Лам, шүтээн зураач Т.Дүгэрийн “Жийдаан богдын увдис” шүтээн зургийн үзэсгэлэн болон зурагт номын үзэсгэлэн 2026 оны 11 дүгээр сарын 8-12-ны өдрүүдэд Г.Занабазарын нэрэмжит Дүрслэх урлагийн музейн үзэсгэлэнгийн танхимд болно.

Үзэсгэлэнг Соёл, спорт, аялал жуулчлал, залуучуудын яамны “Бүтээлч сар” аяны хүрээнд Говийн ноён хутагтын музей, Г.Занабазарын нэрэмжит Дүрслэх урлагийн музей, Өвөрбаясгалант Хамрын хийд, “Жиком пресс” компани хамтран зохион байгуулж байна.

Үзэсгэлэнд Монголын сонгодог орчуулгын уран зохиолын нэг болох “Жийдаан богдын намтар”-ыг шүтээн зургаар дүрсэлсэн бүтээлүүд дэлгэгдэнэ. Жийдаан богд нь Өмнөд Сүн улсын үед амьдарч байсан түүхэн хүн бөгөөд монголчууд түүнийг 16 батад агчийн нэг, хутагт хувилгаан хэмээн хүндэлдэг байжээ. Тэрээр архи ууж, нохойн мах идэн, согтуу галзуу дүрээр явж, хуурмаг лам нарыг шоолж, хятадын хэвшмэл ёс заншлыг шүүмжилдэг байснаараа алдаршжээ.

Уг намтрыг VIII Богд Жавзандамба хутагт болон Ноён хутагт нар хятад хэлнээс монгол хэлнээ орчуулан буулгаж хадгалж байсан бөгөөд Ноён хутагт Д.Данзанравжаа жил бүрийн Цагаан сараар уншуулдаг байжээ. Одоо Монгол Улсын Төв номын сан болон Говийн ноён хутагтын музейд хадгалагдаж байна. 100 гаруй жилийн өмнө Нийслэл хүрээнд өргөн уншигддаг байсан энэ зохиолыг зургаар дүрсэлсэн бүтээл нэн ховор юм. Харин Хятадад өнгөрсөн зууны 60-аад онд Соёлын их хувьсгалын үеэр уг намтрыг хориглож, олон гар бичмэл, зургийг шатаасан байна.