Монгол, Хятад, Солонгос, Индонезийн нэгдсэн бизнес форум Улаанбаатар хотноо болж байна. Дэлхийн эдийн засаг, худалдаа, хөрөнгө оруулалтын орчин шинэ сорилт, боломжийн огтлолцол дээр тодорхойлогдож буй энэ үед улс орнууд харилцан ашигтай хамтын ажиллагаагаа бэхжүүлэх, нийлүүлэлтийн сүлжээний тогтвортой байдлыг хангах, бүс нутгийн эдийн засгийн уялдаа холбоог гүнзгийрүүлэхэд онцгой ач холбогдол өгч байгаа юм. 

    Энэ зорилтыг хэрэгжүүлэхэд хувийн хэвшлийн манлайлал, бизнес эрхлэгчдийн санаачилга, хөрөнгө оруулагчдын харилцан итгэлцэл шийдвэрлэх үүрэгтэй. Анх удаа энэхүү бүрэлдэхүүнээр зохион байгуулагдаж буй тус форум нь манай дөрвөн улсын эдийн засгийн хамтын ажиллагааны шинэ боломжийг нээх чухал индэр болж байна.

     Монгол Улс хөрш орнуудтайгаа харилцан ашигтай хамтын ажиллагаагаа өргөжүүлэхийн зэрэгцээ “гуравдагч хөрш”-ийн бодлогын хүрээнд бүс нутаг, олон улсын хамтын ажиллагаанд идэвхтэй оролцож, худалдаа, хөрөнгө оруулалт, эдийн засгийн интеграцийг дэмжих зорилтоо тууштай хэрэгжүүлж байна. Төр, засгийн түвшинд бий болсон улс төрийн итгэлцлийг бодит хөрөнгө оруулалт, үйлдвэрлэл, худалдаа, технологи дамжуулалт, хамтарсан төсөл хөтөлбөрөөр баяжуулах бид бүхний нийтлэг зорилт юм.

     Энэхүү арга хэмжээг зохион байгуулахад хувь нэмрээ оруулсан бүх байгууллага, бизнесийн салбарын төлөөлөгчдөд талархал илэрхийлье. Монгол, Хятад, Солонгос, Индонезийн найрсаг харилцаа, эдийн засаг, хөрөнгө оруулалт, бизнесийн хамтын ажиллагаа улам бүр бэхжин хөгжинө гэдэгт итгэлтэй байна.