УИХ-ын гишүүн асан, “Ажнай” хочит Д.Бат-Эрдэнийг “Нүүрсний нам”-ын дарга гэж хочлох нь ч бий. Учир нь, УИХ-ын гишүүн асан Д.Бат-Эрдэнэ өнгөрсөн хугацаанд Өмнөговь аймгийг удирдах дарга, даамлын албан тушаал болгонд, жижиг “Тавантолгой” ХК-ийг удирдах ТУЗ болгонд өөрийн хүмүүсийг томилох замаар Өмнөговь аймгийг ч, “Тавантолгой” ХК-ийг ч өөрийн “Вант улс” болгож, өөрөө “хаан” нь болоод заларчихсан.  Тиймдээ ч “Ажнай” Д.Бат-Эрдэнэ “Тавантолгой” ХК-ийн ТУЗ-өөр хууль бус шийдвэр гаргуулан, өөртөө 28.7 тэрбум төгрөгийн ногдол олгуулсан гэгддэг. Тус мөнгөө өөрийн “Капитрон” банкаар дамжуулан иргэн, аж ахуйн нэгжүүдэд хүүтэй зээл хэлбэрээр олгож, буцааж авах замаар угаасан хэрэгт холбогдсон. Өдгөө Д.Бат-Эрдэнийн “Нүүрсний хулгай”-н хэрэгт 61 хүнийг гэрчээр байцааж, Өмнөговь аймгийн Засаг дарга Р.Сэддорж тэргүүтэй 11 хүнийг яллагдагчаар татаад байна.

     Тэгвэл “Ажнай” Д.Бат-Эрдэнэ “Тавантолгой” ХК-ийг, тэр байтугай Өмнөговь аймгийн хэрхэн өөрийн болгосныг танилцуулъя.

       Тухайлбал, УИХ-ын гишүүн, “Ажнай” хочит Д.Бат-Эрдэнэ “Тавантолгой” ХК-ийн удирдлагыг өөрийнхөө “гар, хөл”-ийн хүмүүсээр дүүргэсэн. Жишээ нь,  “Тавантолгой” ХК-ийн ТУЗ-ийн дарга Б.Түвшинбаяр нь Д.Бат-Эрдэнийн ээж Д.Хуушааны “Жуулчин говь” ХХК-ийн гүйцэтгэх захирлаар давхар ажилладаг хамаарал бүхий этгээд нь. “Тавантолгой” ХК-ийн гүйцэтгэх захирал асан, Өмнөговь аймгийн Засаг дарга Р.Сэддорж нь Д.Бат-Эрдэнийн туслах байсан. “Тавантолгой” ХК-ийн дэд захирал П.Мөнхтуул нь Д.Бат-Эрдэнийн хүү Б.Билгүүнтэй “Говь амазон” ТББ-ыг хамтран эзэмшдэг, хамаарал бүхий этгээд нь. “Тавантолгой” ХК-ийн Санхүүгийн албаны дарга Ө.Мөнхтайван нь Д.Бат-Эрдэнийн “Шанх амазон” ТББ-ынх нь ТУЗ-ийн гишүүнээр ажилладаг, хамаарал бүхий этгээд нь гэх мэтээр “Ажнай” Д.Бат-Эрдэнийн “цэрэг”-үүд “Тавантолгой” ХК-ийг удирдаж ирсэн.

       Цаашилбал, Өмнөговь аймгийн ИТХ-ын дарга, төлөөлөгчдийн тал нь УИХ-ын гишүүн, “Ажнай” хочит Д.Бат-Эрдэнийн хамаарал бүхий этгээдүүд байдаг. Жишээ нь, Өмнөговь аймгийн ИТХ-ын төлөөлөгч, Засаг даргын орлогч Н.Энхбат Д.Бат-Эрдэнийн хүү Б.Билгүүнтэй “Говь төрх” ХХК-ийг, Д.Бат-Эрдэнийн эхнэр Г.Ганчимэгтэй “Оюун ухааны говь академи” ТББ-ыг хамтран эзэмшдэг, хамаарал бүхий этгээд нь. Өмнөговь аймгийн ИТХ-ын төлөөлөгч, АН-ын бүлгийн дарга Ч.Жаргалсайхан Д.Бат-Эрдэнэтэй “Гурван сайхан интернэшнл” ХХК-ийг хамтран эзэмшдэг, Д.Бат-Эрдэнийн ээж Д.Хуушааны “Мон Ит Булигаар” ХХК-ийн ТУЗ-ийн гишүүнээр давхар ажилладаг, хамаарал бүхий этгээд нь. Ч.Жаргалсайханы төрсөн дүү, Засаг даргын орлогч Ч.Батжаргал нь “Шанх транс” ХХК-аараа “Тавантолгой” ХК-ийн нүүрсийг урд хөрш рүү зөөдөг. Өмнөговь аймгийн ИТХ-ын төлөөлөгч Ц.Дэнээдорж нь Д.Бат-Эрдэнийн эхнэр Г.Ганчимэгтэй “Төв ази поло клуб” ТББ-ыг хамтран эзэмшдэг, хамаарал бүхий этгээд нь. Өмнөговь аймгийн ИТХ-ын дарга Б.Бадраа Д.Бат-Эрдэнэтэй хамт “Шанх амазон” санг удирддаг. Мөн Д.Бат-Эрдэнийн “Капитрон” банкнаас 2.0 тэрбум төгрөгийн зээлтэй.

      Энэ мэтээр, Өмнөговь аймгийн Засаг дарга, ИТХ-ын дарга, тэргүүлэгч, төлөөлөгч нар болон “Тавантолгой” ХК-ийн үе үеийн ТУЗ-ийн дарга, гүйцэтгэх захирлууд нь цөм Д.Бат-Эрдэнийн “тавиул”-ууд гэсэн үг. Тиймдээ ч 2013 оноос эхлэлтэй “Эрдэнэс тавантолгой” ХК болон жижиг “Тавантолгой” ХК-ийн голын мөргөцөг хулгайлагдсан хэргийн гол холбогдогчоор Д.Бат-Эрдэнэ нэрлэгдэж яваа. Товчхондоо, УИХ-ын гишүүн асан Д.Бат-Эрдэнэ “Нүүрсний хулгай”-н хэрэгт яллагдагчаар татагдаж, төрийн түшээгийн сэнтийгээсээ буухгүйн тулд тэрбум төгрөгийн “авлига” амлаж явсны цаад учир нь ердөө энэ.