Хөл бөмбөгийн үндэсний дээд лигийн “Хангарьд” клуб өчигдөр буюу хоёрдугаар сарын 8-нд ирэх улиралд дээд лигт тоглох боломжгүй болж, клуб тарж байгаа талаар албан ёсны цахим хуудсаараа дамжуулан мэдэгдсэн. Тус клубын мэдэгдэлд,

“Эрхэм эрдэнэтчүүддээ, нийт хангарьдчууддаа, фанатууддаа энэ таагүй мэдээг дуулгаж байгаадаа туйлын их харамсалтай байна. Монголын дээд лигийн дөрвөн удаагийн аварга, холбооны цомын найман удаагийн аварга, багийн спортын түүхэнд анхны МҮОХ-ны “Бөртэ Чоно” дээд шагналын эзэн уулын баяжуулах “Эрдэнэт үйлдвэр”-ийн дэргэдэх “Хангарьд” клубын “Хангарьд” хөл бөмбөгийн баг 29 дахь дээд лигийн тэмцээнээ энэ хүргээд төгсгөж байна.

                                      Бид бүхнийг дэмждэг нийт эрдэнэтчүүддээ, 29 жил хамт байсан та бүхэнд үнэхээр их баярлалаа. Бид бүхэн энэхүү хугацаанд бүхэл бүтэн хотыг төлөөлдөг байснаас бус, хувь хүний эрх ашгийг хэзээ ч урьтал болгож байгаагүй билээ. Хөл бөмбөг мандтугай” гэсэн юм. Мөн уг мэдэгдлийг оруулаад хэдэн цагийн дараа устгасан байна. Албан бус эх сурвалжийн мэдээлснээр “Хангарьд” клуб санхүүгийн асуудлын улмаас тарах болсон гэнэ. Бид үүнтэй холбоотойгоор “Хангарьд” клубын ерөнхий дасгалжуулагч А.Эрдэнэбаяртай холбогдож тодрууллаа.

Тэрбээр “Хангарьд” клубыг тараах шийдвэр баталгаажаагүй. Санхүүгийн асуудлыг ярилцаж байгаа. Үүнээс илүү мэдээлэл өгөх боломжгүй” гэсэн юм.

“Хангарьд” клуб 29 жилийн түүхтэй Монголын хөл бөмбөгийн шилдэг багуудын нэг. Тус клуб үндэсний дээд лигийн аваргаар дөрвөн удаа, холбооны цомын эзнээр найман удаа тодорч, МҮОХ-ны оны шилдэг шагнал болох “Бөртэ Чоно” цомын эзэн болж байв.