Улаанбаатар хотыг метротой болгох “үлгэр”-ийг үе үеийн Хотын дарга нар ярьж ирсэн. 2008 онд Хотын дарга Г.Мөнхбаяр Солонгосын компаниар ТЭЗҮ хийлгэж, 2017 онд ашиглалтад оруулна гэж ам өчгөө ч өгч байлаа. Дараа нь 2012 онд Хотын дарга Э.Бат-Үүл Японы ЖАЙКА-гаар ТЭЗҮ хийлгэж, 2020 онд ашиглалтад оруулна гэж мөн л ам өчиг өгч байлаа. Бүр автобусны “Драгон” төвийн урд метроны “Драгон өртөө” гэх төмөр хөшөө ч босгож байв.
Харин тэдний дараагийн Хотын дарга нар метроны “үлгэр”-ийг үргэлжлүүлэхээс айсан. Тиймдээ ч метроны “үлгэр” Су.Батболдын үед тусгай замын автобус, С.Амарсайханы үед дүүжин тээвэр, Д.Сумъяабазарын үед баганан тулгуурт хөнгөн галт тэрэг болгож, хэдэнтээ зүсээ хувилгасан. Тэгээд ч бүтээгүй.
Харин Х.Нямбаатар Хотын дарга болсноосоо хойш “Улаанбаатар метро”-г 2028 онд ашиглалтад оруулна гэж ярьж яваа. Гэхдээ Г.Мөнхбаярын 2017 он, Э.Бат-Үүлийн 2020 он гэх метроны амлалтууд биелээгүй учраас Х.Нямбаатарын 2028 он гэх амлалтад ард түмэн төдийлөн итгэл муутай байгаа. Ямартай ч Х.Нямбаатар 181 тэрбум төгрөгөөр “метроны зөвлөх үйлчилгээ үзүүлэх” олон улсын тендер зарласан. Тус тендерт монголоос “Бодь интернэшнл” ХХК, “Зэд прожект” ХХК, “Монконсалт” ХХК, “Эм Си Пи Си Жи Ар” ХХК, “Ар Си Эс Си” ХХК гэх таван компани, Англи, Энэтхэг, Хятад, Япон, Солонгосоос тус бүр хоёр, Герман, Израйл, Орос, Франц, Швейцараас тус бүр нэг, нийт 20 компани өрсөлдөж буй. Тун удахгүй аль компани “Улаанбаатар метро”-ны төсөлд 181 тэрбум төгрөгийн зөвлөх үйлчилгээ үзүүлэхээр болсныг нийтэд зарлана.
Тэгвэл бид “Улаанбаатар метро”-ны зөвлөх үйлчилгээний 181 тэрбум төгрөгийн тендерт өрсөлдөж буй таван монгол компанийн эзэд болон үйл ажиллагааг нь танилцуулж байна.
“Бодь интернэшнл” ХХК-ийг “Голомт” банкны эзэн Данзандоржийн Баясгалан эзэмшдэг. Д.Баясгалан эхэндээ “Бодь интернэшнл” ХХК-аараа барилга барьдаг байсан бөгөөд төв талбайн хажууд байрлах “Бодь цамхаг”, Баруун дөрвөн замд байрлах “Голомт” хотхон, “Шинэ төгөл” болон “Санзай” гэх хаус хотхонууд, “Шангри-Ла”-гийн зүүн талд байрлах “Эмбасси резиденс” оффис, Үндэсний соёл амралтын хүрээлэнгийн “Хар сувд” цогцолбор зэргийг барьсан. Харин 2018 оноос эхлэн төрөөс төсөл, тендерүүдийг түүж эхэлсэн. Тодруулбал, 2018 онд “Сайжруулсан шахмал түлшний үйлдвэр”, 2020 онд Тавантолгой-Гашуунсухайт чиглэлийн 233 км төмөр зам, “Эрдэнэс тавантолгой” ХК-ийн “Тавантолгойн нүүрс ачих логистикийн төв”-ийн төсөл, “Богдхан төмөр зам”-ын төсөлд зэрэгт “Бодь интернэшнл” ХХК “ногоон гэрэл”-ээр шалгарсан байдаг.
Харин одоо Д.Баясгалан “Улаанбаатар метро”-ны төсөлд зөвлөх үйлчилгээ үзүүлэх 181 тэрбум төгрөгийн тендерт өрсөлдөж байгаагаас гадна “Цэцэнс майнинг энд энержи” ХХК-ийнхаа барьж буй 300МВт-ын “Бөөрөлжүүтийн цахилгаан станц”-аараа “Улаанбаатар метро”-г цахилгаанаар хангахаар тохироод буй.
“Зэд прожект” ХХК-ийг Дондовцэрэнгийн Дөлгөөн гэгч эзэмшдэг. Гэхдээ үүсгэн байгуулагч, эцсийн өмчлөгч буюу жинхэнэ эзэн нь түүний төрсөн ах Дондовцэрэн Занабазар. Д.Занабазар нь Өвөрхангай аймгийн Хархорин сумын уугуул, 2007 оноос ШУТИС-ийн Барилгын сургуулийн багш, 2011 оноос “Зэд прожект” ХХК-ийн Ерөнхий захирал, 2014 оноос “Криетид монголиа” ХХК-ийн Ерөнхий захирал, 2016 оноос Г.Мөнхбаярыг Барилга хот байгуулалтын сайд байх үед тус яамны Барилга, барилгын материалын үйлдвэрлэлийн бодлогын хэрэгжилтийг зохицуулах газрын даргаар томилогдон ажиллаж байсан. Харин 2018 оноос “Зэд прожект” ХХК-ийн зөвлөх инженер, “Эрэл групп”-ын Ерөнхий инженерээр ажиллаж байгаа ажээ.
“Зэд прожект” ХХК нь Хэнтий аймгийн Батширээт сумын 100 ортой дотуур байрны барилгын зураг төсөл, Дундговь аймгийн Усан бассейны цогцолборын барилгын зураг төсөл, Өвөрхангай аймгийн Баянгол сумын 50 ортой цэцэрлэгийн барилгын зураг төсөл, Дундговь аймгийн Адаацаг сумын спорт заалны барилгын зураг төсөл, Хэнтий аймгийн Батширээт сумын 10 ортой эмнэлгийн барилгын зураг төсөл, Дархан-Уул аймгийн Дархан сумын 960 хүүхдийн сургуулийн барилгын зураг төсөл, Дорнод аймгийн Сэргэлэн сумын 160 хүүхдийн сургуулийн барилгын зураг төсөл зохиогчоор тус тус ажиллаж байжээ.
Харин Д.Занабазарын “Криетив монголиа” ХХК нь СХД-ийн 40-р хорооны 640 хүүхдийн барилгын зураг төсөл, Төв цэвэрлэх байгууламжийн зураг төслийн туслан гүйцэтгэгч, Өвөрхангай аймгийн Арвайхээр сумын 320 хүүхдийн суудалтай сургуулийн барилгын өргөтгөлийн зураг төсөл, Төв талбайн урд талын “Хонхтой цэцэрлэгт хүрээлэн”-гийн тохижилтын ажлын зураг төсөлд тус тус гүйцэтгэгчээр ажиллаж байжээ.
Сонирхуулахад, Д.Занабазар нь Өвөрхангай аймгийн уугуул гэдгээрээ ЕТГ-ын дарга Я.Содбаатар, УИХ-ын гишүүн Г.Ганболд нартай, Дорнод аймгийн “Дорнын унага” галын тэргүүн гэдгээрээ ХХААХҮ-ийн сайд Х.Болорчулуун нартай тун ойр байдаг. Мөн Д.Занабазар 2018 оноос хойш УИХ-ын гишүүн асан Б.Эрдэнэбатын “Эрэл групп”-ийн Ерөнхий инженерээр ажиллаж ирснийг анхаарахгүй орхиж болохгүй юм.
“Монконсалт” ХХК-ийг Жанчивламдангийн Бямбадорж, Жанчивламдангийн Гэрэлчимэг гэх ах дүү хоёр эзэмшдэг. “Монконсалт” ХХК нь Богд уулын зам буюу Баянзүрхийн товчооноос Яармагийн гүүр хүртэлх 17.1 км автозамын зураг төсөл, Баянхошуу дэд төвийн зураг төсөл зэргийг тус тус боловсруулж байсан.
“Эм Си Пи Си Жи Ар” ХХК-ийг Жанарын Батсайхан эзэмшдэг. Ж.Батсайханы нь Хэнтий аймгийн Батширээт сумын уугуул, Гавьяат барилгачин цолтой. Харин аав С.Жанар нь Хэнтий аймгийн нисэх буудлын даргаар ажиллаж байсан, гавьяат нисгэгч цолтой. Ж.Батсайханы “Эм Си Пи Си Жи Ар” ХХК нь өмнө нь Дархан-Улаанбаатар чиглэлийн авто замын зураг төсөл, Дархан-Алтанбулаг чиглэлийн автозамын зураг төсөл, Улаанбаатар-Налайх чиглэлийн автозамын зураг төсөл, Өмнөдэлгэр-Биндэр чиглэлийн автозамын зураг төсөл, Ховд-Баян-Өлгий чиглэлийн автозамын зураг төсөл, Чойр-Мандалговь-Архайхээр чиглэлийн автозамын зураг төслийг тус тус гаргасан.
Сонирхуулахад, Ж.Батсайхан нь Дархан-Улаанбаатар чиглэлийн 204 км автозамын буруутнуудын нэгээр нэрлэгдэж, хэвлэлүүдийн нүүрэнд хэдэнтээ заларч байсан. Тодруулбал, Ж.Батсайхан “Эм Си Пи Си Жи Ар” ХХК-аараа Дархан-Улаанбаатар чиглэлийн 204 км авто замын зураг төслийг ямар ч тендергүйгээр, гэрээгүйгээр сайн дураараа гүйцэтгэж, улмаар ЗТХЯ-нд 3.1 тэрбум төгрөгөөр шахсан. Дараа нь дахиад ЗТХЯ-аас 898 сая төгрөг авч, Дархан-Улаанбаатар чиглэлийн автозамын зураг төсөлдөө нэмэлт өөрчлөлт оруулсан гэдэг.
“Ар Си Эс Си” ХХК-ийг одоо Баасанхүүгийн Оюунсүрэн гэх эмэгтэйн нэр дээр бүртгэлтэй байдаг бөгөөд Доржцэвээний Нямдаваа гэгч удирддаг. “Ар Си Эс Си” ХХК-ийг үүсгэн байгуулагч нь Б.Оюунсүрэнгийн аав, Д.Нямдаваагийн ах, Монгол Улсын Зөвлөх инженер, Гавьяат барилгачин Доржцэвээний Баасанхүү гэж байсан. Д.Баасанхүү нь Улаанбаатар хотын зам, барилга ашиглалтын трестын дарга, Зам, тээврийн хөгжлийн яамны Авто замын бодлого зохицуулалтын газрын даргаар тус тус ажиллаж байсан. “Ар Си Эс Си” ХХК нь Өндөрхаан-Улаанбаатар чиглэлийн 95.4 км автозамын зураг төсөл, 10-р хорооллын уулзвар, Дарь-Эхийн уулзвар, Тасганы овооны уулзвар, ТЭЦ-3-н уулзварын зураг төсөл, Улаанбаатар-Дархан чиглэлийн түр замын зураг төслийг тус тус гаргаж байжээ.
ТАНИЛЦ: МЕТРОНЫ ЗӨВЛӨХИЙН 181 ТЭРБУМ ТӨГРӨГИЙН ТЕНДЕРТ ӨРСӨЛДӨЖ БУЙ МОНГОЛ КОМПАНИУДЫН ЭЗЭД |
|