Хөвсгөл аймгийн Алаг-Эрдэнэ суманд удаан хугацаанд үргэлжилсэн их хэмжээний борооны улмаас Бэлчирийн сайр, Бэрхэвшийн сайр гэх газарт уруйн үер урсаж, өчигдөр буюу наймдугаар сарын 17-ны өдөр 10 зорчигчтой таван автомашин урссан талаар бид мэдээлсэн. Тэгвэл үүний дараа буюу өчигдрийн 23:00 цаг орчимд тус газар дахин дөрвөн зорчигчтой “Стана” маркийн автомашин үерийн усанд урсаж, живсэн байна. Үерийн усанд живсэн автомашиныг Хөвсгөл аймгийн Онцгой байдлын газрын Хатгал тосгон дахь Гал түймэр унтраах, аврах 69 дүгээр ангийн алба хаагчид өнөөдөр буюу наймдугаар сарын 18-ны 06:00 цаг орчимд татан гаргажээ.

Үүнтэй холбоотойгоор тус газарт байсан М.Энхбилэгээс тодруулсан юм. Тэрбээр “Автомашиныг өглөө 06:00 цагийн үед татаж гаргахад нэг хүн осгосон байсан. Улмаар тухайн иргэнийг Хатгал тосгоны эмнэлэгт хүргэсэн” гэсэн юм.

Түүнчлэн “Бэлчирийн сайр, Бэрхэвшийн сайрт болсон үерийн улмаас Хөвсгөл аймгийн Хатгал, Цагаан-Үүр, Чандмань-Өндөр сумаас элсэлтийн ерөнхий шалгалтаа өгөхөөр аймгийн төвийг зорьж байгаа сурагчид үерийн усыг гаталж чадахгүй суух тохиолдол гарч байгаа” гэлээ.

М.ЭНХЗУЛ