Байгаль орчин, аялал жуулчлалын сайд Б.Бат-Эрдэнэ хувийн бизнесээ зараад, төрд орж ирсэн гэж “сайрхдаг”. Тэгвэл түүний хамаарал бүхий этгээдүүдийг нь шүүвэл, түүнтэй маш олон компани холбогддог ажээ. Тэр тусмаа хадмууд нь уул уурхай, геологи хайгуул, өрөмдлөгийн хэд хэдэн компанитай. Өөрөөр хэлбэл, ашиг сонирхлын зөрчилтэй байж болзошгүй сайд гэсэн үг.

     Тодруулбал, Байгаль орчин, аялал жуулчлалын сайд Б.Бат-Эрдэнийн эхнэрийг Дашбаатарын Болортуяа гэдэг. Түүний аав Б.Дашбаатар нь барилгын “Ордгеод” ХХК, уул уурхай, геологи, хайгуулын “Орд гео” ХХК-ийг үүсгэн байгуулсан. Өдгөө уул уурхай, геологи хайгуулын “Орд гео” ХХК нь салбартаа томд тооцогдох болсон бөгөөд Б.Дашбаатарын дүү Б.Саранхүү, О.Чимгээ нар удирдаж буй. “Орд гео” ХХК нь Сүхбаатар, Төв, Дорноговь, Дундговь аймгуудад ашигт малтмалын геологи хайгуул, өрөмдлөгийн ажил гүйцэтгэж байгаа. Б.Саранхүү нь “Орд гео” ХХК-иас гадна хайрга, дайрга, бетон зуурмагийн “Просолид стандарт” ХХК, хайгуул өрөмдлөгийн “Ордгео вилл дриллинг” ХХК, газрын тосны хайгуулын “Готланд-Ойлфилдс” ХХК-иуд эзэмшдэг ажээ.

      Нэг сонирхолтой баримт нь, “Орд гео” ХХК-ийн хувьцаа эзэмшигч, Б.Бат-эрдэнийн хадам аавынх нь дүү О.Чимгээ нь УИХ-ын гишүүн Сү.Батболдын төрсөн дүү С.Бат-Очирын эхнэр, Монголбанкны газрын дарга Т.Амарсайхантай хамтран “Ай Ти Холдинг” ХХК-ийг эзэмшдэг. УИХ-ын гишүүн Сү.Батболдынхонтой холбогдсон энэ сэжмээр цааш хөөвөл уул уурхайн олон компанитай холбогдоно. С.Батболдын “Могол интернэшнл” ХХК нь л гэхэд Ховд, Говь-алтай аймагт алт, нүүрсний хэд хэдэн ордтой гэгддэг. Цаашлаад, “Могол интернэшнл” ХХК нь Сү.Батболдтой хамт оффшорт нэр нь яригддаг уул уурхайн “Жазлин” ХХК-д хөтөлж очно.

    Энэ мэтээр Байгаль орчин, аялал жуулчлалын сайд Б.Бат-эрдэнэ эхнэрийнхээ талаар уул уурхай, геологи хайгуул, өрөмдлөгийн хэд хэдэн компанитай гарцгүй холбогдож байна. Цаашлаад, УИХ-ын гишүүн Сү.Батболдын төрсөн дүүтэй ч холбогддог жим байгаа. Өөрөөр хэлбэл, Байгаль орчин, аялал жуулчлалын сайд нь уул уурхайн салбарын компаниудтай холбоо сүлбээтэй байх нь ашиг сонирхлын асар том зөрчил биш  гэж үү.

БАЙГАЛЬ ОРЧИН, АЯЛАЛ ЖУУЛЧЛАЛЫН САЙД Б.БАТ-ЭРДЭНЭ КОМПАНИУДАА БЭР ДҮҮ НАРЫНХАА НЭР ДЭЭР “НУУСАН” УУ

     Байгаль орчин, аялал жуулчлалын сайд Б.Бат-Эрдэнэ ХОМ-тээ “Монгол тулгат финанс” ХХК, “Монмарт трэйд” ХХК-иудыг эзэмшдэг гэж мэдүүлдэг. Энэ компаниуд нь түүний эхнэр Д.Болортуяагийн нэр дээр бүртгэлтэй байдаг бөгөөд үйл ажиллагааны түүхгүй компаниуд. Тэгвэл Б.Бат-Эрдэнэ өөрийнхөө үүсгэн байгуулсан компаниуд, ТББ-аа өөр хүний нэр дээр бүртгүүлсэн байдаг бөгөөд ХОМ-тээ дурддаг ажээ.

    Тодруулбал, Б.Бат-эрдэнийн төрсөн дүү Б.Баттогтох нь “Эйрзоне” ХХК-ийг эзэмшдэг. Энэ компани нь олон улсын нисэх онгоцны тиз борлуулалтын үйлчилгээ үзүүлдэг. Харин Б.Баттогтохын эхнэр Батсайханы Номингийн нэр дээр Б.Бат-Эрдэнэ сайдын компаниуд, ТББ нь бүртгэлтэй байдаг ажээ. Тодруулбал, Б.Номингийн нэр дээр “Силкроуд трэвел” ХХК, “Фасад констракшн” ХХК, “Бат-Өлзийн Бат-Эрдэнэ” сан, “Эрдэнэт хотын хөгжлийн бодлого судалгааны хүрээлэн” ТББ, “У Капитал”, “Нүнү финанс” ХЗХ-г бүртгэлтэй байдаг аж. Өөрөөр хэлбэл, Байгаль орчин, аялал жуулчлалын сайд Б.Бат-Эрдэнэ үйл ажиллагаа явуулдаггүй компаниудаа ХОМ-тээ мэдүүлж, өөрийнхөө үүсгэн байгуулсан бусад компанийг бэр дүүгийнхээ нэр дээр “нуудаг” дүр зураг харагдаж байна.

   Сонирхуулахад, Б.Бат-Эрдэнэ ЗГХЭГ-ын дэд дарга байхдаа ЖДҮХС-аас “Рич холдинг” ХХК-иар дамжуулан 400 сая төгрөгийн зээл авсан дуулианд нэр холбогдож, ажлаасаа чөлөөлөгдөж байлаа. Тэгвэл “Рич холдинг” ХХК-ийг өдгөө эхнэрийнх нь төрсөн дүү Д.Мөнхдөлийн эхнэр Б.Чулуун эзэмшдэг ажээ. Мөн Д.Болортуяагийн төрсөн ах Дашбаатарын Жавхлан нь Д.Жавхлан нь 2020 оны Орон нутгийн сонгуулиар Баянзүрх дүүргийн ИТХ-ын төлөөлөгчөөр сонгогдсон. Тэрбээр “Хантэсо констракшн” ХХК, “Централ салбар байгууллагын хөгжлийн сан”, “Их сэцэн хаан трейд” ХХК, “Рич холдинг” ХХК, “Рич констракшн” ХХК-иудыг эзэмшдэг.

    БОАЖ-ын сайд Б.Бат-Эрдэнэ Ерөнхий сайд Л.Оюун-эрдэнийг НАМЗХ-ны Ерөнхийлөгч байхад Ерөнхий нарийн бичгийн дарга нь байлаа. Тэр цагаас хойш МХЕГ-ын дэд дарга, ЗГХЭГ-ын дэд дарга, ШӨХТГ-ын дарга, улмаар Байгаль орчин, аялал жуулчлалын сайд болж туж “крандуулсан” нэгэн. Даргаас даргын суудал дамжсан намтартай түүнийг том артай, даргын суудлын даллагатай гэлцэх нь ч бий. Тэгвэл үнэхээр л ар томтой, ашиг сонирхлын асар их зөрчилтэй нь ийнхүү эхнээсээ илэрч байна.