Өмнөговь аймгийн ИТХ-ын дарга Б.Бадраа, түүний хүү Б.Наранболд, эхнэр Б.Сайханжаргал, Ханбогд сумын Засаг дарга Х.Нэхийт болон тус сумын холбогдох албан тушаалтнууд Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан гэх мэдээлэл дуулиан тариад намдлаа. Монгол Улсын үндсэн хуульд заналхийлсэн, улс дамнасан газрын наймаачид гэгдэх Б.Бадраа, Х.Нэхийт нарыг нэг сарын өмнө хууль, хяналтын байгууллагаас сүр дуулиантайгаар шалгаж, эд хөрөнгийг нь хурааж, заримыг нь баривчилсан билээ. Харин одоо тус хэрэгт холбогдох хяналт, шалгалтын ажил ямар шатанд үргэлжилж байгааг нэхэн сурвалжилж байна.

      Өнгөрсөн арваннэгдүгээр сарын 31-нд Өмнөговь аймгийн ИТХ-ын дарга Бадамгаравын Бадраа, түүний хүү Б.Наранболд, Ханбогд сумын Засаг дарга Х.Нэхийт нарыг прокурорын зөвшөөрлөөр шалгаж гэр, болон албан өрөөнөөс нь эх үүсвэр тодорхойгүй их хэмжээний мөнгө, үнэт эдлэл хураан авсан юм. Тухайлбал, Б.Бадраагийн гэрээс 300 сая төгрөг, юань, үнэт эдлэл, галт зэвсэг, сум зэргийг хурааж авсан аж. Б.Бадрааг Хан-Уул дүүрэгт өндөр зэрэглэлийн олон тооны орон сууц, үл хөдлөх хөрөнгө, өндөр үнэтэй автомашинууд худалдан авч, мөрийтэй тоглож, хууль бусаар олсон мөнгийг хувиргаж, мөнгө угаах гэмт хэрэг үйлдсэн гэж хуулийн байгууллагаас урьдчилсан байдлаар тогтоогоод байсан. Үүнтэй холбоотойгоор түүний 2020 оны хөрөнгө орлогын мэдүүлгийг судалж үзэхэд, “38.400 сая төгрөгийн орлоготой,  хоёр тэрбум, 805 саяар үнэлэгдэх хоёр орон сууцтай, үйлчилгээний зориулалттай нэг оффистой, 38 хурдан удмын морьтой, 55 саяар үнэлэгдэх малтай, гурван төрлийн өмчлөх газартай, 20 сая төгрөгийн үнэт эдлэлтэй, 147 сая төгрөгийн хадгаламжтай, "Эрдэнэт хивс" ХК, "Эрдэнэс таван толгой" ХК, "Эрхэм нар" ХХК, "Говил" ХХК, "Түвшин наран" ХХК," Говийн долгион" ХХК-аас 142 сая төгрөгийн орлого олдог гэдгийг олон нийтэд ил болгосон. Харин 2013 оноос түүний автомашин, орон сууц, эзэмших газрын тоо хэмжээ, орлого хоёр дахин нэмэгдсэн байдаг. Мөн түүний хүү Б.Наранболдыг давхар шалгаж 461 дүгээр хорих ангид цагдан хорьсон. Учир нь, Б.Бадраа хүүгийнхээ нэр дээр  компаниудынхаа үйл ажиллагааг явуулдаг учир хам хэрэгт холбогдож, хуулийн хариуцлага хүлээх нь тодорхой болсон гэх урьдчилсан мэдээлэл бий.

     Харин Ханбогд сумын Засаг дарга Х.Нэхийт тухайн үед манай сайтын сэтгүүлчид мэдээлэл өгөхдөө “Гэр болон албан өрөөнд нэгжлэг хийж, хууль хяналтын байгууллагаас шалгаж байгаа нь үнэн. Манайх дэлгүүр ажиллуулдаг.  Гэр, дэлгүүрээс 13 сая төгрөг хураан авч, эх үүсвэр тодорхойлохоор аваад явсан. Дэлгүүртээ зарахаар авчирсан найман ширхэг мөнгөн аяга, үйлдвэрийн мөнгө аяга, гар хийцийн гурван ширхэг аягыг эх сурвалжийг батлахаар хураан авсан нь үнэн. Мөн албан ширээний нүдэнд байсан 860 мянган төгрөгийг авч явсан” болсон нөхцөл байдлынхаа талаар тайлбар өгч байсан юм.

     Улс дамнаж газрын наймаа эрхэлж, хууль бусаар мөнгө олдог, олсон мөнгөөрөө мөрийтэй тоглоом тоглож, мөнгө угаах гэмт хэрэгт давхар холбогдсон байж болзошгүй Б.Бадраа, Б.Наранболд, Х.Нэхийт нарийн хэрэг дуулианаас дуулианы хооронд дарагдаж, мартагдах нь. Тэдний гэрээс олдсон эх үүсвэр нь тодорхойгүй их хэмжээний мөнгө, үнэт эдлэлийн эх үүсвэрийг хэзээ, хэрхэн тодорхой болгох вэ.