Монголын сэтгүүлчдийн нэгдсэн эвлэлийн сэтгүүл зүйн салбарын оны шилдгийн шилдгийг тодруулах “Ган үзэг 2023” наадмын Шилдэг сэтгүүлээр “Оюунлаг медиа групп” ХХК-ийн дэргэдэх “Эргэлт” сэтгүүл тодорлоо.

Эргэлт сэтгүүл нь энэ удаагийн “Ган үзэг” наадмын Шилдэг хэвлэл мэдээллийн байгууллага номинацийн Шилдэг сэтгүүлийн төрөлд эрэн сурвалжлах цуврал бүтээл болон Монголчуудын амьдрал, Эргэлтийн зочин, Залуус, Монголын гэрэлт ирээдүй, Спорт  зэрэг даацтай, уншууртай сэтгүүл зүйн бүтээлүүдээрээ өрсөлдөж, “Ган үзэг” цом өргөлөө.

“Оюунлаг ирээдүйн төлөө” уриатай Эргэлт.мн мэдээллийн сайт нь “Эргэлт” сэтгүүлээ  хоёр жилийн өмнө өлгийдөж, уншигчдадаа хүргэж байлаа. Бид анхны дугаараа сэтгүүл зүйн нийтлэл, ярилцлага, хөрөг, тэмдэглэл, сурвалжилга тэргүүтэй 116 бүтээлийг цогцоор нь 342 хуудаст баринтаглаж, баримт, гэрэл зураг хавсаргаж, уншигч таны гарт хүргэж байсан билээ. Харин хоёр дахь дугаараа 449 хуудастайгаар, гурав дахь дугаараа 333 хуудастайгаар хэвлүүлж, уншигчдын гарт хүргээд байна.

     “Эргэлт” сэтгүүл нь “Улс төрийг уудлахуй”, “Эргэлт.мн мэдээллийн сайтын дэргэдэх Эрэн сурвалжлах нэгдэл”, “Редакцын томилолт”, “Зочид” “Соёл урлаг”, “Дэлхийд”, “Танин мэдэхүй”, “Спорт”, “Урлахуй”, “Монголын гэрэлт ирээдүй”, “Залуус” гэсэн 10 гаруй бүлгээс бүрдэж, уншигчдын унших дуртай сэтгүүлийн нэгээр зүй ёсоор шалгараад байна.

    Ташрамд дурдахад, Эргэлт.мн мэдээллийн сайт нь 2020 онд Монголын сэтгүүл зүйн шилдгийн шилдэгт олгодог “Балдорж” шагналт анхны редакцаар тодорсон бол 2021 онд Монголын сэтгүүлчдийн нэгдсэн эвлэлийн “Ган үзэг-2021” наадмаас Шилдэг мэдээллийн сайт шагнал хүртсэн амжилттайгаар “Оюунлаг ирээдүйг бүтээхийн төлөө” нийгмийг соён гэгээрүүлэх, танин мэдүүлэх үнэн бодит, тэнцвэртэй мэдээллээр уншигчдыг шуурхай хангах үүргээ нэр төртэйгөөр биелүүлэн ажиллаж байна.