-УУШГИНЫ ХАТУУРАЛ ҮҮССЭН Л БОЛ ЭРГЭЭД УУШГИА БҮРЭН СЭРГЭЭХ БОЛОМЖГҮЙ-

        Коронавирусээр өвчлөөд эдгэрсэн хүн уушгины рентген зураг авахуулах нь сөрөг нөлөөтэй байж болзошгүй тухай мэдээлэл цахим сүлжээнд тарсан. Тэгвэл үүнтэй холбоотойгоор дүрс оношилгооны эмч Г.Ариунболдтой ярилцлаа.

-Коронавирусээр өвчлөөд эдгэрсэн иргэдийн хувьд уушгины рентген зураг авахуулах сөрөг эсэх тухай цахим сүлжээнд иргэд асуух боллоо. Та энэ талаар дэлгэрэнгүй мэдээлэл өгөхгүй юү?

      -Рентген нь цацраг туяа учир хүний биед хортой. Гэвч тухайн хүнд шууд ямар нэгэн сөрөг нөлөө үзүүлэхгүй. Нэг удаа цээжний рентген зураг авахуулахад 10 өдрийнхөө байгалиас авах туяаг авсантай тэнцүү гэж ойлгож болно. Гэхдээ хүн өвдөж байгаа л юм чинь оношилгоо хийлгэж цээжний рентген зураг авхуулж байж дотор эрхтэн гэмтсэн гэмтээгүй, үрэвссэн байна уу, үгүй юү гэдгийг харж ямар эмчилгээ хийлгэх шаардлагатай тухай мэдэж болно. Хэдий цацраг туяа хортой ч гэсэн өвчнийг оношилж байгаа учир авахуулах л хэрэгтэй. Ялангуяа “Ковид-19” цар тахлаар өвчилж, эдгэрсний дараа цээжээр хатгуулах зовиур их байгаа учир рентгенд харуулж хатгалгаа болсон байгаа эсэх,  уушги хэр хэмжээнд гэмтсэн байгааг мэдэж болно.

-Рентгенээр харахад коронавирусээр өвчилсөн хүний уушги хэрхэн өөрчлөгдсөн байдаг вэ. Жилд хэдэн удаа рентгенд харуулж болох вэ?

     -Коронавирус хүний уушгийг хамгийн их гэмтээдэг. Тэр тусмаа хүний уушгины хамгийн арын хэсэг буюу захын байрлалд ихээхэн нэвчдэс үүсгэж байгаа. Ковидоор хүнд өвчилсөн хүнд  хатгаа үүссэн байдаг.  Хатгааны үлдэгдэл нь сорвижоод хатуурсан юм шиг зураглалтай харагдана. Хэрэв эмч рентген зураг авахуулах шаардлагатай гэж оношилсон бол нэг жилийн хугацаанд хэдэн ч удаа харуулж болно.

-Коронавирусийн халдвар аваад эдгэрснээс хойш хэдэн хоногийн дараа рентгенд харуулж болох вэ?

-Тухайн хүний биеийн байдал болон эмчлэгч эмчээс шалтгаална. Гэхдээ эмчилгээ хийж дууссаны дараа ойролцоогоор 5-10 хоногийн дараа харуулбал зүгээр байна.  Мөн урьдчилан сэргийлэх үүднээс ч харуулж болно. Ер нь жилд гурван тун туяа зураг авахуулахад аюул багатай гэж үздэг юм.

-Коронавирусээр хөнгөн өвчилсөн иргэд рентген зураг авахуулахгүйгээр уушгиа эмчлэх арга байдаг уу?

-Хүн болгон рентгенээр харуулах албагүй шүү дээ. Гэхдээ цээжээр нь хатгуулах болон амьсгаадах, ханиалгах, тайван үед амьсгаа давчдаж байвал яаралтай нарийн мэргэжлийн эмчид хандаж үзүүлэх шаардлагатай. Учир нь тухайн иргэний биед уушгины хатуурал үүссэн байж болзошгүй. Харин хөнгөн өвдсөн хүмүүсийн хувьд агаарт сайн гарах, витамин өндөр тунгаар хийлгэх дархлаагаа сайн дэмжих шаардлагатай.

-Уушгины хатуурлын хүний биед үзүүлэх хор, хөнөөл хэр их байдаг вэ?

- "Ковид-19"-өөр өвчлөөд эдгэрсний дараа уушгины хатуурал үүссэн хүн амьсгалын дутагдалд ордог. Уушгины хатуурал нь уушгины эдийг эргэшгүй өөрчлөлтөд оруулж хийн солилцоо явуулах үйл ажиллагааг алдагдуулна.Тухайн хүн байнга амьсгааддаг, ачаалал даах чадвар муудах эрсдэлтэй юм. Түүнчлэн, уушгины хатуурал үүссэн бол эргээд бүрэн сэргээх боломжгүй.

Дараах зурагт коронавирусээр хөнгөн, хүндэвтэр, хүндээр өвчилсөн иргэдийн уушгины рентген зурагны харьцуулсан харьцуулалтыг хүргэж байна.

М.ЖАВХЛАН