Газар хөдлөлтөд өртөж, гамшигт нэрвэгдсэн Турк Улсад онцгой байдлын байгууллагын 24, Зэвсэгт хүчний 11, хэвлэл мэдээллийн байгууллагын төлөөлөл, нийт 41 хүний бүрэлдэхүүнтэй эрэн хайх, аврах баг хоёрдугаар сард ажиллаж, үүрэг гүйцэтгээд ирсэн билээ. Тодруубал, манай улсын албан хаагчид БНТУ-ын Хатай мужийн Хатай хотод очиж ажилласан юм. Монгол Улсын эрэн хайх, аврах баг 10 хоногийн хугацаанд Хатай хотын 20 орчим цэгт ажиллаж нийт найман хүний амь насыг авран хамгаалж, 19 цогцсыг холбогдох байгууллагад, мөн 20.000 доллар болон үнэт эдлэлийг цагдаагийн байгууллага, ар гэрт нь хүлээлгэж өгч, эрэлч нохойн тусламжтайгаар 45 цогцсыг илрүүлсэн байдаг.

Аврах багийн эмнэлгийн бүлэг нийт 649 хүнд эмнэлгийн тусламж үйлчилгээ үзүүлж, гамшигт нэрвэгдсэн 115 хүний гар, хөл хугарсан, шоконд орж дотор эрхтний гэмтэл авсан байсныг эмчилсэн билээ.

Тэгвэл гамшгийн хүнд нөхцөлд ажиллаж, үүргээ амжилттай гүйцэтгэсэн аврагч, албан хаагчдад томилолтын зардлыг нь олгоогүй байгаа гэх мэдээлэл цахим сүлжээнд цацагдаад байна.

Бид энэ талаар ОБЕГ-ын дарга, хошууч генерал Г.Ариунбуянгаас тодрууллаа. Тэрбээр “Турк Улсад үүрэг гүийцэтгэсэн албан хаагчдын томилолтын зардлыг гүйцэт олгоогүй байгаа нь үнэн. Бид тооцооллоороо дотоод томилолтын мөнгийг олгосон байгаа. Харин гадаад томилолтын зөрүүг Засгийн газрын хуралдааны шийдвэрээр хэлэлцэж, олгоно. Засгийн газрын хуралдааны шийдвэр гарчихвал шууд олгоно. Аврагчдын гадаад, дотоодын томилолтын зардлын тариф гэж өөр үнэтэй байдаг. Дотоодын томилолт бол “Албан хаагч гамшгийн нөхцөлд ажиллахад нэг өдрийн цалинг гурав нугалж олгоно” гэж заасан байдаг. Үүний дагуу дотоодын томилолтын зардлыг бодож олгосон. Одоо зөвхөн зөрүүг нь олгоно гэсэн үг. Энэ долоо хоногт энэ асуудлыг Засгийн газрын хуралдаанаар оруулна. Төсөв хэлэлцэх учраас уг асуудлыг Засгийн газрын хуралдаанаар хэлэлцэх эсэхийг мэдэхгүй байна” гэлээ.