Ж.ДЭЛГЭРСАЙХАН: Дэлхийн шинэ хүйтэн дайн, хуваагдлыг улам гүнзгийрүүлэх нь тодорхой

2022-02-26, 677

Украин болон ОХУ-ын хооронд үүсээд буй мөргөлдөөн манай улсын эдийн засагт ямар нөлөө үзүүлэх талаар Санхүү Эдийн Засгийн Их сургуулийн багш, эдийн засагч Ж.Дэлгэрсайханаас тодрууллаа.

Тэрбээр “Украйны асуудал нь Дэлхийн хэмжээний геополитик, эдийн засаг ерөнхийдөө тэргүүлэх байр сууриа бэхжүүлэх, бий болгох сонирхол бүхий талуудын өрсөлдөөнөөс үүдэлтэй гэж би хувьдаа үзэж байна. Тодруулбал Украин нь зөвхөн энэ өрсөлдөөний талбар төдий зүйл болж үүний үр дүнд ямартай ч энэ улс, иргэд ихээхэн хохирол амсах нөхцөл байдал үүслээ.

Энэ асуудлыг Монгол Улсад хэрхэн нөлөөлөхийг тодорхойлохын өмнө дэлхий нийтийн хувьд юу болохыг бид тооцохыг хичээх хэрэгтэй. Дэлхийн шинэ хүйтэн дайн, хуваагдлыг улам гүнзгийрүүлэх үр дагавартай нь тодорхой.

Иймд АНУ болон барууны орнуудыг дэмжих байр суурьтай талууд, ОХУ-г дэмжих байр суурьтай талуудын байр суурь улам ил болж тэр нь цаашдын улс төр, эдийн засгийн харилцаанд ихээхэн нөлөөтэй байх болов уу.

Монгол Улсад нөлөөлөх богино, дунд, урт хугацааны нөлөөллийг бодитой таамаглахыг хичээх хэрэгтэй.

Миний зүгээс энэ асуудалд хандах Монгол Улсын байр суурь, мэдэгдэл их чухал гэж үзэж байгаа тул энэ чиглэлд төрийн төвшинд нэгдсэн нэг бодлоготой, дурын нэгэн үндэслэл муутай байр суурь илэрхийлэхгүй байх тал дээр анхаарах нь чухал байх.

Монгол Улсын гадаад бодлогын баримт бичигт дурдагдсан үзэл баримтлал нь миний хувьд тодорхой зүйл гэж үзэж байгаа бөгөөд түүнийхээ дагуу нэгдмэл, зөв байр суурьтай байх хэрэгтэй юм.

Энэ асуудлаас болж дэлхийн эдийн засгийн нөхцөл байдалд ихээхэн өөрчлөлт орох нь тодорхой юм.

Одоогоор таваарын захад алт болон ОХУ-аас хамаарал өндөртэй байгалийн хий, нефтийн бүтээгдэхүүний үнэ өсөх, хөрөнгийн зах зээлийн гол индексүүд унах байдлаар илэрч

эхлээд байна.

Манай улсын хувьд богино хугацаанд газрын тосны үнэ, түүний хэлбэлзлээс шалтгаалсан шууд нөлөөлөл бий болж болзошгүй байдал харагдаж байна. Үүнээс бусад гадаад худалдааны дийлэнх нь өмнөд хөрштэй хамааралтай тул гэнэтийн цочрол нь харьцангуй бага байх магадлалтай.

ОХУ-ын зүгээс баруун руу чиглэсэн бус худалдаа эдийн засгийн түншлэлийг нэмэгдүүлэхийг зорих байдал нь Монгол Улсын хувьд хэрхэн нөлөөлөхийг тооцох хэрэгтэй.

Үйл явцын өрнөлөөс шалтгаалж АНУ болон барууны орнууд тэдгээрийг дэмжигчдийн хориг цар хүрээний хувьд тэлэх магадлалтай гэдгийг мөн тооцох ёстой.

Цаашид энэхүү асуудлын хамрах, хүрээ далайцаас шалтгаалж дэлхийн эдийн засгийн өсөлт, худалдааны эргэлтэд хэрхэн нөлөөлөх нь тодорхойлогдоно.

Урт хугацаандаа энэ дайн, дэлхийн эдийн засгийн хямрал нь дээр дурдсан хуваагдлыг гүнзгийрүүлэх тул бидний гадаад бодлогоос шалтгаалсан худалдаа, эдийн засгийн хамтын ажиллагааны харьцангуй шинэ орчин үүсэх боломжтой" гэв.

Ж.ДЭЛГЭРСАЙХАН: Дэлхийн шинэ хүйтэн дайн, хуваагдлыг улам гүнзгийрүүлэх нь тодорхой

Шинэ мэдээ

Нийтлэлчид