Нийслэлийн Чингэлтэй дүүргийн 17 дугаар хорооны Зүрх уул орчимд энэ сарын 19-нд 32 настай эрэгтэй Н төөрч сураггүй болсон. Тэрбээр хөгжлийн бэрхшээлтэй учир хаана, хэнтэй байгаа талаараа хэлж чадахгүй аж. Түүнийг Онцгой байдлын газрын алба хаагчид өчигдөр буюу энэ сарын 20-ноос эхлэн эрж, Зүрх уулыг тойрон 50 километр,  Зүүн салааны Билгүүний ам, Яргайтын ам орчимд 20 километр зайд явганаар хайсан боловч өнөөдрийг хүртэл үр дүнд хүрээгүй байна. Үүнтэй холбоотойгоор сураггүй болсон Н-ийн дүү Г.Түмэнзаяагаас зарим зүйлийг тодрууллаа.

         Тэрбээр “Сураггүй болсон ахыгаа одоог хүртэл олоогүй байна. Энэ сарын 19-ний 13:00 цагийн үед сураггүй болсон. Манайх Зүрх уул орчимд зуслангийн байртай юм л даа. Ээж, ах хоёр модон дундаас доош бууж байсан гэсэн. Тэгэхэд хөгжлийн бэрхшээлтэй ах маань ээжээс арай түрүүлээд явж байсан юм билээ. Ээж нэрээр нь дуудахад хариу өгөөд байхаар нь тоогоогүй орхисон. Тэгээд модон дунд нэг нэгнээсээ зайтай хэсэг ярилцаж яваад ах сураггүй болсон юм билээ. Ахад гэрийн түлхүүр болон ээжийн гар утас байсан. Ээж ахыг гэрт түрүүлж очсон гэж бодтол очиход нь байхгүй байсан. Тэгээд л цагдаагийн газар руу ярьж, дуудлага өгсөн. Харин дүү маань ээжийн утас руу залгасаар байгаад ахтай 10 орчим минут ярьсан байна лээ. Ах маань хүнтэй ойртдоггүй, ярих чадамжгүй. Хаана байгаагаа, хэнтэй байгаагаа ч хэлж чадахгүй шүү дээ. Тэгээд л утас нь тасарсан. Түүнээс хойш гар утас нь одоог хүртэл холбогдохгүй байна. Цагдаагийн байгууллагад дуудлага өгөхөд тоогоогүй. Онцгой байдлын алба хаагчид л бүр орой бидэнтэй холбогдсон. Улмаар эрэн хайх ажиллагааг ахыг төөрснөөс маргааш буюу энэ сарын 20-нд эхлүүлсэн” гэв.

Хөгжлийн бэрхшээлтэй Н сураггүй болох үедээ хар өмд, саарал фудволк, малгайтай байжээ.