Монгол Ардын Намын эсрэг түүн шиг зоригтой дуугарч, хамаг буруу булхайг нь хаалтгүй илчилсэн хүн хэн байсан юм бэ. Ганц дайчин ганцаардахгүй гэдэг шиг тэдний болохгүй бүтэхгүй зүйлд аль хэдийнэ гүйгээд оччихсон тэр л лайв хийж зогсоно. Өөрөө ч их ад үзэгдэнэ. Гэхдээ ухарч няцаагүй. Зоригтойхон камераа асааж, ноцтой мэдээг хатуухан хэлээд л “үзэлцэж” байсан. Дураараа дургиж, дунд чөмгөөрөө жиргэсэн эрхтэн дархтан, эрх ямбатнуудын авлига хээл хахуул, ард түмнийхээ баялагаас булааж, “идэж”, хор найруулж байгааг шуудхан хэлж, шударга ёсыг л нэхдэг байлаа. Хэлэхдээ тэр огт баримтгүйгээр хүн гүтгэх, муйхраар дайраагүй. Үнэн бодитоо зүйлийг л газар дээрээс нь, аль нэг даргын өрөөнд, үгүйдээ л мэдээлэлтэй нь ярьж, хатуухан сануулсан. Төрд шургалсан “хулгайч”, луйварчин, хууран мэхлэгчдийг зарлан дэлгэсэн олон ч жишээ бий.

Тухайлбал, “Д.Нямдорж оо төрд насаараа зайдалсан шүү, чи. Чамтай муудсан бүхэн нь шоронд орсон. Тагнуулын ерөнхий газрын дарга байсан Ж.Баатар генералыг хүртэл шоронд явуулсан. Зууны хулгайч Д.Сумъяабазар, түүний дүү Д.Дагвадорж нарын булхайг хэлье. Эд бол мянганы хулгайч нар суусан газраасаа шороо атгасан, женко хочит Х.Баттулга байна. Цөм хулгайчид” гээд л лайв хийж ард түмэнд хүргэж, толгой дараалан зарлаж байсан нь саяхан.

          Хэн өнөөдөр түүн шиг тэдний өмнөөс эрслэн дуугарч, бардамхан сөрж чадсан юм бэ. Ерөөсөө л энэ бүхнийг ил хэлж, эрх мэдэлтнүүдэд ад үзэгддэг нь Д.Мөнх-Эрдэнэ. Намынхаа олноор, хүчээр далайлгаж, ард түмнээс өнгөтэй өөдтэй, гэрэл гэгээтэй бүхнийг нь хулгайлж, ах, дүү, хамаатан саднаараа төрд “үүр засаж”, авлигаар баяжин хөлжсөн, балаг тарьж дуусаагүй МАН-ын өөдөөс хэн ч дуугарч чадахгүй “бүлтэлзэн” байхад Баянхонгор аймгийн шавилхан биетэй залуу том дуугарч, додигор хэлж, хамаг бүхнийг нь хуудуугүй илчилж, том намын эсрэг хатуухан үгээрээ ханцуй шамлан зогсож байлаа. Түүний үнэнийг ярьдаг лайвууд муухан мэдээлэлтэй, хэт нэг талыг барьсан нэвтрүүлгээс дээр баримттай, голыг нь олсон, газар дээрээс нь мэдээлсэн байдгийг хэн бүхэн л мэднэ. Хэний  ч өрөө рүү давхин орж, шууд асууж, ард түмний өмнө нүүрийг нь улалзуулдаг ч байлаа. Ганцхан сул тал нь тэр энэ бүхнийгээ илэрхийлэхдээ буруу, ёс зүйгүй илэрхийлдэг байж мэдэх юм.

          Гэхдээ тэдний тэр муухай байдалд, албан тушаалаа ашиглан ард түмний боломж бололцоог үгүй хийж, эд баялагаас нь хумсалж байдагт нь уурласан бачуурлаа л элдэв үгээр илэрхийлдэг байсан байх. Ард иргэдийнхээ төлөө ажиллана, амжиргааг нь сайжруулна, зөв, иргэдтэй ээлтэй хууль санаачилж, батлуулж, хэрэгжүүлэн ажиллана гэж суудалд нь суучихаад, өөрсдөдөө хөрөнгө хурааж, ар өврөөр нь ханцуйлж, “идэж”, төрөл санднаа тэтгэсэн сайхан дүртэй тэдний булхайг дамжуулж байгаа хэн инээж, эелдэгээр ярина гэж.  Д.Мөнх-Эрдэнийн тэр бүгдэд хандаж байгаа хариу үйлдэл л тийм болохоос жинхэнэ ёс зүйгүй, бүдүүлэг нь хэлээд, яриад байхад ичдэггүй улайм цаймдаа гарсан дарга нар. Гэлээ ч үнэн ямагт хойшилж, худлаа дүр эсгэгчид аврагдаж, үнэнийг нь хэлсэн, үйлдлийг нь илчилсэн нь торны цаана суудаг жишгээр Д.Мөнх-Эрдэнэ суулаа. Тэрбумаар нь хулгайлан идэж, “шуудайлсан” эрх мэдэлтнүүд харин тухтай сандалдаа сууж, дулаан хөнжилдөө унтсаар л. Д.Мөнх-Эрдэнийг

Монгол Улсын Эрүүгийн хуулийн тусгай ангийн:

22.1 дүгээр зүйлийн хоёр дах хэсэгт заасан нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан,

22.5 дугаар зүйлийн нэг дэх хэсэгт заасан өөртөө болон бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан бүлэглэж хахууль өгөх,

23.1 дүгээр зүйлийн нэг дэх хэсэгт заасан хууль сахиулагчийг албан үүргээ биелүүлэхтэй нь холбогдуулан хүч хэрэглэхээр заналхийлж эсэргүүцсэн,

13.14 дүгээр зүйлийн нэг дэх хэсэгт заасан хүний нэр төр, алдар хүнд, ажил хэргийн нэр хүндэд халдсан худал мэдээллийг тараасан гэмт хэргийг үйлдсэн гэм буруутайд тус бүр тооцож ял оноосон юм билээ.

             Ийм өчүүхэн, ийм өрөвдмөөр. “Хулгайчдаа, хахуульчдаа, луйварчдаа, “Та нар тэрбумаар нь идсэн биз дээ” гэж орилсоор байгаад тэр өөрөө хахууль өгсөн хэргээр хоригдчихсон. Хууль хяналтын байгууллага өнөөдөр шударга ажилладаг байсан бол тэр шоронд орохгүй л байх байсан. Үүнийг ард түмэн харж байгаа, мэдэж байгаа. Азаар харин тэр давж заалдаж нэг жил арван сараар хоригдох болсон. Д.Мөнх-Эрдэнэ ганцаараа гэж ухраагүй сайн зүтгэсэн, сайн ч илчилсэн. Ард түмэн үргэлж түүний талд байж, үнэнийг нь сонссоор л байх болно.