“Эрдэнэс таван толгой” ХК-д зургаан сарын хугацаатай онцгой дэглэм тогтоох шийдвэр гаргасан. Тодруулбал, Засгийн газрын хуралдаанаар уг шийдвэрийг гаргаж, тус компанийг төр хариуцаж байгаагааа мэдэгдсэн билээ. Мөн  “Эрдэнэс таван толгой” ХК-ийн онцгой бүрэн эрхэт төлөөлөгчөөр Сангийн яамны ТНБД Ж.Ганбатыг томилсон юм.

Тэгвэл  “Эрдэнэс таван толгой” ХК-ийн байранд АТГ-аас нэгжлэг хийжээ. Тодруулбал, АТГ-ын мөрдөгчид өчигдөр тус компанийн гүйцэтгэх захирал Б.Ганхуяг, Худалдан авалтын хэлтсийн дарга Б.Отгонжаргал нарын албан өрөө болон гэрт нь нэгжлэг хийжээ.

        Эх сурвалжийн мэдээлснээр “2021 оны есдүгээр сард  “Эрдэнэс таван толгой” ХК-ийн Худалдан авалтын хэлтсийн дарга Б.Отгонжаргал томилогдсон байдаг. Түүнийг эрх мэдэл, албан тушаалын байдлаа урвуулан ашиглаж, үндэслэлгүйгээр хөрөнгөжсөн байж болзошгүй хэмээн хууль хяналтын байгууллагаас шалгаж байгаа юм билээ” гэв.

Тэгвэл “Эрдэнэс таван толгой” ХК-ийн Худалдан авалтын хэлтсийн дарга Б.Отгонжаргалын хамаарал бүхий этгээдийн гэрээс их хэмжээний валют хураан авч, автомашиныг нь битүүмжилжээ.

Бид энэ талаар АТГ-ын Олон нийттэй харилцах хэлтсийн мэргэжилтэн Н.Тэмүүлэнгээс тодруулахад “Энэ талаар бид албан ёсны мэдээлэл өгөх боломжгүй байна. Прокуророос албан ёсны мэдээлэл ирээгүй байна. Олон нийтэд мэдээлэл өгөх зөвшөөрөл өгөөгүй байна гэсэн үг” гэлээ.