-“УРЛАГИЙН ХОТ УЛААНБААТАР” АЯНААР ИРГЭДЭД УРЛАГИЙН ГОО ЗҮЙН МЭДРЭМЖ ӨГӨХ ЗОРИЛГОТОЙ-

          Нийслэлийн Соёл, урлагийн газраас Монголын Урчуудын эвлэлийн хорооны дэргэдэх “B contemporary” арт галларейн уран бүтээлчидтэй хамтран өнөөдрөөс эхлэн “Урлагийн хот Улаанбаатар" аяныг эхлүүлж байгаа. Аяны эхний өдөр МУУГЗ, МУЭ-ийн шагналт, Олон Улсын “Норд арт” фестивалийн Гран при шагналт, уран барималч А.Очирболдын найман метр урт, 5.3 метр өндөр, таван метр өргөн, гурван тонн жинтэй хатуу гангаар бүтээсэн “Ухамсар” хэмээх бүтээлийг Энхтайвны өргөн чөлөөний нийтийн эзэмшлийн талбайд байршуулжээ.

          Нийслэлийн Соёл, урлагийн газар, “B contemporary” арт галларейн уран бүтээлчид хамтран зохион байгуулж байгаа “Урлагийн хот Улаанбаатар” үзэсгэлэнгийн талаар Нийслэлийн соёл, урлагийн газрын дарга Ж.Дамдинцэрэнтэй цөөн хором ярилцлаа.

-Сайн байна уу. “Урлагийн хот Улаанбаатар" аяныг яагаад уран бүтээлч А.Очирболдын “Ухамсар” бүтээлээр эхлүүлэхээр болсон юм бэ?

          -Дэлхийн томоохон хотуудад уран бүтээлчдийнхээ бүтээлийг дэлгэж тавьдгаараа алдаршсан  жишиг байдаг. Нийслэлийн Соёл урлагийн газраас “Урлагийн хот Улаанбаатар” аяны хүрээнд уран бүтээлчидтэй хамтран “Ухамсар” бүтээлээр аянаа эхлүүлж байна. “Ухамсар” бол 192 орны уран бүтээлчдийн бүтээлээс шалгарч, НҮБ-ын байрны цэцэрлэгт хүрээлэнд байрлуулж байсан бүтээл. Гэхдээ “Урлагийн хот Улаанбаатар” учир зөвхөн нэг уран бүтээлчийн бүтээлийг дэлгэхгүй. Цаашид өөр уран бүтээлчийн бүтээл дэлгэгдэх болно. “Урлагийн хот Улаанбаатар” аянаар иргэдэд урлагийн гоо зүйн мэдрэмж өгөх зорилготой юм.

-“Урлагийн хот Улаанбаатар” аянаар дамжуулан орчин үеийн урлагаас гадна түүхэн музейн үзмэрүүдийг дэлгэж, залуу үеийнхэнд түгээн, дэлгэрүүлэх үү?

          -Нийслэлийн Соёл, урлагийн газраас музейтэй хамтраад томоохон бүтээлийг гаднах орчинд байрлуулах, хэрэв жижиг үзмэр бол шилэн хоргонд байршуулан олон нийтэд хүргэж болно. Зарим музейн түүхэн үзмэрүүд олон нийтэд хүрдэггүй учир “Урлагийн хот Улаанбаатар” аянтай хамтарч, иргэдэд хүргэх бүрэн боломжтой.

-Тэгвэл өөрийн бүтээлийг олон нийтэд хүргэж, таниулах гэсэн бие даасан уран бүтээлч ч гэсэн танайд хандаж, бүтээлээ дэлгүүлэх боломжтой юу?

          -“Урлагийн хот Улаанбаатар” аян бүх уран бүтээлчдэд нээлттэй. Аяныг нэг удаа хийгээд зогсохгүй ирээдүйд үргэлжлүүлсээр байх болно. Мөн олон улсыг жишгээс санаа авч, уран зураг, баримал зэрэг жижиг бүтээлүүдийг шилэн хоргонд байрлуулж, орой нь үзмэрийг хаадаг жишиг оруулж ирэх төлөвлөгөөтэй байна. Гэвч гадаа талбайд дэлгэх учраас хэмжээний хувьд том бүтээл дэлгэхийг зорьж байгаа.

Г.БАЯРСҮРЭН