Жил бүр гуравдугаар сарын 15-ны өдрийг Дэлхийн хэрэглэгчийн өдөр болгон тэмдэглэдэг. Тэгвэл энэ жил цар тахлын нөлөө хэрэглэгчид хэрхэн нөлөөлж байгаа гэх сэдвийн хүрээнд тэмдэглэн өнгөрүүлжээ. Энэ талаар бид ШӨХТГ-ын дарга Б.Бат-Эрдэнээс тодрууллаа.

Тэрбээр “Манай байгууллага Дэлхийн хэрэглэгчдийн өдрөөр жил бүр тодорхой асуудал хөндөж үйл ажиллагаа зохион байгуулдаг. Өнгөрсөн жилийн хувьд “Хүүхэд хэрэглэгчийн асуудал”-ыг хөндөж байсан. Энэ жилийн хувьд “Ковид-19” буюу цар тахалтай холбогдуулан хил дамнасан худалдааны бизнесийн асуудлыг хөндөж хэлэлцүүлсэн. Хэлэлцүүлгээс харахад цахим худалдаа дэлхий нийтэд тулгамдаж буй асуудлын нэг болсон байна. Цахим худалдааны луйвар бүх оронд гарч байна. Үүн дээр бүс нутаг болон олон улсын хэрэглэгчийн байгууллага хамтран ажиллах зайлшгүй шаардлага гарч байна.

Мөн цар тахлын үед Засгийн газраас хэрэгжүүлж буй үйл ажиллагааны цар хүрээ болон аргачлал нь оновчтой байна уу гэдэг дээр бид НҮБ болон бусад 10 орны хүрээнд хэлэлцсэн. Манай Монгол улсын Засгийн газраас хэрэгжүүлж буй үйл ажиллагаа бусад орнуудтай тэр дундаа Ази, Америк, Европ зэрэг улсуудтай харьцуулахад жишиг сайн байна.