Увс аймгийн Малчин суманд салхи 24 метр секунд хүрч, цас шуурчээ. Бид цаг үеийн нөхцөл байдалтай холбоотойгоор Малчин сумын Засаг дарга Б.Баасандоржтой холбогдож тодрууллаа.

Тэрбээр “Өчигдөр буюу гуравдугаар сарын 20-ны өдрийн 07:30 цагаас 20:00 цаг хүртэл салхи 24 метр секунд хүрч, цас шуурсан. Сумын төвд 60-70 см зузаан, хөдөө, хээрийн бүсэд 30-50 см зузаан цас орсон байна. Шуурганы улмаас сумын төвөөс аймгийн төв рүү явах болон сумынхаа гурван баг руу явах зам цасанд дарагдсан.

                    Цасан шуурганаар мал уруудаж, тасарсан тухай дуудлага хоёр айлаас ирсэн. Дуудлагын дагуу Засаг даргын Тамгын газрын 20 гаруй хүнтэй баг гурван машинтай хөдөлсөн. Гэсэн ч зам дарагдсаны улмаас замынхаа цасыг цэвэрлэж, нэг км замыг хоёр цаг гаруйн хугацаанд туулж байна” гэв.