Цахим сүлжээнд “CU” сүлжээ дэлгүүрийн гүзээний салатнаас жоом гарсан тухай мэдээлэл түгж байна. Уг мэдээлэлтэй холбоотойгоор “CU” сүлжээ дэлгүүрт гүзээний салат болон бусад хоол үйлдвэрлэж, нийлүүлдэг “Гүн Сарьд” ХХК-ийн захирал Б.Чадраатай холбогдож, тодрууллаа.

Тэрбээр “Манай бүтээгдэхүүнээс жоом нь гарсан нь үнэн. Тус мэдээллийг түгээсэн эмэгтэйтэй манайхаас холбогдож, уучлалт гуйсан. Гэтэл хоолноос жоом гарсан зургийг дарсан эмэгтэй манай байгууллагаас их хэмжээний нөхөн төлбөр шаардаад байгаа. Залуу компани, ажиллах хүчний хувьд эмэгтэйн нэхсэн нөхөн төлбөрийг төлөх боломжгүй нөхцөл байдал үүсээд байна.

                       Манай “Гүн Сарьд” ХХК 2020 оноос хойш үйл ажиллагаа явуулж эхэлсэн. Бүтээгдэхүүнээ эрүүл ахуйн лабораториор баталгаажсан хугацааны дагуу буюу бүтээгдэхүүн бэлэн болсноос хойш 48 цаг хадгалж, дэлгүүрийн лангуун дээр 36 цаг байлгаад, борлуулагдаагүй бүтээгдэхүүнээ устгадаг. Мөн манай эрүүл ахуй, ариун цэврийн шаардлага хангасан цэвэрлэгээтэй байгууллагатай хамтарч ажилладаг. Яагаад манай бүтээгдэхүүнээс жоом гарсан, жоом хаанаас, хэрхэн хоолонд орсон талаар зохих байгууллагаас шалгалт хийж байгаа” гэв.