Өвөрхангай аймгийн Баян-Өндөр сумын Хадан хушуу гэх газарт хоёр малчин аянгад цохиулж нас барсан хэрэг өчигдөр гарсан. 

       Тодруулбал, Баян-Өндөр сумын Бумбат багт өчигдөр буюу долдугаар сарын 4-ний өдрийн 17:30 цагийн орчим долоон хүн, дөрвөн мотоциклтой сумын төвөөс шатахуун авч, Зүлэгт багийн Цам гэх газрын чиглэлд гэр рүүгээ буцаж явахад хоёр хүн нь аянгад цохиулж нас барсан байна.

Хэргийн талаар Баян-Өндөр сумын Засаг дарга С.Чулууншагайгаас тодруулахад “Өчигдөр 18:13 цагт “Манай хоёр найз аянганд ниргүүлчихлээ” гэсэн мэдээлэл ирсэн. Энэ дуудлагыг хамт явж байсан залуучууд нь өгсөн юм байна лээ. Сумын төвөөс хоёр километрийн зайтай газар болохоор аврах баг арав хүрэхгүй минутад  очсон. Харамсалтай нь Зүлэгт багийн хоёр иргэн нас барсан байсан" гэсэн юм.

Харин түүнээс нас барсан болон дуудлага өгсөн залуусыг согтууруулах ундаа хэрэглэсэн эсэхийг тодруулахад "Согтуурлын зэрэг шалгах тоног төхөөрөмж байгаагүй болохоор согтууруулах ундаа хэрэглэсэн үгүйг сайн хэлж мэдэхгүй байна.

Одоогоор Хархорин сумаас цагдаагийн бие бүрэлдэхүүн хяналт, шалгалтын ажил явуулж байна. Арав гаруй жилийн өмнө суманд ойрхон аянга бууж байсан тохиолдол гарч байсан” гэв.