Зэвсэгт хүчний Жанжин штабын нэр бүхий албан тушаалтан “Монничикон трейд” ХХК-тай хуурамч гэрээ байгуулж, баяжуулсан болон түүхий нүүрсний зөрүү болох 700 гаруй сая төгрөг шамшигдуулсан байж болзошгүй хэргийг шалгаж байгаа гэх мэдээллийн дагуу “Монничи кон трейд” ХХК-ийн захирал А.Бат-Эрдэнээс тодруулга, мэдээлэл авлаа.

Тэрбээр “Манай компани нь 20 жилийн түүхтэй бөгөөд ЗХЖШ, ШШГЕГ болон бусад хэрэглэгч байгууллагаас зарласан нүүрс нийлүүлэх нээлттэй тендерт оролцон шалгарч, амжилттай хэрэгжүүлж ирсэн туршлагатай юм. Манай компанийг Зэвсэгт хүчний Жанжин штабтай хуурамч гэрээ байгуулан цэргийн ангиудад баяжуулсан нүүрсний үнээр түүхий нүүрс нийлүүлж улсыг 700 сая төгрөгөөр хохироосон ташаа мэдээлэл хэвлэлд гарсан байна. Үүнийг залруулж үнэн бодит мэдээллийг өгье.

                    2018 онд Түүхий нүүрс хэрэглэхийг хориглох тухай заалт батлагдаж, нийслэл Улаанбаатар хотын бүсэд зөвхөн сайжруулсан болон баяжуулсан нүүрс хэрэглэх шийдвэр гарсан бөгөөд өнгөрөгч 2022 оноос хот тойрсон дүүрэг, хороодыг уг бүсд өргөтгөн хамруулснаас бид Зэвсэгт хүчний Жанжин штабтай баяжуулсан нүүрс нийлүүлэх гэрээ байгуулж аравдугаар сараас нийлүүлж эхэлсэн. Улмаар өнгөрсөн оны аравдугаарр сар, арваннэгдүгээр сарын эхээр цэргийн ангиудад бага хэмжээгээр баяжуулсан нүүрс нийлүүлж байсан. Гэвч тухайн цаг үеийн нөхцөл байдал, үйлдвэрлэлийн хүчин чадал хүрэлцэхгүйн улмаас баяжуулсан нүүрсний олдоц муудаж хомсдон цаашид нийлүүлэх боломжгүй болж ганцхан цэргийн ангиуд гэлтгүй бусад баяжуулсан нүүрс хэрэглэдэг байгууллага гал алдахад хүрсэн юм.

Үүнтэй холбоотойгоор Нийслэлийн Захирагчийн ажлын албанаас тодорхой арга хэмжээ зохион байгуулж Нийслэлийг тойрсон цэргийн ангиудад түр хугацаагаар түүхий нүүрс хэрэглэхийг зөвшөөрсний дагуу нийлүүлсэн болно. Одоогоор намайг болон манай компанийг ямар нэг хууль, хяналтын байгууллагаас шалгаагүй байна.

Манай компани нь жил бүр улсын төсөвт нэлээдгүй хэмжээний татварыг төвлөрүүлэн төлдөг, нийт ажилтнуудаа нийгмийн даатгалд бүрэн хамруулан, гэрээгээр хүлээсэн үүргээ биелүүлж, харилцагчдынхаа итгэлийг хүлээн амжилттай ажиллаж байгаа хамт олон билээ.

                    Бодит байдал ийм байхад баталгаагүй эх үүсвэрт тулгуурлан биднийг хуурамч гэрээ байгуулан улсад их хэмжээний хохирол учруулсан мэтээр үндэслэлгүй ташаа мэдээлэл нийтэлсэн нь олон нийтэд манай компаний талаар буруу ойлголт төрүүлж бизнесийн нэр хүндэд халдсан, цаашлаад байгууллагын үйл ажиллагаанд сөргөөр нөлөөлөх эрсдэлтэй нөхцөл байдал үүссэн тул ийнхүү тайлбар хийхэд хүрлээ.

Зэвсэгт хүчний Жанжин штабтай байгуулсан гэрээ, гэрээ дүгнэсэн акт, баримт бичиг, Нийслэлийн Захирагчийн ажлын албаны зөвшөөрөл зэрэг бусад холбогдох нотлох баримт байгаа бөгөөд шаардлагатай тохиолдолд үзүүлэхэд бэлэн”  гэсэн юм.