Бритиш Колумб мужийн зүгээс OpenAI-г өнгөрөгч хоёрдугаар сард Тамблер Ридж сургууль дээр гарсан халдлагын хохирлыг барагдуулах, ChatGPT-ийн аюулгүй байдалд өөрчлөлт оруулахыг шаардаж байна.

Есөн хүний амь насыг хохироосон буутай халдлага үйлдсэн этгээд аллагын төлөвлөгөөгөө ChatGPT ашиглан боловсруулсан нь тодорхой болсон. Харин OpenAI компанийг тухайн чатыг цагдаагийн байгууллагад мэдэгдэх ёстой байсан хэмээн буруутгаад байна.OpenAI компани Флоридад гарсан буудалцаантай холбоотой асуудал болон хүчирхийллийн хэд хэдэн асуудлаар шүүхэд дуудагдаад байгаа юм.

      Сан Францискогийн холбооны шүүхэд гаргасан дээрх нэхэмжлэлд OpenAI болон тус компанийн гүйцэтгэх захирал Сэм Альтманыг хариуцагчаар татжээ. Бритиш Колумб муж хоёрдугаар сарын халдлагын дараах нөхөн сэргээх ажилд өнөөдрийг хүртэл зарцуулсан зардал болон цаашид зарцуулах хөрөнгийг нөхөн төлүүлэхээр нэхэмжилж байгаа. Мөн ChatGPT-ийн хүчирхийлэлд хүргэж болзошгүй чатыг боловсруулах журамд өөрчлөлт оруулахыг шаардаж байна. Бритиш Колумб мужийн Тамблер Ридж дэх сургуульд гарсан буудалцааны улмаас есөн хүн амиа алдсаны ихэнх нь хүүхдүүд юм. Халдлага үйлдэгч, 18 настай Жесси Ван Рутселаарын буутай хүчирхийллийн талаар чаталсан чатыг тухайн үед компанийн аюулгүй байдлын баг тэмдэглэсэн байсан боловч цагдаад мэдэгдээгүй ажээ.

    Альтман мужийн иргэдэд зориулж илгээсэн захидалдаа хууль сахиулах байгууллагатай холбогдоогүйдээ “харамсаж байгаагаа" илэрхийлсэн. Тэр бээр шинэчлэл хийхээ амласан боловч Бритиш Колумб мужийн ерөнхий прокурорын холбогдох хүсэлтэд хариу өгөөгүй байна. Одоогоор халдлагад өртсөн сургуулийг буулгах ажил үргэлжилж байгаа. Шинэ сургууль барих, сэтгэл зүйн эрүүл мэндийн тусламж үйлчилгээ ар гэрийнхэнд нь үзүүлэх болон бусад ажлын зардлыг муж хариуцаж байгаа юм.

   OpenAI-ийн төлөөлөгч Дрю Пусатери "OpenAI нь засгийн газар болон хууль сахиулах байгууллагуудтай хамтран ажиллаж, аюулгүй байдлыг сайжруулах тал дээр хариуцлагатай хандана" гэж мэдэгдсэн. Халдлагад өртсөн иргэд болон амь үрэгдэгсдийн 30 гаруй ар гэр халдлагаас урьдчилан сэргийлэх боломжийг алдсан хэмээн компанийг буруутган Калифорниагийн холбооны шүүхэд нэхэмжлэл гаргасны дараа Бритиш Колумб мужийн захиргаа ийнхүү шүүхэд гомдол гаргалаа.

     Цагдаагийн байгууллагын мэдээлснээр Ван Рутселаар хоёрдугаар сарын 10-нд гэртээ ээж, хойд ах хоёрыгоо буудан хөнөөсний дараа сурч байсан сургууль дээрээ очиж багшийн туслах болон 12-13 насны таван сурагчийг буудан хөнөөжээ. Үүний дараа Ван Рутселаар амиа хорлосон байна. Тус компани Ван Рутселаарын ChatGPT-тэй хийсэн чатыг анх 2025 оны зургадугаар сард анхааралдаа авсан. Улмаар халдлага үйлдэгчийн бүртгэлийг хаасан боловч тэр бээр шинэ бүртгэл нээж, платформыг үргэлжлүүлэн ашиглаж чаджээ. Компанийн зүгээс тус бүртгэлийг тэмдэглэсэн боловч хууль сахиулах байгууллагад мэдээлэх дотоод шалгуурт нь хүрээгүй гэж мэдэгдээд байна.