Түүний аав Р.Гончигдорж Монгол төрийн түүхэн дэх анхны бөгөөд сүүлчийн Дэд Ерөнхийлөгч. Дараа нь 1992, 1996, 2004, 2008, 2012 онд УИХ-ын гишүүнээр таван удаа сонгогдсон. Энэ хугацаандаа УИХ-ын дарга байлаа, УИХ дахь АН-ын бүлгийн дарга байлаа, Аюулгүй байдал, гадаад бодлогын байнгын хорооны дарга байлаа, УИХ-ын Дэд дарга ч байлаа. Сүүлд 2016 оны УИХ-ын сонгуулиар Архангай аймагтаа АН-аас нэр дэвшээд, яруу найрагч Ж.Мөнхбатад ялагдсан. Дараа жил нь 2017 онд Үндсэн хуулийн цэцийн гишүүнд нэр дэвшээд бас л ялагдсан. Ингэснээр Р.Гончигдорж ард түмнээс ч, АН-аас ч авах албан тушаалын “авлага” нь дууссан гэдгийг ойлгосон.

Ингээд Г.Уянгахишиг нь том охины хувиар аавынхаа улс төрийг “угсаа”-г залгамжлахаар 2020 оны УИХ-ын сонгуульд Баянзүрх дүүрэгт ХҮН намаас буюу “Зөв хүн электорат эвсэл”-ээс нэр дэвшсэн. Гэвч МАН-ын Б.Энхбаяр, Б.Саранчимэг хоёрт бараа сураггүй ялагдсан. Намар нь ХҮН намаас НИТХ-ын төлөөлөгчийн сонгуульд Баянзүрх дүүргэээс нэр дэвшсэн ч бас л унасан.

Харин өнгөрөгч 2024 оны сонгуульд Г.Уянгахишиг ХҮН намд 50 сая төгрөг хандивлаж, хариуд нь жагсаалтын дөрөвт бичигдээд УИХ-ын гишүүн болсон. Ингэснээр тэр аавынхаа улс төрийн угсааг албан ёсоор өвлөж авсан. Аав Р.Гончигдорж нь улс төрд 26 жил “амьдарсан”, харин Г.Уянгахишигийн улс төрийн амьдрал хэр урт байхыг одоогоор таахад эрт байна. Сонирхуулахад, Р.Гончигдоржийн охин Г.Уянгахишигээс гадна, Н.Батбаярын охин Б.Жаргалан, Р.Будын охин П.Анужин гээд аавынхаа улс төрийн угсааг залгамжилсэн “охид” буй.

ГЭР БҮЛИЙНХЭН НЬ АН-ЫНХ, БАС ХҮН НАМЫНХ, ХАРИН ХУДУУД НЬ МАХН-ЫНХ

УИХ-ын гишүүн Г.Уянгахишигийн гэр бүлийн улс төрийн үзэл баримтлалыг ойлгоход тун хэцүү. АН-ынх мөртөө ХҮН намын гишүүн болсон. Тэгсэн мөртөө бизнес нь АН-ынхантай холбогддог. Өөрөөр бол, сэтгэлээрээ АН-ынх, сэтрээрээ ХҮН намынх гэж хэлж болно. Тухайлбал,

Аав Р.Гончигдорж нь Монголын социал демократ намын үүсгэн байгуулагч, дарга нь байлаа. 2000 онд Монголын социал демократ намаа Монголын ардчилсан нам, Монголын үндэсний ардчилсан нам, Монголын сэргэн мандлын нам, Монголын шашинтны ардчилсан намтай нэгтгэн АН-ыг байгуулж, 2004-2006 онд тэрбээр АН-ын даргаар нь ажиллаж байлаа.

УИХ-ын гишүүн Г.Уянгахишигийн бага дүү Г.Эрдэмхишиг нь аавыгаа дагаж АН-д элссэн. 2020 оны УИХ-ын сонгуулийн өмнө Г.Эрдэмхишиг АН-ын “Шинэчлэлийн хөдөлгөөн”-ийг удирдаж байлаа. Гэхдээ тэрбээр ХҮН намын дарга Т.Доржхандтай “Ноосвул” ХХК-ийг хамтран байгуулж байсан түүхтэй.

Харин Г.Уянгахишигийн тухайд, анх 1999 онд аав Р.Гончигдоржийнхоо удирддаг Монголын социал демократ намд гишүүнээр элссэн. 2000 онд “автомат”-аар АН-ын гишүүн болсон. Гэхдээ 2020 оны тавдугаар сард ХҮН намын гишүүн болсон. Одоо Г.Уянгахишиг ХҮН намын Удирдах зөвлөлийн гишүүн. Бас мэдээж ХҮН намын жагсаалтаар УИХ-д сонгогдсон гишүүн. Гэхдээ Г.Уянгахишиг АН-ын санхүүжүүлэгчдийн нэг болох “М-Ойл” ХХК-ийн эзэн Р.Батбаярын эхнэр Б.Пунсалмаатай 2013 оноос хойш “Рандонехорс” ХХК-ийг 50\50 хувиар хамтран эзэмшиж ирсэн. “Рандонехорс” ХХК-ийг хамтран эзэмшигч Б.Пунсалмаа нь 2020 оны УИХ-ын сонгуульд АН-аас Сонгинохайрхан дүүрэгт нэр дэвшээд унасан. Улмаар өнгөрөгч 2024 оны УИХ-ын сонгуульд АН-ын жагсаалтаар нэр дэвшиж, УИХ-ын гишүүн болсон.

Г.Уянгахишигийн үеэл буюу Р.Гончигдоржийн төрсөн ахын охин В.Данаасүрэн ХҮН намын гишүүн. Өнгөрөгч 2024 оны УИХ-ын сонгуульд мөн В.Данаасүрэнг ХҮН намын жагсаалтаар нэр дэвшүүлсэн. Гэвч тэрбээр улаан шугам давж чадалгүй унасан. Улмаар өнгөрөгч 2024 оны НИТХ-ын сонгуульд ХҮН намаас Хан-Уул дүүрэгт нэр дэвшээд бас л унасан.

Гэтэл Г.Уянгахишигийн үеэл буюу Р.Гончигдоржийн төрсөн ахын В.Гомбодорж нь АН-ын гишүүн. 2016 онд Сүхбаатар дүүрэгт АН олонх болж, засаглаж эхэлснээс хойш В.Гомбодорж Сүхбаатар дүүргийн ЗДТГ-ын Төрийн захиргааны удирдлагын газрын даргаар ажиллаж ирсэн.

Цаашилбал, Г.Уянгахишигийн төрсөн дүү Г.Ариунхишиг нь Батлан хамгаалахын сайд асан Ц.Цолмонгийн бэр. Харин Ц.Цолмонгийн тухайд, 2006 онд Үндэсний шинэ намыг байгуулж, даргаар нь ажиллаж байсан. 2011 онд Үндэсний шинэ нам нь Монголын Үндэсний Ардчилсан нам болж, нэрээ өөрчилсөн. Гэтэл 2012 онд Ц.Цолмон МАХН-д элсэж, 2016 оны УИХ-ын сонгуульд МАХН-аас Баянзүрх дүүрэгт нэр дэвшээд унасан. Харин түүний үүсгэн байгуулсан Монголын Үндэсний Ардчилсан намыг өнгөрөгч 2024 онд Н.Номтойбаяр авч, Монголын ногоон намтай нэгтгэн “Үндэсний эвсэл”-ийг байгуулж, өөрөө УИХ-ын гишүүн болсон билээ. Намын харьяалал, хамаарлын хувьд нэг иймэрхүү холион бантан, аль ч талд нүүр алдахгүй давуу талтай нэгэн.

ГЭР БҮЛЭЭРЭЭ БОЛОВСРОЛЫН ЗЭЭЛИЙН САНГААР ГАДААДАД СУРЧЭЭ

УИХ-ын гишүүн Г.Уянгахишиг 1998 онд Боловсролын зээлийн сангаас 6.5 мянган ам.доллар авч, ХБНГУ-ын Бонн хотын их сургуульд сурсан. Тухайн үед аав Р.Гончигдорж нь УИХ-ын дарга байлаа. УИХ-ын даргын охин учраас Боловсролын зээлийн сангийн зээл хялбархан олдсон хэрэг л дээ. Хожим нь, АН-ын дарга Лу.Гантөмөр Боловсрол, шинжлэх ухааны сайд байхдаа тушаал гаргаж, Г.Уянгахишигийн Боловсролын зээлийн сангаас авсан 6.5 мянган ам.долларыг тэглэж байлаа.

Тэгвэл УИХ-ын гишүүн Г.Уянгахишигийн төрсөн дүү Г.Ариунхишиг нь өдгөө мөн л Боловсролын зээлийн сангаар Финландад сурч буй ажээ. Тодруулбал, 2022 оны долдугаар сарын 5-нд Боловсол, шинжлэх ухааны сайд Л.Энх-Амгалан 31 хүнийг Боловсролын зээлийн санхүүжилтээр магистр, докторт суралцуулах А/243 тоот тушаал гаргасан. Тухайн жагсаалтад УИХ-ын гишүүн Г.Уянгахишигийн төрсөн дүү Г.Ариунхишиг багтаж, Боловсролын зээлийн сангийн 32 мянган еврогийн санхүүжилтээр Финландын Хельсинки их сургуульд хоёр жил суралцуулахаар болсон байдаг.  

“ЭРДЭНЭС ТАВАНТОЛГОЙ” ХК-ИЙН ТЕНДЕРИЙН “МАНГАС”-ЫН ХАМТРАГЧИД

            УИХ-ын гишүүн Г.Уянгахишиг аав Р.Гончигдорж, ээж Д.Хишигт хоёр нь ердөө ганц компанитай. Тодруулбал, Г.Уянгахишигийн ээж Дамдинсүрэнгийн Хишигт нь “Туул кашемир” ХХК-ийг УИХ-ын гишүүн асан Б.Батбаяр, түүний хөвгүүд болох Б.Батбилэг, Б.Баттөр, Б.Батхишиг нартай 2008 оноос хойш хамтран эзэмшиж ирсэн. Р.Гончигдорж, Б.Батбаяр хоёр 1996 оноос хойш УИХ-д хамт суусан, хоёулаа АН-ын гишүүн, тиймдээ ч гэр бүлээрээ “Туул кашемир” ХХК-ийг байгуулан халаасаа нэгтгэсэн хэрэг. Мөн “Туул кашемир” ХХК-ийг байгуулсан цагаас Гүйцэтгэх захирлаар нь УИХ-ын гишүүн асан Б.Батбаярын том хүү Б.Батбилэг ажиллаж ирсэн. Б.Батбилэгийн тухайд УИХ-ын гишүүн Г.Уянгахишигтэй Германд хамт сургууль төгссөн мөн л дотно найзууд. Үндсэндээ, Р.Гончигдоржийн гэр бүл, Б.Батбаярын гэр бүлээс салгаж ойлгох боломжгүй.

Ноцтой нь, УИХ-ын гишүүн Г.Уянгахишигийн гэр бүлийн бизнесийн хамтрагчид болох УИХ-ын гишүүн асан Б.Батбаярын хөвгүүдийн “Спейшл майнинг сервис” ХХК нь 2019 оноос хойш “Эрдэнэс тавантолгой” ХК-аас 1.7 их наяд төгрөгийн тендер аваад буй. Тухайлбал, “Спейшл майнинг сервис” ХХК нь

• 2019 онд “Эрдэнэс тавантолгой” ХК-ийн Цанхийн баруун уурхайд өрөмдлөг, тэсэлгээ хийх- 387 тэрбум төгрөгийн тендер
• 2020 онд “Тавантолгой” ХК-ийн Уурхайд тэсэлгээ хийх 45 тэрбум төгрөгийн тендер
• 2021 онд “Эрдэнэс тавантолгой” ХК-ийн Цанхийн зүүн уурхайд өрөмдлөг, тэсэлгээ хийх- 239 тэрбум төгрөгийн тендер
• 2021 онд “Эрдэнэс тавантолгой” ХК-ийн Тавантолгойн ордын Бортээгийн уурхайн хөрс хуулалт, өрөмдлөг тэсэлгээ, нүүрс олборлолт, нүүрс баяжуулалтын ажлыг гүйцэтгүүлэх- 715 тэрбум төгрөгийн тендер
• 2022 онд “Тавантолгой” ХК-ийн Уурхайд тэсэлгээ хийх-53.1 тэрбум төгрөгийн тендер
• 2023 онд “Эрдэнэс тавантолгой” ХК-ийн Цанхийн баруун уурхайд тэсэлгээ хийх- 307 тэрбум төгрөгийн тендерт шалгарсан байдаг.