Хотын дарга Х.Нямбаатар ноцтой мэдээлэл хийлээ. Тэрбээр 2009-2023 оныг хүртэл Хотын даргаар ажиллаж байсан үе үеийн дарга нарыг АТГ-т автобусны хэргээр шалгуулах талаараа мэдэгдэв.

Тодруулбал, Хотын дарга Х.Нямбаатар “Улаанбаатар хотын нийтийн тээврийн шинэчлэх ажил 2009 оноос хойш хийгдсэн. 2009 онд БНСУ-ын Daewoo корпорацын 400 автобусаар парк шинэчлэлт хийсэн. Захиалагч байгууллагаар Зам тээврийн яам, худалдан авалтыг шууд гэрээний аргаар хийсэн. Өөрөөр хэлбэл, нээлттэй тендер, сонгон шалгаруулалт хийгээгүй байна. Улсын төсвийн хөрөнгөөр дээрх 400 автобусыг худалдаж авсан хэрнээ улсын болон нийслэлийн өмчид огт бүртгэлгүйгээр 10 аж ахуй нэгж байгууллагад шууд шилжүүлж, бүртгүүлсэн байна.

       Тухайлбал, “Автобус 1” 120, “Автобус 3” 120, “Цахилгаан тээвэр” 50, “Эрдэм транс” 30, “Автобус нэгдэл” 10, “Мяралзаа” найм, “Сутан буянт” 30, “Тэнүүн Огоо” 50, “Тэнүүн дэлгэр” 14, “Атибус” найм ширхэг гээд 400 автобусыг авч тухайн үеийн ханшийн зөрүүнээс нийт 35.6 тэрбум төгрөгийг автобусыг улсын төсөвт мөнгө төвлөрүүлэлгүйгээр шууд ААН байгууллагын нэр дээр өгсөн. Өнөөдрийг хүртэл хугацаанд дээр дурдсан ААН-үүд улсын төсвийн хөрөнгөөр худалдаж авсан автобусны эргэн төлөлтийг цөөн компани бага дүнгээр төлсөн. Бусад ААН төлөлт хийлгүйгээр тухайн үеийн ханшийн зөрүүгээр 30 гаруй тэрбум төгрөгийн хохирол бодитоор учирсан байна. Засгийн газраас 2010 онд тогтоол гаргасан. 2009 онд улсын төсвийн хөрөнгө оруулалтаар худалдан авсан 400 автобусыг эзэмшүүлж, ашиглуулах талаар ААН байгууллагуудтай байгуулсан гэрээг Үндэсний аудитын газраас өгсөн шаардлагын дагуу дахин шинэчилж байгуулахыг тухайн үеийн нийслэлийн Засаг даргад  даалгасан байна. Автобус авсан ААН байгууллагаас төлбөрийг нь буцаан хуримтлуулж, нийтийн тээврийн парк шинэчлэлийн сан бүрдүүлэх зорилгоор тусгай данс нээхийг тухайн үеийн Сангийн сайд С.Баярцогтод даалгасан. Харамсалтай нь, энэ тогтоолыг өнөөдрийг хүртэл Зам тээврийн яам, Төрийн өмчийн хороо, Нийслэлийн Засаг даргын тамгын газар, Сангийн яам хэрэгжүүлээгүй. Нийтийн тээврийн салбарт байгаа бүлэглэлийг шалгуулна. Өнгөрсөн арван жилд нийтийн тээврийн салбарт шинэчлэл хийх бүрэн боломж байсан. Үе үеийн хотын дарга, ЗТХЯ, Сангийн яам өнөөдрийг хүртэл автобусыг хуулийн дагуу худалдаж авч байсан эсэхийг шалгуулах шаардлагатай” гэсэн юм.

Тэгвэл Х.Нямбаатарын АТГ-т шалгуулах Хотын дарга нарыг танилцуулж байна.

-Г.Мөнхбаяр- \2008-2012\

- Э.Бат-Үүл \2012-2016\

-Су.Батболд \2016-2018\

-Нийслэлийн ИТХ-ын дарга Ж.Батбаясгалан \2018-2019\

-УИХ-ын гишүүн С.Амарсайхан \2019-2020\

-Нийслэлийн МАН-ын дарга Д.Сумъяабазар \2021-2023\ нарыг АТГ-аас автобусны хэргээр шалгаж эхлэх нь. Гэхдээ энэ нь зөвхөн “цавчаа” ногоон автобус биш 2009 оноос эхлэлтэй 400 автобусны хэрэг гэдгийг сануулах нь зүйтэй болов уу.