Т.Аюурсайхан “Нүүрсний хулгай”-н хэргийн хамгийн том “акул” байсан нь илчлэгдэж, УИХ-ын гишүүний сэнтийгээсээ уналаа. Тэр “Би “Эрдэнэс тавантолгой”-гоос хүрз нүүрс ч аваагүй. Б.Ганхуяг бид хоёр найзууд боловч “Эрдэнэс тавантолгой” ХК-ийн гүйцэтгэх захирал болсноос нь хойш ганц ч удаа уулзаагүй” хэмээн мэлзэж, “гүтгэгдсэн” хэмээн “гасалж” байсан ч үнэнд гүйцэгдэв. АТГ-аас УИХ-ын гишүүн асан Т.Аюурсайханыг  “Нүүрсний хулгай”-н хэрэгт Эрүүгийн хуулийн 22.10.2-т заасан үндэслэлгүй хөрөнгөжсөн, Эрүүгийн хуулийн 20.3.3-т заасан зохион байгуулалттай гэмт бүлэг байгуулсан зүйл ангиар тус тус яллагдагчаар татсан. Улмаар түүний хэрэгт 119 хүнийг гэрчээр байцааж, 11 хүнтэй уулзахыг нь хориглоод буй.

          Үндэслэлгүй хөрөнгөжсөн хэргийн тухайд, Т.Аюурсайхан халаас нэгтэй хамтрагч, хамтран жагсагч Б.Ганхуягийгаа “Эрдэнэс тавантолгой” ХК-ийн гүйцэтгэх захирлаар томилогдсоны дараагаас буюу 2018 оноос хурдан удмын адуу сонирхох болж, Дорнод, Хэнтий, Сүхбаатарын угшилтай хурдан удмын морьдыг 20-30 мянган ам.доллароор үнэ цохин худалдан авч эхэлсэн. Улмаар хадам ээж Т.Сээтэн, хадам ах Л.Цогбат нарынхаа нэр дээр Хүй долоон худагийн Дааган толгойд 2.0 га газар авч, хурдан удмын адуу жүчээ, амралтын бааз байгуулсан. Мөн Т.Аюурсайханы Нийгмийн даатгалын ерөнхий газрын дэд даргаар ажилладаг үеэл эгч Г.Саран нарын үеэлүүд нь Дорнод аймагт амьдардаг. Тэднийхээ нэр дээр мөн Дорнод аймгийн Хөлөнбуйр суманд хурдан удмын 100 гаруй адууны жүчээ, амралтын бааз байгуулсан. Хувийн бизнесгүй, сарын сая төгрөгийн цалинтай Т.Аюурсайхан ингэж хурдан удмын адуун сүрэгтэй болж, хэд хэдэн адууны жүчээ, амралтын бааз байгуулсан хөрөнгийн эх үүсвэрээ тайлбарлаж чадаагүй. Өөрөөр бол, “Нүүрсний хулгай”-н мөнгөөр хурдан удмын адуу худалдан авч, адууны жүчээ, амралтын бааз байгуулсан нь тогтоогдсон.

         Цаашилбал, Т.Аюурсайхан Б.Ганхуягтай хуйвалдаж, Хятадын компаниудад “Эрдэнэс тавантолгой” ХК-ийн нүүрсийг дамлаж, нүүрсний гэрээ тутмаас хувь хүртэж байсан. Улмаар Т.Аюурсайхан “Нүүрсний хулгай”-н мөнгөө туслах И.Даваадоржоороо дамжуулан, хаус хотхон барьж угаасан. Тодруулбал, Т.Аюурсайханы туслах И.Даваадоржийн төрсөн эгч И.Чанцалдулам, эхнэр Д.Дэлгэрмаа, хамтрагч Г.Гантөмөр нарын “Лаки лайф” ХХК нь Ар гүнтийн аманд “Ар гүнт вилла” нэртэй, нийт 69 хаус бүхий тансаг зэрэглэлийн хотхон барьсан. Тэд тус хотхоны хаусуудыг нийт 20 тэрбум төгрөгөөр зарж, “мөнгө угаасан” хэргээр шалгагдаж байгаа. Мөн Т.Аюурсайханы туслах И.Даваадорж нь эхнэр Д.Дэлгэрмаа, хамтрагч Г.Гантөмөр нарын “Мон версус” ХХК-ийн нэр дээр Богдхан уулын Арцатын аманд 1.5 га газар авч, тус газар дээрээ 39 хаус бүхий тансаг зэрэглэлийн хотхон барихаар газар шорооны ажлаа эхлүүлээд байхдаа баригдсан. Т.Аюурсайхан Хөдөлмөр, нийгмийн хамгааллын сайд болсныхоо дараа “Нүүрсний хулгай”-н мөнгийг нь угаах хууль бус, хар бор ажлыг нь хариуцаж байсан туслах И.Даваадоржийгоо яамныхаа харьяа Хөгжлийн бэрхшээлтэй хүний хөгжлийн ерөнхий газрын даргаар томилж, албан тушаалаар шагнасан.

   Улмаар АТГ-аас Т.Аюурсайханы мөнгийг угаасан И.Даваадоржийг баривчилсан. И.Даваадоржийн гэрт нэгжлэг хийх үед бэлнээр 100 сая төгрөг гарч ирсэн бөгөөд “Сity garden” хотхонд орон сууцтай, “Ланд-200” маркийн автомашинтай болж, хууль бусаар хөрөнгөжсөн байсан нь тогтоогдсон.

       Зохион байгуулалттай гэмт бүлэг байгуулсан хэргийн тухайд, Т.Аюурсайхан, Б.Ганхуяг, Н.Удаанжаргал нар 2012 онд “МАН-ын Шинэчлэл, хөгжлийн хороо” ТББ-ыг хамтран үүсгэн байгуулсан, одоог хүртэл эзэмшиж байгаа. Тэд “МАН-ын Шинэчлэл, хөгжлийн хороо” ТББ-аараа дамжуулан 2013, 2016 он Ардын намын захиалгаар Ардчилсан намын эсрэг жагсаалуудыг зохион байгуулж байсан гэгдэж буй. Улмаар Т.Аюурсайхан нь УИХ-ын гишүүн, Б.Ганхуяг нь “Эрдэнэс тавантолгой” ХК-ийн гүйцэтгэх захирал, Н.Удаанжаргал нь “Тавантолгой төмөр зам” ХК-ийн гүйцэтгэх захирал болж, Ардын намын ах нартаа шагнуулсан байдаг.

         Ингээд эрх мэдэлд хүрцгээсэн Т.Аюурсайхан, Б.Ганхуяг, Н.Удаанжаргал нар өөрсдийн “МАН-ын Шинэчлэл, хөгжлийн хороо” ТББ-ынхаа гишүүн, гар хөлийнх нь үзүүрт гүйдэг байсан залуучуудыг “Эрдэнэс тавантолгой” ХК-ийн газар, хэлтсийн даргаар томилж, тэднээрээ “нүүрсний хулгай”-н хэргийг гүйцэтгүүлсэн нь ар араасаа тогтоогдож байгаа бололтой. Өөрөөр хэлбэл, УИХ-ын гишүүн Т.Аюурсайхан өөрийн “МАН-ын Шинэчлэл, хөгжлийн хороо”-гоо зохион байгуулалттай гэмт бүлэг буюу “Нүүрсний мафи” болгосон байдаг. Өдгөө Т.Аюурсайханы “Нүүрсний мафи”-ийн гишүүдээс Б.Ганхуяг, Н.Удаанжаргал, Б.Отгонжаргал, Х.Нурлат нар нь үндэслэлгүй хөрөнгөжсөн, мөнгө угаасан, зохион байгуулалттай гэмт бүлэгт элссэн хэргүүдээр яллагдагчаар татагдаад буй. Тухайлбал, “МАН-ын Шинэчлэл, хөгжлийн хороо”-ны гишүүн, Т.Аюурсайханы туслах, “Эрдэнэс тавантолгой” ХК-ийн Худалдан авалтын хэлтсийн даргаар ажиллаж байсан Б.Отгонжаргал нь 500 сая төгрөгөөр “Mercedez Benz G-500” автомашин худалдаж авсан, төрсөн аав Я.Баатарынхаа гэрт 235 сая төгрөг, 30 мянган ам.доллар нууж байсан нь тогтоогдсон.

     Харин “МАН-ын шинэчлэл, хөгжлийн хороо”-ны гишүүн, “Эрдэнэс тавантолгой” ХК-ийн Дотоод хяналт, эрсдэлийн удирдлагын газрын даргаар ажиллаж байсан Х.Нурлат нь Казахстаны Алматад “House garden” гэх хаус хотхон, “Prime garden” гэх орон сууцны хорооллуудыг тус тус барьж, мөнгө угааж байсан нь тогтоогдсон байдаг.