“Тэмцэгч” гэгддэг иргэн Ч.Мөнхбаярыг өчигдөр 15:00 цагийн орчимд ТЕГ-аас хойшлуулшгүй ажиллагаа явуулж баривчилсан. Тэгвэл түүнийг гадаадын тагнуулын байгууллагатай удаан хугацаанд хамтран ажиллаж, тэдний санхүүжилт, даалгавраар үйл ажиллагаа явуулж, мөнгөн урамшуулал авч байсныг нь үйлдэл дээр нь илрүүлэн баривчилсан гэж ТЕГ-аас мэдэгдлээ. Гэхдээ түүнд холбогдох хэргийн мөрдөн шалгах ажиллагаа дөнгөж эхэлж байгаа учраас хэргийн нууцтай холбоотой буюу аль улсын тагнуулын байгууллагатай хэдий хугацаанд хамтарч ажиллаж байсан, хэр хэмжээний санхүүжилт авсан, ямар даалгавар авч, ямар мэдээлэл дамжуулсан зэрэг мэдээллийг нууцаллаа.
Тэгвэл гадаадын тагнуулын байгууллагатай удаан хугацаанд хамтарч, тагнуул хийж байсан гэх иргэн Ч.Мөнхбаяр нь өнгөрсөн 2021 оны дөрөвдүгээр сард Ерөнхийлөгч асан Ц.Элбэгдоржтой хамтран хоёр ч төрийн бус байгууллага хамтран үүсгэн байгуулж, үйл ажиллагаа явуулж иржээ.
Тодруулбал, улсын бүртгэлийн нэгдсэн санд бүртгэгдсэнээр иргэн Ч.Мөнхбаяр, Ерөнхийлөгч асан Ц.Элбэгдорж нар “Дэлхийн монголчуудын холбоо глобал” ТББ, “Дэлхийн монголчуудын хуралдай” ТББ-ыг тус тус хамтран эзэмшдэг ажээ. “Дэлхийн монголчуудын хуралдай” ТББ-ынх нь гүйцэтгэх захирлаар Г.Бүүвэйхүү ажилладаг бөгөөд тэрбээр Ц.Элбэгдоржийн Ерөнхийлөгч байхад нь шадар туслахаар нь ажилласан байсан. Харин “Дэлхийн монголчуудын холбоо глобал” ТББ-ынх нь гүйцэтгэх захирлаар Н.Золзаяа ажилладаг бөгөөд тэрбээр “Эх хэлээ аваръя” ТББ-ын тэргүүн ажээ.
Түүнчлэн “Дэлхийн монголчуудын холбоо глобал” ТББ, “Дэлхийн монголчуудын хуралдай” ТББ-ын аль алиных нь удирдах зөвлөлд Сойчи Макихара гэгх Япон улсын иргэн бүртгэлтэй байдаг ажээ. Тэгвэл Сойчи Макихара нь Монголд “Соёл эрдэм” дээд сургуулийн үүсгэн байгуулсан нэгэн аж. Мөн тэрбээр Өвөрмонголын шилийн гол аймагт төрсөн бөгөөд У.Соёлт нэртэй байснаа 30 жилийн өмнөөс Японы иргэн болсон нэгэн ажээ.
“Гадаадын тагнуул” гэх иргэн Ч.Мөнхбаяр Ерөнхийлөгч асан Ц.Элбэгдоржтой хоёр ТББ хамтарч эзэмшдэг |
|