Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид өчигдөр 18:00 цагийн үед харуулын даргаа хөнөөгөөд зугтсан хэрэг гарсан. Тодруулбал, байлдагч Х, М нар харуулын манаанд явж ирээд, харуулын дарга Г-ийн цээжин тус газарт гурван удаа буудаж, амийг нь хөнөөсөн гэх мэдээллийг албаныхан өгсөн. Хэргийн талаар даргыгаа хөнөөж, оргосон гэх байлдагч О.Х-ийн ээж Д.Тогтохбаяраас тодрууллаа.

-Таны хүү гэрийнхэнтэйгээ хамгийн сүүлд хэзээ холбоо барьсан бэ?

        -Ховд аймгийн цагаар 16:00 цагийн үед өчигдөр хүү минь гэрийнхээ утас руу залгасан. Хоолой нь зангираад “Би хил рүүгээ явж байна. Ээжтэйгээ хамгийн сүүлийн удаа ярьж байна шүү” гээд утсаа тасласан. Намайг “Юу яриад байгаа юм бэ” гэж хэлэхийн завдалгүй утсаа салгаад, буцааж хэд хэд залгахад аваагүй. Хүү минь үүнээс өөр зүйл яриагүй.

-Ийм хэрэг болсон талаар та хэзээ мэдсэн бэ?

        -Хүү минь учир битүүлэг зүйл яриад утсаа салгасан болохоор санаа зовоод, шөнө нойр ч хүрсэнгүй. Өглөө 10:00 цагийн үед албаны хүн бидэн рүү утсаар “Танай хүү харуулын даргаа гурван сумаар буудаж, хөнөөгөөд зугтаачихлаа. 50 сумтай буу үүрээд оргосон” гэж хэлсэн. Юу болоод байгааг ойлгох ухаан надад алга. Мал буудаад алчихсан биш, бүхэл бүтэн хүн буудчихсан гэхээр итгэхгүй байна.

-Өмнө нь танд цэргийн ангид нь дарамт, шахалт байдаг тухай хэлж байсан уу?

       -Хүү минь ерөнхий боловсролын сургуулиа төгсөөд, өнгөрсөн аравдугаар сард цэргийн албанд мордсон. Өөрөө “Би цэрэгт явмаар байна. Аав цэргийн албыг гоё гэж хэлсэн. Эх орныхоо хилийн манаанд явна” гэж дурлан байж явсан юм. Очсоноосоо хойш бидэнтэй хэд хэдэн удаа утсаар ярьсан. Элдвийн зүйл сонсогддог болохоор хүүгээсээ “Дарга нар чинь дарамталж байна уу” гэж бид удаа дараа асуусан. Тэгэхэд “Заримдаа дарамттай байдаг” гэж байсан удаатай. Хоёр ч удаа 40, 40 мянган төгрөг шилжүүлүүлж авсан шүү.

-Таны хүү ямар зан араншинтай вэ?

         -Маш даруухан, хөөрхөн, эелдэг хүүхэд. Янз бүрийн хэрэг хийх хүүхэд яав ч биш. 19-хөн настай жаахан хүү юм шүү дээ. Бид малчин болохоор хүүтэйгээ очиж уулзах боломжгүй байсан. Манайх хоёр хүүхэдтэй, хэрэгт холбогдоод байгаа нь миний том хүү.

-Хүү нь Баянтоорой заставт үүрэг гүйцэтгээд хэр удаж байсан юм бэ?

       -Өвөл болж байхад тэр застав руу явсан. Тэндээ гурав, дөрвөн сар болж байсан. Хүү минь сумтай буу үүрээд явж байгаа гэж бодохоор үнэхээр хэцүү байна. Өөрийнхөө амийг егүүтгэх вий гэхээс үнэхээр их айж байна. Миний хүү тийм хэрэг хийх хүн биш гэдгийг би дахин дахин хэлмээр байна.