Нийслэлийн Засаг дарга бөгөөд Улаанбаатар хотын Захирагч Б.Пүрэвдагва БНСУ-ын Хвасон хотын Захирагчийн хоёрдугаар орлогч Чо Сон Мүн тэргүүтэй төлөөлөгчдийг хүлээн авч уулзсан байна. Уулзалтаар талууд хоёр хотын цаашдын хамтын ажиллагааг өргөжүүлэх боломж, хамтран ажиллах чиглэлүүдийн талаар санал солилцжээ.

   Уулзалтын үеэр Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Монгол Улс, БНСУ-ын найрсаг харилцаа, хамтын ажиллагааг хот, орон нутгийн түвшинд өргөжүүлэн бэхжүүлэх нь хоёр орны иргэдийн харилцан ойлголцол, нөхөрлөлийг нэмэгдүүлэхэд чухал ач холбогдолтойг онцолжээ. Тэрбээр “Манай есөн дүүргээс аялал жуулчлал, үйлдвэрлэл төвлөрсөн Налайх дүүрэг БНСУ-ын Хвасон хоттой хамтын ажиллагаагаа цаашид өргөжүүлэх өргөн боломжтой. Улаанбаатар хотын зүгээс Хвасон хоттой харилцан ашигтай, урт хугацааны, тогтвортой хамтын ажиллагааг хөгжүүлэх хүсэл эрмэлзэлтэй байна” гэв.

   Мөн хоёр хотын олон улсын харилцаа, хамтын ажиллагааг хөгжүүлэх саналыг 2026 оны наймдугаар сарын 6-нд хүргүүлснийг дурдаад, ухаалаг засаглал, залуучуудын боловсрол, соёлын солилцоо, аялал жуулчлалын чиглэлээр хамтран ажиллахын зэрэгцээ эдийн засаг, аж ахуйн нэгжүүдийн харилцан солилцоог идэвхжүүлэх сонирхолтой байгаагаа илэрхийлжээ.

   Хвасон хотын Захирагчийн хоёрдугаар орлогч Чо Сон Мүн хотын эдийн засгийн онцлогийн талаар танилцуулав. Тус хотод “Samsung Electronics” компанийн үндсэн үйлдвэр байрладаг бөгөөд “Hyundai”, “Kia” зэрэг автомашин үйлдвэрлэгчид болон олон тооны жижиг, дунд үйлдвэр үйл ажиллагаа явуулдаг байна. Тэрбээр Хвасон хотын жижиг, дунд үйлдвэрлэлийн салбарын аж ахуйн нэгжүүдийг Монголын ЖДҮ-үүдтэй холбон хамтран ажиллах, цаашлаад хөрөнгө оруулалтын чиглэлээр хамтрах боломжтойг онцолсон байна.

Талууд цаашид хот хоорондын хамтын ажиллагааг эдийн засаг, үйлдвэрлэл, аялал жуулчлал, боловсрол, соёл зэрэг чиглэлээр өргөжүүлэх боломжийг судлан ажиллахаар санал нэгдсэн байна.