76-г дийлэхгүй яая гэж байхад, юун 99

Ц. АМУНДРА:
Улс төр- Тэрслүү үг

2022-03-17, 899

УИХ-ын дарга Г.Занданшатар хаврын чуулганыг нээж үг хэлэхдээ, УИХ-ын гишүүдийн тоо цөөдөж байгааг онцолж, хавартаа багтааж хэдэн гишүүнээр бүл нэмэх хууль батлах хүсэлтэй байгаа хавчуулж хэлсэн. 2019 онд Үндсэн хуульд нэмэлт өөрчлөлт оруулж байхуйдаа УИХ-ын гишүүдийн тоог 99 болгох эл санаагаа цухалцуулж байв, МАН. Гэхдээ тэр үед тийм заалт оруулах нь хэтэрхий даварсан хэрэг болох байсан тулд эл санаархлаа зүтгүүлж төвдөлгүй хаясан. Харин одоо, хоёр сонгуульд угсаа ялчихсан, хэн ч өөрсдийг нь хориглож дийлэхгүйд бардаж, төрийн түшээдийн тоог 99 болгох хуучин санаархлаа сэдрээж, зүтгүүлэхээр зориглож байгаа ажээ. Олонх байгаагын хэргээ гаргаж, олноороо түрээд дэмжих биз.

Гэвч УИХ-ын гишүүдийн тоог 99 болгох нь Ардын намд л ашигтай болохоос биш ард түмэнд ашигтай байж чадах уу. Маш энгийнээр жишээ авч үзье л дээ. Малчин Дорж мах, сүүний аль алиных нь ашиг шимгүй 76 үхэртэй байлаа, яг адилхан 23 үхэр нэмж аваад 99 үхэртэй боллоо гэж бодоё. Хэн хожих вэ. Сүү нь сав дүүргэхгүй, мах нь магнаг болохгүй 76 үхэртэй байсан малчин Дорж үхрээ 99 болголоо гээд ер ашиг шим ахиу хүртэхгүй. Харин ч маллагаа, арчилгаа, малын өвс тэжээл гээд, малчин Дорж л бие, бэнчингээрээ хохирно. Нэмж авсан 23 үхэр нь харин хожих байх, дулаан өвөлжөөнд, өвс тэжээл нь бэлэн. Ажлаа хийдэггүй, хариуцлага хүлээдэггүй УИХ-ын 76 гишүүнийг 99 болгох нь агаар нэг бус уу.

Хамгийн гол нь ард түмэнд бид УИХ-ын 76 гишүүнээ авлига авахыг нь, албан тушаалаа амин хувьдаа ашиглахыг нь, хүчин хийхийг нь, хамаг л өнгөтэй, өөдтэй гэсэн сан, банк болгоныг тонохыг нь хориглож, хазаарлаж, хариуцлага үүрүүлж чадахгүй байна шүү дээ. УИХ-ын 76 гишүүн хэлсэндээ хүрдэг, амласнаа биелүүлдэг, ажлаа хийдэг бол “Арай л цөөдөөд байна, тэд минь” гэж алга ташаад дэмжих сэн. Даанч, бид одоогоор 76-гаа дийлэхгүй байна. ЖДҮ-гээс зээл авч, жирийн иргэдийн боломжийг хулгайлахыг нь болиулж чадаагүй, хариуцлага тооцуулж ч чадаагүй. Хөгжлийн банкнаас хэдэн арван тэрбумаар нь зээл авч, эрх мэдэлдээ эрдэн хэдэн жилээр хамаагүй төлөхгүй явж байгаад нь хариуцлага тооцуулах бүү хэл уучлал ч гуйлгуулж чадахгүй байна.

Өнгөрсөн хугацаанд ард түмний итгэлийг өвөртлөн төрийн ордонд заларсан төрийн түшээдээс хэд нь чих халууцуулж, хэд нь хэрэгт холбогдож, хэд нь төмөр торны цаана сууж, хэд нь хариуцлагаас зугтаж, ял завшаад явж байгаа билээ. Зөвхөн сүүлийн дөрвөн жилийн цөөхөн хэдэн жишээг авч үзье.

- 2019 онд ЖДҮХС-гаас албан тушаал, эрх мэдлээ ашиглан хувийнхаа болон хамаарал бүхий этгээдийнхээ компанид их хэмжээний хөнгөлөлттэй зээл авч, ард түмний боломжийг хулгайлсан хэрэгт УИХ-ын 49 гишүүн нэр холбогдож байв. Эл хэрэгт эхлээд УИХ-ын 16 гишүүн, гурван сайд, нэг дэд сайд нэр холбогдсон ч явцын дунд 49 болтлоо нэмэгдсэн нь нийгэмд дуулиан тарьсан юм. Тухайн үед АТГ-аас УИХ-ын нэр бүхий 15 гишүүнд хэрэг үүсгэн шалгасан боловч эцэст нь УИХ-ын гишүүн асан Б.Ундармаа, Д.Дамба-Очир, Г.Солтан, Б.Батзориг нар торгох болон хорих ялаар шийтгэгдсэн байдаг.

- 2020 оны эхээр төрийн өндөр албан тушаал хашиж явсан “эрхэм”-үүдийг төмөр торны цаана суулгах “аян” эхэлсэн. Улмаар мөн оны төгсгөл гэхэд С.Баяр, Ж.Эрдэнэбат, М.Энхсайхан, Д.Эрдэнэбат, С.Баярцогт, Н.Номтойбаяр, Б.Болор, Д.Дамба-Очир, Г.Солтан нарын гурван Ерөнхий сайд, таван салбарын сайд буюу УИХ-ын гишүүн асан 10 хүн авлига, албан тушаалын гэмт хэргээр төмөр торны цаана сууж байлаа. Тухайн үед тэд 3.6-10 жилийн хорих ялтай хоригдож байсан. Нэгэн цагт төрийн түшээ явсан эрхмүүд нэг дор хамгийн олноороо төмөр торны цаана сууж байсан нь чухам тэр үед байх. Төмөр торны цаана суусан тэднээс гадна хууль хяналтынхны хараанд байдаг, хааяа хаалгыг нь сахидаг, гадаад гараад явчихсан, гэмээ хүлээн зөвшөөрдөггүй, дээсэн дөрөөн дээр дэнжигнэж яваа УИХ-ын гишүүн асангууд ч хэд хэд бий.

- УИХ-ын гишүүд, гишүүн асангууд авлига, албан тушаалын гэмт хэрэгт холбогдох нь багадаад хэл хэдээрээ хүчин, бэлгийн хүчирхийллийн гэмт хэрэгт холбогдож явсан үе ч бий. Тухайлбал, хүчингийн болон бэлгийн хүчирхийлэл үйлдсэн хэрэгт УИХ-ын гишүүн асан Д.Гантулга, Д.Мурат, Д.Одбаяр нар нэр холбогдож байсан. УИХ-ын хамгийн залуу гишүүнээр нэрлэгдэж явсан Д.Гантулга гэхэд хоёр ч удаа хүчингийн хэрэгт холбогдож, эхний хэрэгтээ нэг жил дөрвөн сар, хоёр дахь хэрэгтээ найман сар, нийт хоёр жилийн хорих ял сонсож байв. Нэгэн цагт төрийн жолоо атгалцаж, хууль тогтоох дээд байгууллагын халуун сэнтийд заларч явсан тэд хожим нь холбогдсон хэргийнхээ гороор “Бандааш” Д.Гантулга, “Өгзөг” Д.Одбаяр хочтой болж, улс төрийн карьераа өндөрлүүлсэн. Сонгосон гишүүн нь Төрийн ордны индрээс “бандааш”-ны асуудлаар мэдэгдэл хийж зогсох сонгогч олонд гутамшигтай л санагддаг юм билээ. Бас хууль батлалцаж, хожим нь эцэг хууль маналцаж явсан хүн хилийн чанадад “өгзөг”-ний асуудлаар цоллуулж явах цочмоор бас ичмээр л байдаг юм билээ.

- Хамгийн сүүлд, энэ он гарсаар Хөгжлийн банкныг тоносон төрийн түшээдийн дуулиан дэгдэв. Одоогоор УИХ-ын гишүүн долоо, УИХ-ын гишүүн асан 10 хүн буюу нийт 17 төрийн түшээ эл дуулианд нэр холбогдоод байна. Тухайлбал, УИХ-ын гишүүн Х.Ганхуяг, Г.Дамдинням, Г.Амартүвшин, Ч.Ундрам, С.Бямбацогт, Б.Баттөмөр тэргүүтэй УИХ-ын гишүүд, М.Билэгт, А.Сүхбат, Б.Ундармаа, Н.Номтойбаяр тэргүүтэй УИХ-ын гишүүн асангууд Хөгжлийн банкныг тоносон төрийн түшээдийн жагсаалтыг хөтөлж явна. Тэднээс хэд нь хариуцлага хүлээхийг хэн ч хэлж мэдэхгүй, бараг л УИХ-ын гишүүний бүрэн эрх гэх бат хана хэрмээрээ хамгаалагдаад, намын харьяаллаараа хаацайлагдаад өнгөрөх биз.

Хөгжлийн банк, ЖДҮ зэрэг бол хамгийн наад захын, бэлэн жишээнүүд нь. Цаана нь нуугдсан, ах дүү, амраг садангаа албан тушаалд томилдог, хамаарал бүхий этгээдээрээ төсөл, тендер хамдаг, хайгуулын болон ашиглалтын лицензүүдийг хэн хүссэндээ зардаг, хэн нэгэн, хэсэг бүлгийнхэнд зориулж хууль “үйлдвэрлэснийхээ” хариуд ханцуй дотроо наймаалцаж, халаасаа түнтийлгэдэг гээд түмэн хэргүүд бий. Тэр болгоныг нь энд дурдъя гэвэл цаг ч, цаас ч эс хүрэлцэнэ. Ийм байхад 76 гишүүнийг 99 болго, 23-гаар нэм гэж хэн дэмжих юм.

Эцэст нь, түмэн амлалт өгчихөөд том жийпэндээ суугаад тойргийнхоо “хил”-ээр гарахдаа л тэр бүхнээ мартчихдаг нь төрийн түшээдийг нэмээд яах юм. Хүүхдийн хүчирхийллийн эсрэг дуугардаггүй, хөгжлийн бэрхшээлтэй иргэдийг дэмждэггүй мөртлөө хувийн ашиг сонирхлын төлөө төв талбайд өлсөж чаддаг тийм төрийн түшээд олон байгаад яах юм. Саарал ордонд нэг орсон бол гарч ирдэггүй, сар шинийн баяр болохоор сая санасан аятай хэвийн боов, хэдэн ширхэг чихэр, уут гурил, өөрийнхөө зурагтай календар сэлтхэнээр аргалж, амиа хоохойлсоор дөрвөн жилийн элээдэг тийм элэггүй түшээд олон байгаад яах юм. Сонгууль болохоор тойргийнхноо сая санаж, сонгогчдын саналыг авахын тулд арга буюу халуун нүүрээрээ уулзахаараа хөгшидтэй нь хөөрөглөж, хүүхдийг нь эрхлүүлэн, халамцуу эрийн шүлс үсчүүлсэн шүүмжлэлийг чих тавин сонсож тал засдаг тийм түшээдийг нэмээд яах юм...

76-г дийлэхгүй яая гэж байхад, юун 99

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2022-03-17 12:02:11

иргэн: ЗӨВЛӨЛТИЙН НЭРТ ЯРУУ НАЙРАГЧ В.МАЯКОВСКИЙ " НАМ ГЭЖ БОДООД ЛЕНИНЫГ БИД ДУРСДАГ" ГЭСЭН ШИГ УИХ-ЫН ГИШҮҮН ГЭХЭЭР ХУЛГАЙЧ, ЛУЙВАРЧИН ГЭЖ БОДДОГ ТУХАЙ МОНГОЛД ХҮН БҮР Л ЯРЬДАГ.

Шинэ мэдээ

Нийтлэлчид