• Өнөөдөр 2026-06-08

УГЛААШТАЙ ЭХ БА УГААДАС ТУУЧИЖ БУЙ ЭХЧҮҮДИЙН ӨМНӨ ХҮЛЭЭХ ХАРИУЦЛАГА АДИЛ БАЙХ ЁСТОЙ ШҮҮ, ЕРӨНХИЙ САЙД АА

2023-07-07,   1425

     Улаанбаатар улаанаараа эргэж, үндсэндээ живж байна. Борооны усанд гэхээсээ, баас, шээс, хог холилдсон угаадсанд живж байна. Улиастай, Сэлбэ гол эргээ хальж, далангаа сэтэлсэн. Энэ голуудын эрэг дагуух гэр хорооллын айлууд бүхэлдээ үерт автаж, модон жорлонгийнх нь 00 цаас тооноор нь орох нь холгүй хөвж байна. Амьдралын боломжтой айлууд нь аль хэдийн ачаалаад “дүрвэцгээсэн”. Хөөрхий, хүн бүл муутай, хотод хүлээж авах хамаатан садангүй, хүүхдүүдээ хөтөлсөн өрх толгойлсон эмэгтэйчүүд, хөгшид голдуу тортой хувцас, телевиз хоёртойгоо үлдчихсэн, хөрш хөршөө бараадасхийн далангийн оройд хоног төөрүүлцгээж байна. Орон сууцны хорооллынхон ч ялгаагүй, Сэлбэ, Дунд голын эрэг дагуу баригдсан орон сууцнуудын орц хонгил нь усаар дүүрч, оршин суугчид нь тог цахилгаангүй гэр гэртээ хөл хоригдсон. Хотын гудамж, талбайнууд ч ялгаагүй, шагай давсан шавар, шалбаагтай, “хоёр нутагтан” болох нь холгүй, усан дунд аж төрж байна, Улаанбаатарчууд. 
    Засгийн газар, Нийслэлийн удирдлагууд “Байгалийн давагдашгүй хүчин зүйл” гэж хариуцлагаас бултаж, бурууг байгальд нялзааж байгаа харагдана. Үнэн хэрэгтээ, ямбатан, яндартнуудын цувдаг сэтгэл, цуцашгүй шуналын зохиосонд ийнхүү ялгадсанд живж байна, ард түмэн. Өөрөөр бол, голын голидрол дунд орон сууц, оффисын газар олгосон үе үеийн хотын удирдлагууд, хэзээ нэг цагт үерт живэхийг нь мэдсээр байж барилга барьсан компаниуд, хүлээж авсан комиссынхон үүнд буруутай. Наад захын жишээ нь, сая Төв банкны Ерөнхийлөгчийн төрсөн дүүгийнх нь Сэлбийн эрэгт тулгаж барьсан хотхон хамгийн түрүүнд үерт автсан. Тус хотхоныг үерийн аюулаас гэтэлгэх гэж цэрэг, цагдаа, ТҮК, онцгойгийнхон гараа холготол элс шуудайллаа. Хоржоонтой гэмээр бас нэг жишээ нь, Шадар сайд, Улсын Онцгой комиссын дарга С.Амарсайханы ах, дүү нартайгаа нийлж Туул голын эрэгт тулгаж барьсан барилгууд хэд хэд бий. Хамгийн сүүлд Туул голын хэдэн мянган бургасыг хядаж хаус хороолол босгож байсныг нь нийгмээрээ шүүмжилж байж хүчээр шахуу зогсоосон. Их тэнгэрийн амны өөдөөс харсан тус хороолол өдгөө балгас болчихсон байж л байна. Өнөө маргаашгүй Туул гол үерлэхэд тус хороолол хамгийн түрүүнд живнэ. Дахиад жаахан үерлэхэд, урдхан талд нь УИХ-ын гишүүн Ц.Анандбазарын 160 хаус, гурван орон сууц бий. Товчхондоо, Улаанбаатар хот угаадсанд живж буйн буруутан нь бороо биш, бурхан ч биш, увайгүй шуналаа урдаа тавьж ирсэн улстөрчид, төр буруутай. 
       Улиастай, Сэлбэ, Дунд голын үер гамшиг болж хувирахтай зэрэгцэн Засгийн тэргүүн Л.Оюун-Эрдэнэ өчигдөр Шадар сайд С.Амарсайхан, Барилга, хот байгуулалтын сайд Ц.Даваасүрэн хоёрыг дагуулан гарч ирэв. Буянгийн замаар хэсэгхэн алхаад, “Авлига” хорооллын хашааны дэргэд очиж харчихаад буцав. “Голын голдирол дунд газар олгосон албан тушаалтнуудыг АТГ-т өгч шалгуул, “Авлига” хорооллын шүүхийн материалуудыг надад өг” гэснээс өөр онцын асуудал ярьсангүй. Ард түмнээ гэсэн бол, үнэндээ үерт хэн хамгийн зутарч байгааг харъя гэсэн бол уг нь Улиастайн голын эрэгт л очих байв. Атал тэгсэнгүй, ард түмнээсээ уучлал ч гуйсангүй. Уг нь хүүхдүүдээ хүзүүн дээрээ суулгаад, хивс, хөргөгчөө үүрч, дүүрээд, үер гатлан дүрвэж байгаа гэр хорооллынхноо дэргэдээс нь харсан бол удирдаж буй улс нь гамшгийн хэмжээнд хүрснийг нь арай илүү ойлгох байв, Л.Оюун-Эрдэнэ. 
 
Эцэст нь, гол асуудал. Углааш, халадтай эхийг хоёрхон хоногтой нярайтай нь хамт хөхөө өвлийн хүйтэнд эмнэлгээс гаргасан асуудалд хариуцлага хүлээж хоёр жил хагасын өмнө У.Хүрэлсүх Засгийн газраа огцруулж байв. Атал одоо, хүүхдээ тэвэрсэн эхчүүд ташаагаа давсан угаадас туучин аврал эрж байна. Өөрөөр хэлбэл, өмнөх Засгийн газар нь углааштай эхийн өмнө хариуцлага хүлээж танхимаараа огцорсон, тэгвэл одоо угаадас дунд живэх шахаж байгаа эхчүүдийнхээ өмнө Засгийн газар ямар хариуцлага хүлээх юм бэ. Логикийн хувьд, Л.Оюун-Эрдэнэ Засгийн газраараа биш юм гэхэд төлөөлж хэн нэгэн нь хариуцлага хүлээхгүй юм бол У.Хүрэлсүхийн Засгийн газрын огцролт улс төрийн “шоу” байсан болж хувирна. Өөрөөр бол, углааштай эх ба угаадас туучиж буй эхчүүдийн өмнө хүлээх хариуцлага адил байх ёстой шүү, Ерөнхий сайд аа 
 

УГЛААШТАЙ ЭХ БА УГААДАС ТУУЧИЖ БУЙ ЭХЧҮҮДИЙН ӨМНӨ ХҮЛЭЭХ ХАРИУЦЛАГА АДИЛ БАЙХ ЁСТОЙ ШҮҮ, ЕРӨНХИЙ САЙД АА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4
  • Сэтгэгдэл үлдээсэн: 2023-07-07 14:49:03
    dsg: Danh, sum OGTSOR
  • Сэтгэгдэл үлдээсэн: 2023-07-07 14:25:35
    Ьдк: Болиочээ ОЭ,хажууд чинь байгаа Амарсайхн,Анандбузар нар чинь гол дээр байшин барисаншдээ,нэг л их гэмгүй улс,АТГ гэх шиг худлаа ярихаа боли,энэ улс орон чинь сүйрч гүйцлээ,бүгд улных,баахан гэмгүй хүн ХБ гэж хомрогллоо,жинхэнэ хулгайч нараа яаж чадахгүй бж,нүүрс хулгай яасан бэ??????
  • Сэтгэгдэл үлдээсэн: 2023-07-07 12:33:20
    Отгоо: Данхан толгой долларын тэрбумтан болсон тийм болохоор ард түмэн яах нь сонин биш
  • Сэтгэгдэл үлдээсэн: 2023-07-07 12:31:42
    N: Zuv l khelj. Sanal neg bna.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.