Энэ сарын 6-7-нд шилжих шөнө Зэвсэгт хүчний 065 дугаар цэргийн ангийн хашаанд барьж буй барилга дээрээс хоёр хүн унасан ноцтой осол гарсан. Тодруулбал, өндрөөс унаж, хүнд бэртэл авсан нэг иргэн нь тус ангийн ахлагч цолтой алба хаагч байсан бол нөгөөх нь тус ангийн Хөдөлмөрийн аюулгүй байдал хариуцсан инженерийн гэр бүлийн хүн байсан аж. 

       Энэ талаар Зэвсэгт хүчний 017 дугаар ангийн захирагч, хурандаа Б.Дорждэрэмээс тодруулахад “Осолд өртсөн хоёр хүний нэг нь манай ангийн ахлагч залуу байсан нь үнэн. Бид осол болсон тухай мэдээлэл авсан даруйдаа ГССҮТ-д очиж, гэр бүлтэй нь уулзсан. Манай анги өдөр бүр аюулгүй ажиллагааны зааварчилгаа өгч, тус заавартай танилцсан эсэх талаар гарын үсэг зуруулдаг. Тухайн өдөр ч мөн адил зааварчилгаа өгч, гарын үсэг зуруулсан байгаа юм. Мөн олс, бүс, хамгаалалтын малгай, бээлий зэрэг ажилтны аюулгүй байдлыг хангах хувцас, хэрэглэл бүрэн байсан. Осол гарах үед тухайн хохирогч нь хамгаалалтын хэрэгсэл хэрэглээгүй байсан юм билээ. Хохирогчийн хувьд өмнө жилээс эхлэн манай ангид энгийн ажилтнаар ажилд орсон. Мэргэжилдээ эзэн болсон, үүрэг даалгавар маш сайн биелүүлдэг манай тэргүүний ажилчдын нэг. Өөрөөр хэлбэл, удирдлагаас өгсөн үүрэг даалгаварыг цаг тухайд нь биелүүлж, идэвх санаачлагатай ажилласан учир цэргийн албан хаагч болох хүсэлт гаргасан. Ингээд өнгөрсөн тавдугаар сард ахлагч цол хүртсэн юм. Осол гарах үед ямар нэгэн маргаан, үл ойлголцол үүсээгүй. Зэвсэгт хүчний 065 дугаар ангийн хашаанд болсон осол болохоор хэргийн газар дээр нь очиж амжаагүй явсан юм. Харин өнөөдөр ослын газар очиход унасан барилга нь таван метр орчим өндөр харагдсан” гэв.

      Харин энэ талаар хохирогчийн ах У.Э-ээс тодруулахад “Манай дүү Зэвсэгт хүчний 017 дугаар ангид барилгачнаар ажилладаг, дэд ахлагч цолтой. Барилга дээр ажиллаж байсан юм. Хамт унасан хүн нь тэр барилгын ХАБ-ын инженерийнх нь нөхөр байсан юм байна лээ. "Барилгын дээврийг яаралтай дуусга" гэдэг тушаал авсны дагуу ажиллаж байсан. Барагцаагаар таван метр орчим өндрөөс унасан байгаа юм. Дүүгээ өндрөөс унасныг сонсоод л ГССҮТ-д ирлээ. Одоогийн байдлаар ангийнх нь дарга нар ирчихсэн байна. Мөн дөнгөж сая цагдаа ирж байцаалт, мэдээлэл авч байх шиг байна. Эмч нар "Дүүгийн чинь бие маш хүнд байна" гэсэн. Амьдрах магадлал 20 хувьтай гэхээр ямар байгаа нь тодорхой. Амьд мэнд үлдээсэй л гэж бодож байна” гэлээ.