​Монгол Улсаас Кувейт Улсад суугаа Онц бөгөөд Бүрэн эрхт Элчин сайд П.Сэргэлэн Кувейт Улсын агаарын тээврийн Аль-Жазийра Эйрвэйс (Al-Jazeera Airways) компанийн гүйцэтгэх захирал Баратан Пасупати-тай уулзаж, харилцаа, хамтын ажиллагааны асуудлаар санал солилцов. Уулзалтын эхэнд Элчин сайд П.Сэргэлэн бүс нутгийн хурцадмал нөхцөл байдлын үед зорчигч болон ачаа тээврийн үйл ажиллагааны тасралтгүй байдлыг ханган ажиллаж буй Аль-Жазийра Эйрвэйсийн үйл ажиллагааг сайшааж, цаашид хоёр талд хамтран ажиллах боломжтой санал, санаачилгуудын талаар танилцуулав.

    Монгол Улсын Засгийн газар, Кувейт Улсын Засгийн газар хооронд 2025 оны нэгдүгээр сарын 19-ний өдөр Агаарын харилцааны тухай хэлэлцээрт гарын үсэг зурснаар хоёр улсын хооронд шууд нислэг үйлдэх эрх зүйн орчин бүрдсэнийг онцолж, энэхүү боломжийг бодит ажил хэрэг болгох, шууд нислэг нээх чиглэлээр тус компанитай хамтран ажиллах эрмэлзэлтэй байгаагаа илэрхийлэхийн зэрэгцээ Монгол Улсын аялал жуулчлал, худалдаа, эдийн засгийн өнөөгийн байдлын талаар товч танилцууллаа.

    ​Мөн Монгол Улсаас Кувейт Улс руу 2024 оны арваннэгдүгээр сард мах, махан бүтээгдэхүүний экспорт эхэлснийг мэдээлж, шууд нислэг нээснээр хоёр улсын худалдаа, эдийн засгийн хамтын ажиллагааг шинэ шатанд гаргахын зэрэгцээ аялал жуулчлалыг хөгжүүлэх, иргэдийн харилцан зорчих урсгалыг нэмэгдүүлэх, бизнесийн харилцаа холбоог өргөжүүлэх, Монгол Улсаас Кувейт Улсад нийлүүлэх экспортын бүтээгдэхүүний нэр төрөл, хэмжээг нэмэгдүүлэхэд чухал ач холбогдолтойг онцлов. Гүйцэтгэх захирал Баратан Пасупати “Аль-Жазийра Эйрвэйс” компанийн нислэгийн сүлжээ, зорчигч болон ачаа тээврийн үйлчилгээ, тэр дундаа тус байгууллагын дунд болон урт хугацааны бодлогын талаар дэлгэрэнгүй танилцуулга хийж, Монгол, Кувейтийн хооронд агаарын тээврийн хамтын ажиллагааг хөгжүүлэх боломж байгааг тэмдэглэв.

    Мөн хоёр улсын хооронд шууд нислэг нээх боломжийг зорчигч, ачаа тээврийн эрэлт хэрэгцээ, зах зээлийн нөхцөлтэй уялдуулан судлах, нэн ялангуяа Кувейт Улсын Засгийн газар, Монгол Улсын Засгийн газар, Кувейт Эйрвэйс болон Аль-Жазийра Эйрвэйс гэсэн дөрвөн талт түншлэлийг бий болгож, нислэг эхлүүлэх асуудлыг хамтран судлах боломжтойг илэрхийлж, энэ чиглэлээр цаашид хамтран ажиллахаар тохиролцов. Монгол Улсаас мах, махан бүтээгдэхүүн болон бусад бараа бүтээгдэхүүн импортолж буй холбогдох аж ахуйн нэгжүүдэд ачаа тээврийн үйлчилгээ үзүүлэх боломжтойг тэмдэглэв. Энэ хүрээнд холбогдох аж ахуйн нэгжүүдтэй холбоо тогтоож, тээвэрлэх бүтээгдэхүүний төрөл, хэмжээ, нийлүүлэлтийн давтамж болон тээвэрлэлтийн шаардлагын талаарх мэдээлэл солилцох нь хамтын ажиллагааны боломжийг тодорхойлоход ач холбогдолтойг онцлов.

    Түүнчлэн уулзалтад Кувейт Улсын “Al-Khaleej Travels” аялал жуулчлалын компанийн төлөөлөл оролцож, Кувейт Улсаас Монгол Улс руу аялал жуулчлалын зорилгоор зуны улиралд хуваарьт бус нислэг үйлдэх, энэ хүрээнд Монголын Аялал жуулчлалын холбоо болон бусад холбогдох аялал жуулчлалын аж ахуйн нэгжүүдтэй цахим уулзалт хийж, хамтын ажиллагааг эхлүүлэхээр тохирлоо.  Уулзалтаар талууд Монгол, Кувейтийн хооронд зорчигч болон ачаа, тээврийн шууд нислэг нээх, Кувейт Улсаас Монгол Улс руу аялал жуулчлалын хуваарьт бус нислэгүүд эхлүүлэх чиглэлд цаашид нягт холбоотой хамтран ажиллахаар тохирлоо.