Хууль зүй дотоод хэргийн сайд Х.Нямбаатар 5Ш ажиллагааны талаар мэдээлэл өглөө. Энэ үеэр Х.Нямбаатар сэтгүүлчдийн асуултад хариуллаа. Тэрбээр “Г.Ган-Очирын талаар хэлэх үг олдохгүй байна. Франц Улсын хууль сахиулах байгууллагад иргэд нь хүртэл нөлөөлөх боломжгүй эрх зүйт төртэй. Тиймээс улс төржсөн мэдээлэл хийж байгаа байх. Дашрамд дурдахад, Г.Ган-Очир эзэнтэй айл шатаах гэмт хэрэг үйлдэж, Монголоос оргон зайлсан. Хүнийг санаатай хөнөөх гэмт хэрэг үйлдсэн хэрэгтэй учир ирж шалгагдах ёстой. Өөр олон үйлдэлтэй. Хил зөрчиж, Европын холбоонд очсон. Хоёрдугаарт, тэнд байсан монголчуудын шинэ жилийн үдэшлэгийн үеэр гэр бүлийн хүнээ зодож, хүчирхийлэл үйлдсэн асуудлаар Францын хуулийн байгууллага хариуцлага хүлээлгэсэн. Гадаад харилцааны яамнаас өгсөн мэдээллээр арванхоёрдугаар сард суллагдах юм билээ. Түүнээс түүний хэзээ суллагдах эсэх талаар би мэдэхгүй, оролцох боломжгүй. Түүний газар гишгэж, гал үлээх хоёроос бусад нь бүгд худал” гэлээ.