Сүхбаатар аймгийн удирдлагуудыг АТГ-аас шалгаж эхэлсэн талаар бид өмнө мэдээлсэн. Тодруулбал, Сүхбаатар аймгийн Засаг дарга М.Идэрбат, ИТХ-ын дарга Д.Хосбаяр, Газрын харилцаа, барилга, хот байгуулалтын газрын дарга Э.Төгөлдөр нарыг эрх мэдэл, албан тушаалын байдлаа урвуулан ашиглаж, бусдад давуу байдал олгосон, авлига авсан байж болзошгүй үндэслэлээр шалгаж байгаа.

     Бүр тодруулбал, Сүхбаатар аймгийн Засаг дарга нь Газрын харилцаа, барилга, хот байгуулалтын газрын дарга Э.Төгөлдөртэй хамтарч, нэр бүхий УИХ-ын гишүүний үеэл дүүгийн эзэмшлийн буюу Баруун-Урт сумын гуравдугаар багийн байрлалтай, 6700 метр кв, мөн 1359 м кв хэмжээтэй хоёр байрлалын газрын зориулалтыг өөрчилсөн. Ингэхдээ Газрын тухай хууль, Газар эзэмших, ашиглах эрхийн гэрчилгээ олгох журмыг зөрчсөн. Бусдад давуу байдал олгосон байж болзошгүй нөхцөл байдал тогтоогдож, хууль хяналтын байгууллагаас шалгаж байгаа юм.

      Бид энэ талаар Сүхбаатар аймгийн Газрын харилцаа, барилга, хот байгуулалтын газрын дарга Э.Төгөлдөрөөс тодруулахад “Хэвлэл мэдээллийн хэрэгсэлд мэдээлэл өгөх үүрэг байхгүй. Шалгагдаж байгаа хэрэг учраас мөрдөн шалгах ажиллагааны нууц задруулж болохгүй” гэлээ.