Цахим сүлжээнд “NoWar” хөдөлгөөнийг зохион байгуулж байгаа залуус ОХУ, Украины дайныг дэмжигчид гэх хүмүүсийг гэрэл зургийн үзэсгэлэндээ дэлгэж, АНУ-ын Элчин сайдад харуулсан гэх мэдээлэл түгсэн. Үүнтэй холбоотойгоор “NoWar” хөдөлгөөний зохион байгуулж буй “Урбан иргэдийн форум” ТББ-ын тэргүүн Ц.Уянгаас цөөн асуултад хариулт авлаа.

-“NoWar” хөдөлгөөний залуус гэрэл зургийн үзэсгэлэн гаргаж байгаа юм билээ. Үзэсгэлэнгийнхээ талаар манай уншигчдад товч мэдээлэл өгөхгүй юү?

                      -Бидний дайныг эсэргүүцсэн аян, хөдөлгөөн маань явсаар явсаар жагсаал ч болж жил гаруйн хугацаанд үргэлжилжээ. “NoWar” хөдөлгөөний залуус уг хөдөлгөөнийг хийж эхэлсэн жилийн ой дээрээ эхнийхээ гэрэл зургийн үзэсгэлэнг дэлгэсэн. Харин энэ удаад “Дайн ба энх” нэртэйгээр хоёр дахь үзэсгэлэнгээ дэлгэж байна. Үзэсгэлэнд “NoWar” хөдөлгөөний залуусын жил гаруйн хугацаанд тэмцсэн, иргэдэд дуу хоолойгоо хүргэж байсан болон ОХУ, Украины дайнтай холбоотой зураг багтсан.

-Цахим сүлжээнд “Дайн ба энх” үзэсгэлэн дээрх “Дайныг дэмжигчид” гэсэн хүмүүсийн зургийг дэлгэсэн тухай мэдээлэл түгсэн. “Дайныг дэмжигчид” гэх буланг хэрхэн гаргаж, хүмүүсийг нь ямар “шалгуур”-аар сонгосон юм бэ?

                      -Цөөн үгээр бол Украины талаар үг дуугардаггүй ч Оросыг сурталчилдаг хүмүүсийг “Дайныг дэмжигч” гэсэн. Дэлхийн олон орон ОХУ, Украины асуудал дээр байр сууриа илэрхийлж, хүчирхийлэл, дайныг дэмжихгүйгээ илэрхийлээд байгаа. Харин манай орон ОХУ, Украины асуудлаарх НҮБ-ын Ерөнхий Ассамблейн хоёр ч санал хураалтад түдгэлзсэн санал өгсөн. Өөрөөр, ОХУ-ын талд зогсож, дайныг дэмжсэн хэрэг болж байгаа юм. “Дайныг дэмжигчид” гэх хүмүүс ч Засгийн газартай ижил байр суурьтай байдаг шүү дээ.

-“Дайн ба энх” үзэсгэлэн дэлгэгдсэнээс хойш АНУ, Франц тэргүүтэй орны Элчин сайд ирж үзсэн талаар мэдээлсэн. Нууц биш бол, Элчин сайдууд танай гэрэл зургийн үзэсгэлэнгийн талаар ямар байр суурь илэрхийлж байна вэ?

                      -“No double standard” хөдөлгөөнийхөн “Дайн ба энх” гэрэл зургийн үзэсгэлэнгээ нээж байгаатай холбоотойгоор Монголд суух Элчин сайдуудад урилга явуулсан. Улмаар АНУ, Франц, Чех зэрэг орны Элчин сайд ирж, үзэсгэлэнг маань үзсэн. Элчин сайдууд үзэсгэлэн үзсэн сэтгэгдлээ манай санал, сэтгэгдлийн дэвтэр дээр бичиж үлдээсэн. Харин ямар байр суурь илэрхийлэхийг нь мэдэхгүй юм. Элчин сайдууд байр сууриа албан байдлаар илэрхийлэх байх.