Завхан аймгийн Эрдэнэхайрхан сумын нутагт тарвага олноороо үхэж байгаа тухай мэдээлэл цахим сүлжээнд тархаад байна. Албан бус эх сурвалжийн мэдээллээр үхсэн тарвагын сэгт шинжилгээ хийхэд тарваган тахал байж болзошгүй нян илрээд байгаа гэнэ. Бид үүнтэй холбоотойгоор Эрдэнэхайрхан сумын Засаг дарга А.Балжиртай холбогдож тодрууллаа.

                      Тэрбээр “Манай сумаас олдсон тарваганы сэгээс шинжилгээ авахад тахал байж болзошгүй хоруу чанар өндөр нян илэрсэн. Гэхдээ Эрдэнэхайрхан суманд тарвага олноороо үхээд байгаа юм алга. Манай сум тийм ч их тарвагатай газар биш. Үхээд, хээр сэг нь үлдсэн ганц, нэг тарваганаас л шинжилгээ авсан. Ер нь малын тарга тэвээрэг муу орсон жил тарваган тахлын нян үүсдэг гэж дуулсан. Одоогоор тарваган тахал дэгдэж, хүнээс илрээгүй. Сумынхаа хэмжээнд тарваган тахлаас сэрэмжлүүлэх мэдээ хүргээд байж байна” гэв.

ТАРВАГАН ТАХЛААС УРЬДЧИЛАН СЭРГИЙЛЭХ ЗӨВЛӨМЖ

Тарваган тахал нь Yersinia pestis савханцраар үүсгэгддэг, мэрэгч амьтдаас хүнд халдварладаг байгалийн голомтот хурц халдварт өвчин юм. Уг тахлаар тарвага, зурам, үхэр огодой, үлийн болон гэрийн цагаан оготно, чичүүл зэрэг мэрэгчдээс гадна хүн өвчилдөг. Өвчин үүсгэгчийг мэрэгчдийн дунд бүүрэг дамжуулдаг. Өвчин үүсгэгч нь бүүрэгний ходоод, мэрэгчдийн нүх, ноохой, газрын хөрс, хүйтэн чийгтэй нөхцөлд олон сарын турш амьдрах чадвартай.

ТАРВАГА ТАХАЛ ХЭРХЭН ДАМЖДАГ ВЭ

Шууд хавьтлын замаар: Өвчилсөн амьтныг агнах, өвчих, арьс маханд хүрэлцэх явцад мөн өвчтөнийг асрах, сувилах, халдварлагдсан эд зүйлстэй хамгаалах өмсгөлгүй харьцах

Хоол боловсруулах замаар: Өвчилсөн тарваганы түүхий эд /мах, цөс, хүн мах, арьс гэх мэт/ болон дутуу боловсруулсан бүтээгдэхүүнийг хүнсэнд хэрэглэх

Агаар дуслын замаар: Нүх, ичээ ухах үед болон уушгины хэлбэрийн тахлаар өвчилсөн хүнээс

Дам халдварын замаар: Мэрэгч амьтдын бөөс бүүрэгт хазуулах тохиолдолд халдвар дамжина.

Илрэх шинж тэмдэг:

• Халдвар авснаас хойш шинж тэмдэг илрэх хугацаа нь хэдэн цагаас 6 хоног, дунджаар 2-3 хоног байна. Шинж тэмдэг нь гэнэт өндөр халуурах, толгой хүчтэй өвдөх, эргэх, дотор муухайрах, бөөлжих, тайван бус болж, нойргүйтэх гэх мэт ерөнхий хордлогын шинжүүд илрэхээс гадна арьс салстаар халдвар авсан үед нян орсон хэсэгт улайж толбо гүвдрүү үүсэн, цусархаг шүүдэс бүхий цэврүү болох мөн булчирхай томорч хүчтэй эмзэглэх, өвдөх
• Амьсгалын замаар халдвар авсан тохиолдолд гэнэт өндөр халуурч цээжээр өвдөх, амьсгаадах, цэртэй ханиалгах, цэр нь эхэн үедээ хөөсөрхөг, цусны судалтай гарч дараа нь цэвэр цусаар ханиалгах
• Хоол боловсруулах замаар халдвар авсан үед хэвлий хэсгээр хүчтэй өвдөлт өгч бөөлжих, суулгах, заримдаа цусаар бөөлжих, суулгах шинжүүд илэрнэ.

Урьдчилан сэргийлэлт:

• Сэжиг бүхий үхсэн мэрэгч амьтдын сэг зэмтэй тааралдвал мэргэжлийн байгууллагад мэдээлэх
• Халдвар авсан байж болзошгүй сэжигтэй хүн болон түүний эд материалтай холилдсон хүнийг тусгаарлах
• Сэжиг бүхий эд материал, өвчтөний хэрэглэж байсан зүйлсэд онош тодрохоос нааш хүрэлцэхгүй байх
• Тарвага агнах өвчих, мах, түүхий эдтэй харьцахыг цээрлэх

Тарваган тахал өвчний эсрэг вакцинд:

• Байгалийн голомтот халдварт өвчнийг судлах байгууллагад ажиллагсад
• Тарваган тахлын байгалийн идэвхтэй голомтот нутгийн эрүүл мэндийн байгууллагын ажилчид
• Тарваган тахлын байгалийн идэвхтэй голомтот нутагт амьдардаг иргэд, ялангуяа анчин, тууварчин, жолооч хүмүүс сэргийлэх  вакцинд хамрагдах шаардлагатай юм.
• Өвчний шинж тэмдэг илэрсэн тохиолдолд эмнэлгийн байгууллагад яаралтай хандах, мэдэгдэх гэхдээ халдвар авсан байж болзошгүй өвчтөнтэй ойр байсан хүнээр хэл хүргүүлэхээс татгалзах. Учир нь халдвар тархаж болзошгүй гэдгийг анхаараарай.