн тоног төхөөрөмж авсан түүнийхээ төлбөрийг өгөөгүй учраас цагдаад хандана гэж бодож байна” гэв.