Цахим сүлжээнд “4403 УБЦ” улсын бүртгэлийн дугаартай тээврийн автомашины жолооч голын усанд дизель түлш асгаж буй гэрэл зураг олон нийтийн шүүмжлэлд өртөөд байгаа. Тус гэрэл зургийг Дорнод аймгийн цахим сүлжээнд “Хэрлэн голыг минь бохирдууллаа” гэх тайлбартай нийтэлжээ. Улмаар Дорнод аймгийн Цагдаагийн газрын Нийтийн хэв журам хамгаалах хэлтсийн хэсгийн байцаагч Э.Баасанжав тус хэрэгт мөрдөн шалгах ажиллагаа явуулж байгаа аж.

       Гэвч уг хэргийг Дорнод аймагт бус Багануур дүүргийн нутаг дэвсгэр орчимд үйлджээ. Тодруулбал, энэ сарын 20-ны 09:00 цагийн орчимд иргэн В.Баянмөнх “4403 УБЦ” улсын бүртгэлийн дугаартай тээврийн хэрэгслээр Хэрлэн голоос ус соруулах явцдаа дизель түлш урсгажээ. Бид энэ талаар мэдээлэл авахаар тус автомашины эзэмшигч Ч.Амарсанаатай холбогдоход “Би машинаа зараад таван жил болж байна. Эзэмшигчийн нэрийг нь шилжүүлж чадаагүй болохоор хүмүүс намайг гэж бодоод байх шиг байна. Би өөрөө Төв аймагт, миний машиныг авсан Ж.Содном Өвөрхангайд байдаг болохоор шилжүүлж амжихгүй яваад байсан юм. гэдэг хүн бас цаашаа зарсан сурагтай байна” гэв.

Харин Ж.Содномоос дахин дамнаж, автомашиныг нь худалдаж авсан С.Лхагвабаатар  “Би энэ машиныг саяхан худалдаж авсан. Тэгээд ажил хийх санаатай “Ринг Роуд” гэдэг замын компанитай уулзсан юм. Шалгаж үзэж авна гэхээр нь өөрийн танил В.Баянмөнхдөө машинаа өгөөд явуулсан. Замын ажилд тэнцэх нь үү, үгүй юу гэдгийг харуулахын тулд ус соруулж үзүүлэх л зорилготой байсан. Тэрнээс биш санаатайгаар голын ус бохирдуулсан зүйл байхгүй. Дүүргийн Мэргэжлийн хяналтын газар, Байгаль орчины газраас ирж дээж авсан гэсэн. Хот руу лабраторид шинжлүүлэхээр явуулсан болохоор хариу нь ирэхээр эргэж дуудна гэсэн. Наад зах нь торгуулах л байх даа” гэсэн юм.

Тухайн үед тус тээврийн хэрэгслийг жолоодож явсан В.Баянмөнх “Долдугаар сарын 20-ны 09:00 цагийн орчимд би Багануураас хойш Хэрлэн голын хөвөөнд очсон.  Манай машины нөөцийн сав нь цэвэрхэн байсан. Хүмүүсийн яриад байгаа шиг тээвэрлэж явсан дизель түлшээ асгаад, саваа цэвэрлэсэн зүйл огт байхгүй. “Нэг компанид оруулах гэсэн юм шалгуулчих” гэхээр нь хүнээс соруулах хоолойд гуйж аваад явсан. Шаланкаа шалгалгүй голын усанд дүрсэн нь буруудчихлаа. Тэр хоолой нь дизель түлшний үлдэгдэлтэй байсан юм билээ” гэв.