Бид энэ удаагийн “Уран бүтээлчийн цаг” буландаа реппер Big Gee-г онцолж байна.

      Түүний эцэг эхээс заяасан нэр нь Төгсжаргалын Мөнх-Эрдэнэ. Тэрбээр 1983 онд Улаанбаатар хотноо төрсөн. Нийгмийн  шилжилтийн хэцүү үед түүний аав тэнгэрт одож, гэр бүлийн шаардлагаар хэдэнтээ нүүж, нэлээдгүй олон сургууль сольж суралцсан гэдэг.  

                Харин 1999 онд өргөн өмд, томдсон цамцаар гоёсон шүлэг бичих хоббитой хүү бичсэн үгээ аянд дээр үглэж үзсэнээр Т.Мөнх-Эрдэнэ хип хоп хөгжим хийж эхэлж байлаа.  Үүний дараа “Дайн ба энх” хамтлаг цомгийнхоо нээлтийн үеэр “Хамгийн сайн үглэж чадсан хүнд цомгоо бэлэглэе” гэсэн байдаг. Тайзан дээр өөрийгөө хэр өсөж дэвших чадвартай хүү вэ гэдгийг Жий баталж, тус цомгийг өөрийн болгосон. Улмаар ах нараасаа хэрхэн хип хоп хөгжим хийх талаар анхны А үсгээ заалгасан гэж хэлж болно. Тэр үед Жий өнөө цагийн хип хопын оргилуудыг нэг болно гэж өөрийгөө төсөөлөөчгүй хэд гурван үг эвлэгхэн холбочихдог дунд ангийн хүү байсан юм.  Энэ үеийн хүүхдүүдийн дийлэнх нь хип хоп хөгжмөөр “амьсгалж”, хүмүүжиж байсан гэхэд хилсдэхгүй.

                Жий өвөөгийнхөө мэргэжлийг өвлөж сэтгүүлч болохыг хүүхэд байхаасаа мөрөөддөг байсан гэнэ.  Энэ мөрөөдлөө ч биелүүлж 2005 онд Соёл Урлагийн Их Сургуулийг сэтгүүлч мэргэжлээр төгсөж МҮОНРТ-д эвлүүлэгчээр ажиллаж байжээ. Эзэмшсэн мэргэжлээ одоо ч ашиглаж  “Street Dreams”, “Базаа” нэвтрүүлгүүдээ өөрөө эвлүүлсэн гэнэ.   Энэ талаараа тэр хэвлэлд өгсөн ярилцлагадаа “Би сэтгүүлчийнхээ ажлыг хийж байгаа.Та бүхэн надаас ярилцлага аваад түүнийгээ сайтдаа буулгадагтай адил би амьдралдаа олж авсан зүйлээ хөгжим дээрээ буулгадаг юм” гэсэн байдаг.

 Жий оюутан цагаасаа уран бүтээлүүдээ идэвхтэй цацаж эхэлсэн.  Их сургуулиа төгсөөд таксинд явж, клипээ цацаж олонд танигдсан. Энэ үед түүний ээж “Бөмбөгөр” худалдааны төвд лангуу ажлуулж, Жий барааг нь зөөж тусалдаг байж. Энэ үед сонсогчид түүнийг элдвээр хэлэх ч үе байжээ.  Үүний дараа 2006 онд өнөө цагийн хип хопын томоохон төлөөллүүдийн нэг болсон Click Click Boom бүлгийг найзуудын хамтаар  байгуулж байжээ. Энэ үеэс л түүний дуртай зүйлээрээ мөнгө олох зам нээгдсэн байдаг.  Гэхдээ дөнгөж эхэлж буй уран бүтээлчид тийм ч өндөр үнэтэй ажил олдохгүй нь ойлгомжтой. Энэ талаараа тэр “Анх эхнэртэйгээ амьдралаа эхлүүлж байх үед мөнгөтэй байхаасаа байхгүй байх өдрүүд олон байсан.  “Хорь, гучин мянгад бааранд дуулаад өг” гэхэд нь хурдан очиж дуулаад, тэр мөнгөөрөө гэртээ хүнс авдаг байлаа” гэж ярилцлагууд дээрээ дурдсан байдаг. Толгойтын хүү ингэж л бүхнийг тэгээс эхэлж,  мөрөөдлийнхөө төлөө тууштайгаар хичээж, унаж босож өнөөдрийн түвшинд хүрсэн юм.           

ПРОДЬЮСЕР Т.МӨНХ-ЭРДЭНЭ

           Мөн тэр өөрийгөө чамгүй жүжиглэх авьяастай гэдгээ харуулж “Микроны босс”, “Приусны босс”, “Боссын босс” цуврал мөн  “Гангстерууд” уран сайхны киноны гол дүрийг бүтээж, давхар продьюсерээр ажилласан. Харин сүүлд 2020 онд хэвлэлд өгсөн ярилцлагадаа “Би дахиж кинонд тоглохгүй” гэсэн байдаг. Гэхдээ үзэгч, сонсогчид түүний үнэн жүжиглэлтэд тунчиг дуртай хэвээр... 25 жилийн турш тасралтгүй уран бүтээлээ туурвиж буй түүний бүтээлүүдээс цөөн хэдийг онцолно гэдэг амаргүй. Түүний дууг хараал ихтэй гэж шүүмжлэх нэгэн байхад  нийгмийн бодит үнэнийг дэлгэж байна гэж сайшаах нь илүү.

          Жий өнгөрсөн жилүүдэд  “Боловсролгүй сэхээтний тавигдахгүй илтгэл”(2008 ), “Мөнгөгүй хүний цомог”(2009), “Монгол реппер” цомог (2010), Жонон хамтлагтай хамтарсан “Монголз” цомог (2011), “Geeometry”(2014) зэрэг есөн цомгоо тус тус гаргасан. Мөн олон арван хит дууг бүтээж, уран бүтээлүүдээрээ нийгэм, улс төрийг шүүмжилсээр ирсэн. Мөн дүү “Real” продакшныг үүсгэн байгуулж, шинэ үеийн олон чадварлаг уран бүтээлчдийг гаргаж ирсэн байдаг. Т.Мөнх-Эрдэнэ чадварлаг уран бүтээлчээс гадна сайн хань, аав, хүү  уран бүтээлч дүү нарынхаа сайн ах билээ. Урлагийн хүрээллийнхэн түүнийг дууны үг шигээ үнэн зан чанартай. Харин ааш зан нь зөөлөн гэдэг. 

            Одоо харин тэр наймдугаар сарын 24-нд "THE LEGACY" гэх дөрөв дэх тоглолтоо хийх гэж байна. Том ахын том тоглолт үзэгчдийг дүүргэх нь тодорхой биз ээ.