• Өнөөдөр 2026-06-08

УИХ 152 ГИШҮҮНТЭЙ БОЛОХ НЬ АРД ТҮМЭНД БИШ, МАН-Д АШИГТАЙ

2023-04-18,   1119

      Ирэх сонгуулийн дараа түшээд Төрийн ордны өрөөндөө хоёроороо сууцгаадаг болох нь. УИХ-ын гишүүдийн өрөө унадаг жийпнийх нь кабинаас нэг их томгүй, умгархан л даа. Хос хосоороо л багтана. Тиймдээ ч төрийн ордонд багтах тоогоор нь буюу түшээдийг хоёроор үржүүлж, 152 болгохоор тогтлоо. Хэрвээ ханайсан цэлгэр өрөөнүүдтэй сэн бол гишүүдийн тоог гурав үржихдээ ч сийхээргүй байх шиг...

 

     Хөгжлийн банкны хэргийн хэлэлцүүлэг, “нүүрсний хулгай”-н хэрэгт нэр холбогдогсдын дуулианы араас угсруулаад УИХ-ын гишүүний тоог 152 болгож, Үндсэн хуульд нэмэлт өөрчлөлт оруулах үндсэн зорилгоо ийнхүү шуудруулчихлаа, Ардын нам. Төсөл нь бэлэн болчихсон. Танилцуулж байна, хэлэлцүүлж байна гэж хэдэн өдөр бужигнуулаад, бөөнөөрөө кнопдоод баталчихна. Хоёр удаа олонх болсон нь багадаж, хоёроор үржигдэхээр төлөвлөсөн нь хэтийдсэн шунал гэлтэй. Гэхдээ тэд эл төлөвлөгөөгөө их л эвлэгхэнээр тайлбарлаж байна. УИХ-ын нэг гишүүн 25 мянган иргэнийг төрд төлөөлөх ёстой байтал одоо 45 мянган иргэнийг төлөөлж байна гэнэ. Төрд төлөөлөх ёстой иргэд нь хоёр дахин нэмэгдэж ажил, ачааллаа дийлэхээ больсон тул түшээдийн тоог хоёроор үржүүлж байгаа гэх юм. Ухаандаа, нэг гишүүнд ногдох хүний тоо хэтэрхий их байгаа учраас гишүүд хүн бүртэй уулзаж, хүслийг нь биелүүлж, санаа бодлыг нь сонсож, саарал ордонд уламжилж чадахгүй, улмаар түүндээ их л түүртэцгээж байгаа юм байх. Тэдний эл логикоор бол манай улсын хүн ам 20 сая хүрэхэд УИХ 800 гишүүнтэй болох нь л дээ. 
 
     Үнэндээ ард түмэн УИХ-ыг 152 гишүүнтэй болохоос айж байгаа. Ард түмэнд биш Ардын намд л ашигтай учраас айж байгаа. Арга ч үгүй юм. 2016, 2020 онд хоёр удаа ард түмэн Ардын намыг УИХ-д олонх болгож өгсөн. Бид УИХ-д олуулаа байвал улс орон хөгжинө гэж тэд ч ятгасан, ард түмэнд ч түүнд нь итгэсэн. Харамсалтай нь, өдгөө УИХ-ын 76 гишүүний 11 нь Хөгжлийн банкны болон Нүүрсний хулгайн хэргээр яллагдагчаар татагдаж, АТГ-ын хаалга сахиж суугаа. Тэднээс гурав нь гишүүний бүрэн эрхээсээ чөлөөлөгдөж, тойргийнх нь сонгогчид төрд төлөөлөлтэй болчихсон. Нэг нь бүр хил даваад, хаана очсон нь мэдэгдэхгүй зугтчихсан, хэзээ авчрах нь ч тодорхойгүй байна. Олон болгож өгсний хариуд тэд хамаг боломжийг хулгайлж, худалдаж, халаасалж, эцэст нь яллагдагч болчихоод “ямар ч буруу зүйл хийгээгүй” гэж гэмгүй хүний дүрд тоглоод сууцгааж байна. 
 
    Товчхондоо, ард түмэнд бид УИХ-ын 76 гишүүнээ авлига авахыг нь, албан тушаалаа амин хувьдаа ашиглахыг нь, хүчингийн хэрэг хийхийг нь, хамаг л өнгөтэй, өөдтэй гэсэн сан, банк болгоныг тонохыг нь хориглож, хазаарлаж, хариуцлага үүрүүлж чадахгүй байна. УИХ-ын 76 гишүүн хэлсэндээ хүрдэг, амласнаа биелүүлдэг, ажлаа хийдэг бол “Арай л цөөдөөд байна, тэд минь” гэж алга ташаад дэмжих сэн. Даанч, бид одоогоор 76-гаа дийлэхгүй байна. ЖДҮ-гээс зээл авч, жирийн иргэдийн боломжийг хулгайлахыг нь болиулж чадаагүй, хариуцлага тооцуулж ч чадаагүй. Одоо Хөгжлийн банкны хэрэгт шалгагдаж байгаа дөрвөн гишүүн, “нүүрсний хулгай”-н хэрэгт шалгагдаж байгаа долоон гишүүнд торгосон болоод тавиад явуулахыг ч үгүйсгэхгүй. 
 
     Хөгжлийн банк, нүүрс зэрэг бол нийтэд ил болсон захын жишээнүүд. Цаана нь нуугдсан, ах дүү, амраг садангаа албан тушаалд томилдог, хамаарал бүхий этгээдээрээ төсөл, тендер хамдаг, хайгуулын болон ашиглалтын лицензүүдийг хэн хүссэндээ зардаг, хэн нэгэн, хэсэг бүлгийнхэнд зориулж хууль “үйлдвэрлэснийхээ” хариуд ханцуй дотроо наймаалцаж, халаасаа түнтийлгэдэг олон түшээд бий. Ийм байхад 76 гишүүнийг 152 болгох нь ард түмэнд биш Ардын намд л ашигтай. 
     
     Эцэст нь, түмэн амлалт өгчихөөд том жийпэндээ суугаад тойргийнхоо “хил”-ээр гарахдаа л тэр бүхнээ мартчихдаг нь төрийн түшээдийг нэмээд яах юм. Хүүхдийн хүчирхийллийн эсрэг дуугардаггүй, хөгжлийн бэрхшээлтэй иргэдийг дэмждэггүй мөртлөө хувийн ашиг сонирхлын төлөө төв талбайд өлсөж чаддаг тийм төрийн түшээд олон байгаад яах юм. Саарал ордонд нэг орсон бол гарч ирдэггүй, сар шинийн баяр болохоор сая санасан аятай хэвийн боов, хэдэн ширхэг чихэр, уут гурил, өөрийнхөө зурагтай календар сэлтхэнээр аргалж, амиа хоохойлсоор дөрвөн жилийн элээдэг тийм элэггүй түшээд олон байгаад яах юм. Сонгууль болохоор тойргийнхноо сая санаж, сонгогчдын саналыг авахын тулд арга буюу халуун нүүрээрээ уулзахаараа хөгшидтэй нь хөөрөглөж, хүүхдийг нь эрхлүүлэн, халамцуу эрийн шүлс үсчүүлсэн шүүмжлэлийг чих тавин сонсож тал засдаг тийм түшээдийг нэмээд яах юм...

УИХ 152 ГИШҮҮНТЭЙ БОЛОХ НЬ АРД ТҮМЭНД БИШ, МАН-Д АШИГТАЙ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2023-04-18 16:42:25
    76 бага тоо биш: 3,5 сая иргэнтэй улсад 152 гишүүнтэй УИХ арай дэндэнэ. Шинээр төрсөн хүүдэд хүүхдийн мөнгө өгч чадахгүй байж 76 г 152 болгох хэрэг алга. ТӨСӨВ дийлэхгүй.
  • Сэтгэгдэл үлдээсэн: 2023-04-18 08:27:33
    Zochin: Odoo bgaa 76 -g chin zarimiikh n' neriig ch togtooj amjikhgyi bna. Uchir n' giigyylj gyaltaikh um khiikhgyi bolokhoor ter. Tegsen ted nariikhaa toog nemne ch gekh shig. Boliod uguurei. Yasan idej uuj khanadaggyi um.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.